講族語，敬祖先
作者：So͘, Iàn Tek
228 ê chhèng-siaⁿ
Chi-ná-lâng ê hoah-siaⁿ
Chhò-lâng-hīⁿ ê kńg-chi̍h siaⁿ
Hō͘ Tâi-oân ê bó-gí chiām-chiām siau-siaⁿ
1960 nî-tāi ê Kok-gí ūn-tōng
Kok-bîn-tóng thiat-té siau-bia̍t Tâi-oân ê bó-gí
Hō͘ Tâi-oân-lâng sit-khì lêng-hûn
Tùi ka-tī ê gí-giân bô sìn-sim
Siōng-tè--ah goân-liōng--goán
Goán bô chiàu Lí ê chí-ì kiâⁿ
A-li̍p-chó͘--ah goân-liōng--goán
Goán bô kóng chāi-tē ê ōe
Kóng Tâi-gí kiù Tâi-oân
Chin kán-tan ê 1 kù ōe
Kám kóng ū hiah-nī oh
Cho̍k-gí sī chó͘-sian lâu--lo̍h-lâi ê ōe-gí
Kèng chó͘-sian ài tùi kóng cho̍k-gí khai-sí
Tui-su ê sî nā kóng Chi-ná-ōe
Chó͘-sian kám káⁿ lâi sio-chhōe
I kám chai-iáⁿ lán sī i ê kiáⁿ-sun
Chó͘-sian kám ē gō͘-kái lán sī gōa-kok-lâng
228 ê eng-lêng teh âu-kiò
Tâi-oân-lâng kám ū thiaⁿ--tio̍h
Tâi-gí teh-beh sí--ah
Chó͘-sian ê ba̍k-sái chha̍p-chha̍p-tih
Kiò lán ài kā Tâi-gí thn̂g-thòaⁿ--lo̍h-khì
Án-ne chiah tùi in ē-tàng kau-tài
Chó͘-sian ê ba̍k-sái chha̍p-chha̍p-tih
Kiò lán ài kā Tâi-gí thn̂g-thòaⁿ--lo̍h-khì
Chiah ē-tàng an-ùi 228 ê eng-lêng
