主講／陳正豐
記錄／吳玉祥
「我囡仔時tiānn-tiānn tī你ê身軀邊tshit-thô，是你leh保護--我，tsit-má我已經大漢--ah，換我來看顧--你。」Tsit句話是陳正豐老師tī 2002年民間發起「保護樂生院老樹、保留院長宿舍」運動ê時，對樂生院院長辦公室門口埕hit欉老杜英所講ê話。陳老師khah早tī農委會林業試驗所服務40外年，做過林業試驗所太麻里研究中心kap福山研究中心ê主任。伊tsit世人計共有50冬蹛tī樂生療養院ê職員宿舍。講題所講ê頂坡角1 145號，是leh指樂生療養院khah早ê地址「台北縣新莊鎮頂坡角145號」2。
樂生療養院是一間治療痲瘋（『漢生病』）患者ê專門病院。痲瘋是lán人去uè著麻風分枝桿菌了後，伊ē沓沓仔敗壞lán ê皮膚、粘膜kap四周圍ê神經，hōo lán麻痺bē感覺thàng疼、失去筋肉ê控制力；若準病症變傷重，有時koh tio̍h鋸跤iah是鋸手來破相。Tsit款病症khah tsia̍p發生tī厚濕tâm、散赤、衛生bái、人口ba̍t、營養不良、抵抗力低ê熱帶／亞熱帶地區。感染ê初期若有冗早接受藥物治療，就ē-tàng hōo你無病尾、完全離療。其實tsit種病症，無親像一般人所想--ê hiah gâu傳染，而且koh有90% ê人有先天ê免疫力，現時lán台灣每一年發生ê新病例kan-na賰十个頂下，已經有符合世界衛生組織消除痲瘋ê標準。
1873年醫學界發現引起痲瘋ê麻風分枝桿菌，mā發現接觸感染是致病ê原因，加上hit時iáu無藥可治，致使世界各地ê患者lóng陷入hōo人長期隔離ê絕境。1930年台灣總督府就創建癩病（nāi-pēnn）療養樂生院，kā患者強制隔離，斷絕in kap外界ê接觸。1953年，美國支援引進痲瘋ê特效藥物DDS了後，治療tsiah開始有功效。第二年就開放康復ê人ē-tàng出院tńg厝，院區ê鐵線網開始拆除。Koh隔兩年，院民提著in ê身份證，回復公民權。到kah 1960年，樂生院tsiah完全廢止強制隔離，改做開放門診治療、巡迴檢診。
長期關tī院區ê隔離生活，佳哉有宗教信仰來hōo院民做倚靠，tse對in ê婚姻、家庭、khang-khuè iah是經濟，lóng有濟濟ê幫贊。其中出上濟力、影響上大--ê就是「基督長老教會聖望教會」ê孫理蓮牧師娘。樂生院拄起好ê翻tńg年，1931年就開始有長老教會ê牧師入來宣教關懷，小倉兼治牧師tī 1936年發起設立「基督長老教會聖望教會」。
二次大戰了後，日本籍ê醫療人員hām員工離開，醫療用品kap生活物資非常欠缺，致使院民心神浮沉不安，tsia̍p-tsia̍p有人自殺。一直到孫牧師娘成立芥菜種會，設臨時診療所，邀請馬偕病院ê醫生kap路德會ê護士提供醫療服務；寫批向海外募款，供應生活用品。另外伊koh開辦「職業治療室」，透過木工kap裁縫ê khang-khuè來做職能治療，順suà hōo tsia-ê院民有thang趁寡收入；設立「安樂之家」、「慈愛之家」照顧in ê細囝。Án-ne院內ê事勢ē-tàng穩定--落-來，連院民mā開始看著希望。M̄-nā是顧腹肚niā-niā，孫牧師娘koh起禮拜堂、設圖書館、放影戲、放音樂來顧心靈。所以眾人lóng尊稱孫理蓮牧師娘是「漢生病人之母」、「台灣ê『德雷莎』」，一點仔to無超過。
院內ê「棲蓮精舍」是佛教徒院民用家己ê khuì力共同起造--ê，tsia m̄-nā是in普通時ê生活基地，更加是in精神寄託ê所在。上uànn建立ê天主教教堂，是輔仁大學谷寒松神父所推動完成--ê。
2004年初，日本ê人權律師團向日本法院提出訴訟，in代替戰前被強制隔離ê院民，要求日本政府ài比照日本ê案例提出補償。案件tī 2005年得著勝訴，台灣kap韓國ê患者lóng有領著補償金。Tsit个事件mā促成台灣政府hām人權團體合作，進行患者人權損害ê事實調查，一直到kah 2008年7--月通過《漢生病病患人權保障及補償條例》，tsiânn做lán國內醫療人權立法ê路站碑。
病疼ē好，身體suah已經無完全，漢生病患者ê身軀受著嚴重ê傷害，面容、跤手、tsíng頭變形彎khiau、行動慢鈍不便，beh tńg去社會回復日常ê生活，是講khah簡單，事實真難為，落尾in規氣將樂生院當做是「永遠ê家庭」。In tī療養院做伙生活半世人，ná像是一家伙ê tsit種情份，kā in ê心挽tiâu-tiâu。頂坡角145號、佛堂、禮拜堂、天主堂、厝宅，iáu-koh有火鼎間hit枝kuân-kuân ê煙筒管——m̄-nā tī冷凊ê寒--人，hōo眾人有燒水thang用，mā是逐家ê精神指標、院區ê地標。若是出外tńg--來，遠遠看著伊lò-lò ê形影，跤步自然ē變緊，因為，厝tī hia、心mā tī hia。1995年為著beh hōo新莊捷運機廠做基地，樂生院被迫遷徙去ná鳥籠仔ê新院區，雖然m̄甘、受委屈來搬厝，上無，眾人iáu-koh ē-tàng平安徛做伙。
用同理、siàu念、感恩ê心來看樂生院行--過ê tsit條路，tī繼續向前行ê每時每刻，lán ài提醒家己mài koh犯仝款ê錯誤。
- 迴龍舊地號名：斬龍、頂坡角、塔寮坑。
- 樂生療養院舊院區地址尾--à改編做新北市新莊區中正路794號。新院區地址是桃園市龜山區萬壽路一段50巷2號。
