人間天堂
作者：A-Koan
1
Jîn-kan thian-tông thong lâng chai
Siaⁿ-hō hiáng-liāng thàu sè-kài
Kéng-tì ná tô͘ ōe ngó͘-chhái
Hó san hó súi lâng ài lâi
2
200 nî lâi bô chiàn-cheng
Tiōng-tāi chai-eh bô hoat-seng
Goân-pún sàn-chhiah ê khó͘-kéng
Pòaⁿ sè-kí chêng lóng hoan-péng
3
1815 chhiam iok-sok
Choân-kiû siōng kú tiong-li̍p-kok
Bô ji̍p Au-bêng bē che̍k-bo̍k
Kok-chè cho͘-chit chia̍p ha̍p-chok
4
Chhòng-sin lêng-le̍k pâi thâu-miâ
Chhut-sán siong-phín hó miâ-siaⁿ
Siā-hōe ún-tēng keng-chè iâⁿ
Tī chia chhut-sì siōng hó-miā
5
Cheng-pió bô lâng thang pí-phēng
Gîn-hâng sán-gia̍p ū kàu heng
Seng-ki chè-io̍h hó kong-kéng
Bu̍t-lí si̍t-giām siōng tōa keng
6
Siâⁿ-chhī chng-kha lóng sī gû
Bián kiaⁿ bô tè bé chhì-sù
Chhio͘-kó͘-lè-tò͘ kap Hōng-tú
Hō͘ lí chia̍h kah pá-tu-tu
7
26 chiu chiâⁿ liân-pang
Chè-tō͘ kui-tēng lóng bô-kâng
Tiong-iong pō͘-tiúⁿ 7 ê lâng
Lûn chò chóng-thóng múi 1 tang
8
Ti̍t-chiap bîn-chú ì-sek koân
Chhiâng-chāi kong-tâu ta̍k hāng soán
M̄-koh lú-sèng tâu-phiò-koân
1990 chiah chiu-choân
9
Bu̍t-kè siuⁿ kùi bô-nāi-hô
Sin-súi khah koân ū in-kó
Khoân-kéng chheng-khì bián hoân-ló
Khong-khì hâm chúi bû-kè-pó
10
Koaⁿ-hong ê ōe ū 4 chióng
Tek Hoat Ì Lô saⁿ-chun-tiōng
Pún-thó͘ gí-giân kò͘ chiâⁿ ióng
Bú-gí pó-chûn kài sêng-kong
11
Phah-sńg hông-e̍k bū-sà-sà
Bô chhiūⁿ pó-tó piáu-hiān ka
Jîn-kan thian-tông chiàⁿ kok-ka
Kî-si̍t sī lán Hō͘-mó͘-sa
