作者：林榮淑
一齣戲，mā是一段歷史……
Tī hit款kap地獄仝款ê日子，kan-na繼續唱歌，hōo我tsit款軟tsiánn ê囡仔ná親像ē-tàng度過人間痛苦ê歲月。
——蔡焜霖
話頭
2020年，海島演劇推出「2020人權遊台灣《那就唱歌吧》」戲劇kap座談方式推廣人權。100分鐘戲劇演出蔡焜霖ê一生，m̄-nā是白色恐怖受難者ê故事，更加是一齣有關台灣歷史真正ê紀錄，湠做轉型正義議題。
2020年10月13，tsit齣人權戲劇列車《那就唱歌吧》tuì台灣大學怡仁堂起行，沿路停靠基隆「86設計公寓」、台北「蔡瑞月舞蹈研究社」、宜蘭「宜蘭人故事館多功能視聽教育館」、桃園「大溪文化會館演藝廳」、花蓮「國立東華大學學生活動中心演講廳」、台中「清水國小古蹟講堂」、彰化「國立彰化生活美學館實驗劇場」，11月初8開到年度ê終點站——「新北市國家人權博物館禮堂」。全台灣lóng總巡迴演出十場。
2020年拄tn̄g tī玫瑰古蹟
10--月，秋風涼爽，捧一粒ǹg望ê心，準時來到玫瑰古蹟「蔡瑞月舞蹈研究社」，觀賞《那就唱歌吧》。
劇情感心，節奏緊快，演員專業，為著tshuā觀眾tńg去hit時ê情境，台語、日語透lām演出；m̄ bat日文ê我，規个人ê感情mā tuè演員幼秀ê肢體動作。男主角蔡坤霖tī火燒島坐完十年冤屈ê政治烏牢、tńg來台灣，khà in兜ê門；阿母tuì厝內行--出-來，看著心肝仔囝，ná捶蔡焜霖ná講「你tsit个死囡仔」，一直到母仔囝雙人攬做伙。Tuì頭到尾kan-na簡單ê一句台詞，台跤有人拭目屎，有人拭鼻水，有人細細聲仔哭出聲，天跤下阿母ê心lóng仝款。坐tī我後壁排幾若位suí姑娘tī戲拄開始搬ê時，tshi-bú-tshi̍h-tshū講啥mih台語聽無；tsit-má，bih喙目箍紅紅。
座談會尾後主持人宣佈，觀眾ē-sái排隊hōo蔡焜霖本人一个溫暖。天頂lak落來一个禮物，雖然天色暗--ah，四爿房屋內kap路邊ê燈火一pha一pha光--起-來，逐家耐心排隊。一个一个kap戲劇中男主角ê本人握手iah是sio攬，蔡焜霖老先生親切kap每一个觀眾互動。我誠心誠意對伊講：「祝你食百二！」伊喙笑目笑講：「M̄-thang--ooh！M̄-thang--ooh！」態度溫馴，親切熱情、khuì口樂暢、度量優雅、手底溫度kap kòo謙有禮風格等，自án-ne深刻活tī我ê記持--裡。
2021年sio拄tī台灣師大
批桶內發現海島演劇tī 2020年進行人權遊台灣《那就唱歌吧——蔡焜霖》十場演出，tio̍h著tsiânn大ê回響。2021年進行兩年計畫，校園巡迴演出，kan-na兩場——台灣師大kap國家人權博物館。有開放外口民眾參加，趕緊報名離厝khah近ê台灣師大hit場。
仝一齣戲隔一年，tī無仝ê時間、無仝ê空間演出，有四个演員仝、五个演員換人。師大綜合大樓二樓ê 202演藝廳tsiânn sù-sī，坐tī第三排正中ng，演員ê表情看kah一清二楚，tsiok享受。雖bóng是第二擺觀賞，仝款感動kah用幾若張衛生紙拭目屎。
演員謝幕了後，海島演劇編導邀請差事劇團負責人鍾喬老師做伙進行座談會。鍾老師提供一个開闊ê觀察角度看待歷史膜脈，tuì國共內戰、韓戰、冷戰等國際局勢看台灣局勢ê變化，ē-tàng更加清楚台灣歷史ê行向kap原因，tse也是創作ê時必須理解ê筋脈。
觀眾有人提醒對白色恐怖受難者「補償」kap「賠償」tsit兩个兩字詞，kan-na頭一字無仝，意思suah完全無仝。有人提議應該kā《那就唱歌吧！》拍做電視劇iah是電影，hōo koh-khah濟台灣人了解台灣ê歷史。
總講，精彩好戲kǹg-thàng過時間kap空間，質地永久bē無--去，一直感動人心。歷史ē-sái原諒，但是bē-sái放bē記--得。Hōo徛tī tsit塊土地ê人愛tsit塊土地，現此時上需要做ê代誌，就是hōo逐家確實認bat雙跤徛ê tsit塊土地kap lán祖先行--過ê跤印。
大人囡仔lóng án-ne——若是聽著教訓，反感／排斥ê心理就夯--起-來，隨kā耳仔關--起-來。教育性質厚ē hōo人失去接受ê興趣。不而過政治是人類存在非常重要ê社會現象之一，影響lán人生活逐个層面，人權koh是普世價值，人權教育ài tuì細漢釘根tsiah是根本ê做法。
繪本深度有限、小說文字tiānn-tiānn siunn濟，戲劇是綜合藝術，伊ê面有規千萬款表情。看--起-來kánn-ná簡單其實koh無簡單，符合美國教育家W. Kilpatrick提頭ê siāng時學習原則：主學習（primary learning）、副學習（associate learning）kap附學習／輔學習（concomitant learning）。《那就唱歌吧》用輕鬆、靠俗ê方式譬論講肢體語言、歌唱等藝術手法搬白色恐怖真正ê故事，用溫柔ê方式控訴沉重ê悲哀。Hōo觀眾浸tī戲劇氣氛--裡，「潤物細無聲」順其自然熟sāi台灣歷史，效果比phīng聽演說ê方式——教室聽老師上課、聽知名度kuân ê人演講、iah是聽候選人發表政見等——好tsiânn濟。
看戲是用娛樂ê方式做教育，人人ē tī無仝款ê場景看著家己ê影。換句話講，提別人ê酒杯仔沃家己心中ê不平kap憂悶，得著心靈ê淨iah是昇華。學習是tī不知不覺--裡leh進行，一旦沓沓仔吸收iah是影響個體感情ê骨髓，就khuann-khuann仔生做自己ê血肉。如此tsit般，附學習kap輔學習照觀眾ê歲頭、性別kap生活背景無仝，每一个人hōo伊tín動、搖tshuah／學習--著ê mi̍h件就bē完全仝款。
Tsiah-nī suí-khuì ê人權戲劇列車駛入去國民義務教育ê中、小學校園，無知ē偌好？若準經費容允，主辦單位按歌仔戲公演ê規格tī舞台雙爿安細台ê電子螢幕kah字幕，對m̄ bat台語kap日語ê觀眾欣賞透lām三種語言ê《那就唱歌吧 ！》 tsit 齣戲一定tsiânn有幫贊。
中國信託銀行 羅東分行 164540263696
