阿雲感覺阿好--à總算拄著對手。
阿好--à le̍k規世人，規家口灶lóng聽伊ê，食老soah puh一个無伊法--ê。M̄是阿霞hit-lō白目款，chit个猴死囡仔兩老--ê lóng真巴結。就恐驚囡仔boa̋i叫阿公媽，事事項項為伊拖為伊磨，soah tio̍h來腹內吊苦桃。
莫怪--lah！就是án-ne hông食死死--lah！
Éng過細漢in三个若敢hiah好膽，未chēng-mī kā你chàm黏leh壁。時代無仝--ah，阿爸阿母bē-sái無叫，阿公阿媽，就免交chhap--ah！是講，按怎巴結親像lóng無效。就比喻講hit碗滴八點鐘久ê雞湯，用心用愛用精神落去hiâⁿ，soah hông當做狗屎。
「你粗這個，這個好好粗！」
「不要！」
「粗看看啊！好好粗喔！」
「不要！」
細漢囡仔sāi-thái，出力kā sak--開，將阿媽hē蹛伊面頭前ê雞湯chhia-chhia--倒。燒燙燙ê雞湯潑一半tī阿媽身--上，另外一半tòe白鐵仔碗tī塗跤kho̍k-kho̍k-lìn。有人大聲「啊！」一聲，阿雲tio̍h急徛--起-來。
「媽！你有按……」
「Aih-ioh！肉禽啊！你有燙--著--無？」
現場亂chhau-chhau，阿好--à緊張一下，伸手去póe若晴ê頷se，若晴起phàn，一面póe開阿媽ê手、一面koh出手kā sak。
「不要！」
「若晴！」阿雨大聲háⁿ，隨趕過阻擋囡仔koh繼續拍阿媽，也驚伊踏著燒，kā若晴規个掠koân，「若晴！你怎麼可以打阿媽！」
囡仔tī半空中踢跤tiuⁿ，硬ki硬ai。阿好--à tī邊--a勸阿雨將囡仔囥--落-來。「Bőa緊--lah，我to無按怎……」
Chiâ知若晴m̄-nā無愛，hông掠tī半空中koh beh出手去趕阿媽，póe a̍h bē著，soah愈ki愈悽慘，像leh刣豬。
「若晴！你冷靜一下！」
「不要！不要！媽媽、媽媽！」
阿霞掠縫緊khe̍h桌布來拭，阿雲去阿好--à身軀邊kā看。親像有潑著手ê款，m̄-kú阿好--à手ia̍t--leh講無代誌，àⁿ腰kā碗khioh--khaih。囡仔ki-ki叫，無人有伊ê法。
In阿母聽著囡仔háu-ke-ke，生生狂狂走--來，tng拄好看著阿雨kā囡仔抱koân-koân，緊張一下chông--koaih。
「放下來！你把小孩放下來！」
「我叫你把若晴放、下、來！」
阿婷掠狂--ah。便若tńg來庄跤，囡仔人m̄知按怎情緒lóng chiok無穩定，koh逐不時leh啼leh háu。一下入房間，in牽--ê就ē唸hō͘聽，伊mā chiok無奈。阿雨看阿霞將塗跤hôe--過了，輕輕仔kā囡仔囥落地，若晴硬死捶in阿爸ê大腿。
「討厭爸爸！討厭阿媽！」
阿雨khû--落-來beh kah囡仔講話，若晴出手ùi in阿爸ê面táiⁿ--loeh，hôe著阿雨目鏡歪一爿。細漢囡仔哭kah無siá-sì，阿雨未chēng-mī開喙，阿婷就kā囡仔攬--過，搭伊mài哭。
「晴晴，怎麼了？怎麼可以打阿媽跟爸爸？我們不是說過不可以打人？」
「我不要那個！」
「那我們用說的就好，你有沒有告訴阿媽你不要吃？」
「我有說！」
「好，但是打人就是不對。而且那個湯很燙，燙傷怎麼辦？」
「可是、可是，」囡仔bih喙chhīⁿ-chhǹg叫，一句講to bē chiâⁿ話，「我有說、說、不要，阿媽、阿媽、不聽。」
「那你不可以動手啊！這樣很危險。來，你有沒有受傷？」
囡仔搖頭。
「可是我、我不要吃！」
「好，沒關係，不吃就不要吃。」
阿婷kā若晴頭挲挲--leh，若晴chhńg bē soah，kā in阿母kâⁿ-tiâu--leh。
阿雨接收著牽手ê眼神，輕聲kā阿好--à講：「媽，人囡仔講無愛，你就mài硬tu hō͘--人--lah……」
「啊我就想講，he規隻雞kan-na滴hit碗neh……」
「人家就不要啊！」阿婷大聲hoah，越--leh chhōa囡仔離開現場，留其他ê大人sio對siòng。
「啊，我去看māi--leh。」阿雨後跤tòe--出-去。
阿好--à kā白鐵仔碗phâng--leh，tu hō͘桌布換水tńg--來、tng beh koh khû--loeh拭塗跤ê阿霞。
「賰一喙，你kā食掉，khah bē無彩。」
阿霞注神看阿好--à--一-下，幌頭，碗接--koaih kā koàiⁿ--loeh。
※ ※ ※
「若晴，來跟阿媽說再見。」
若晴tī hia tiùⁿ-ku，刁工kā頭ngiú--leh，看tùi車窗另外一爿去，參越頭看阿媽--一-下a̍h m̄。阿媽手伸入車窗，手--lìn tēⁿ一隻狗仔囝ê布尪仔，kā會笑面，笑笑仔講。
「肉禽，你看che是啥？」
「小狗！」囡仔見--著chhiⁿ目珠就金--開，tùi阿媽手底chih過一隻狗仔。阿好--à看孫歡喜kah喙笑目笑，感覺khai chit條真有價值。
「哇！若晴，你看！是小狗！喜不喜歡？」
囡仔目珠thèⁿ金金，頭拚勢tàm，la̍k狗仔la̍k-ân-ân。
「那你有沒有跟阿媽說謝謝？」
若晴頭àⁿ低低，m̄出聲。
「趕快啊，不說謝謝，阿媽可能以為你不喜歡，要把小狗帶走了喔！」
若晴將狗仔囝mo͘h tī胸前，親像chiok拍拚leh kah家己ê意志鬥爭。阿媽徛tī外口，m̄知kám是準拄煞好。M̄-kú，koh後遍beh看--見，就koh「kū-kú-kuh」ê代誌--ah。Koh等--一-下、koh ke--一-時-仔……
「謝謝。」
親像牽狗落湯，若晴用細kah ná蠓仔聲來講。
In阿爸tháu一个khùi。
「你要大聲一點啊，不然阿媽聽不到！」
「謝、謝！」
阿好--à笑bun-bun，講，「豪啦豪啦，有喜歡就豪啦。」
「好--lah，媽，án-ne阮來去--ah。」
「好，開車khah細膩--leh！到位ài講--一-聲heh。」
「好。晴晴跟阿媽說再見。」
「再、見！」
「好好好，再見再見。」
阿好--à徛tī門跤口送in走，看kah目珠無tńg-lûn。
風風火火來、風風火火離開--ah。囡仔一離開，厝內ke chiok恬靜。
※ ※ ※
逐拜六暗，阿雨ē khà視訊電話hō͘阿好。知影伊愛看孫，總--是希望in ke寡機會thang開講。視訊kài方便，thang聽聲、koh thang看影。
Tng～tng～tng～
「Oeh？媽。」
「Hèⁿ，你食飽--未？」
「有--lah！食飽--ah！若晴拄去洗身軀、liam-mi出--來。」
「Che啥mih所在？哪ē無tī lín兜？」
「Che阮兜to tio̍h。」
「……啥mih意思？Lín買新厝？」
「Hèⁿ--lah，頂個月搬厝--ah，想講thèng候安搭好勢chiah hō͘你知。」
「……」
Tiang時仔買厝koh入厝--ah？買厝chit款大代誌，伊m̄知。看in「一家伙」快快樂樂，阿好感受著酸bui ê幸福。原來，tiang時仔家己早就掠在in囝ê「家伙」外--lo͘h。
「啊！拄仔好。身軀洗好--ah！若晴你來看，這是誰！」
視訊鏡頭ǹg ùi囡仔hia去，畫面內底走--來ê伊面仔紅紅，笑gī-gī，chiok健丟！看著手機窗仔內底ê人影，soah tī hia驚歹勢，雙手kā面cha̍h--leh，笑kah kī-ko̍k叫。阿媽等無孫開喙，伊先hoah。
「肉禽！你忘記我了！你是不是忘記我了！」
孫tī in阿爸身--上一尾ná蟲ngiauh-ngiauh-nǹg，m̄-kú怎樣to無愛看鏡頭。
「你有沒有叫阿媽？你看，是阿媽！」
騙幾lō͘擺、siâⁿ a̍h bē tín動，阿媽也知chit番應該是koh等無人叫--ah。看孫心切，阿媽開始講話，tio̍h急beh聽khah濟孫ê聲：
「肉禽！你沒有粗換換hoⁿh？啊你沒有粗菜菜hoⁿ？怎摸都沒有長高--leh！」
「媽，你kám ē-sái mài問che？伊lóng有食啊！」
阿好隨恬--去。看in乖孫笑kah kī-kā叫、走離開鏡頭，去揣叫--伊ê阿母。
現現人影就tī眼前，伸手就thang摸著in囝in孫ê喙kah鼻，soah按怎khàng就隔一塊枋。Chiah深ê溝，tiang時giú--ê？Koh是chiâ giú--ê？注意--著ê時，早就無法--lih。
阿好恬靜chiok久chiok久。查某囝嫁出門，iá ē siàu念爸母；後生娶某，就離開、永遠bē koh tńg--來--ah。Koh-khah免講伊兩个查某囝lóng性格、m̄嫁。Éng擺嫌in銷bē出--去，老--來發見竟然是伊棄嫌老姑婆ê囡仔留tī身軀邊。老翁hō͘管、老母hō͘查某囝管，逐不時leh冤家勞債。M̄-kú，lóng iá看ē著人，囉嗦mā tī chia、激氣mā tī chia、bē爽有人thang「khāng一个phu-lián」、心情bái koh有人ē tàu chhoh-kàn-kiāu、ē問你kám有需要kā你kōaⁿ一罐bì-lù。
啊後生--leh？
後生chiok有才情。後生趁chiok濟錢。後生過了真好。後生kah in牽--ê感情真好。後生有替in生一个孫。有孫gőa iāng--leh！芒種--à兄弟in囝lóng iá未娶，人in後生比in khah khiàng，替in生一个孫！Hit幾个少年人，路--lìn看--見koh lóng ē kā阿好--à kah芒種--à a̋i-sat-chuh，阿好心肝內lóng ē偷笑in無阮囝hiah gâu！
M̄-kú，人in ê囝mā像雲--ā仝款，逐不時tńg厝。
阿好想起chō--日koh看著ban叔--à in囝歇假tńg--來，koh戴瓜笠tī田--lìn陪in阿爸食便當，兩个人有講有笑。伯--à姆--à mā仝款，in後生查某囝，tiāⁿ-tiāⁿ載in去chhit-thô。頂禮拜姆--à koh leh展講in cha̋u囝載in去海邊仔，曝過頭曝一下頭殼liù皮，in囝翻頭就載伊去se̍h百貨公司，選一頂花草súi-súi ê帽仔hō͘--伊。
阿好聽leh笑笑--à。
我mā有cha̋u囝。阿好--à án-ne想。
Cha̋u囝知影伊愛食佗一擔牛肉麵；cha̋u囝知影伊愛食佗一間ê奶茶；cha̋u囝家己儉tuh-tuh，koh tiāⁿ-tiāⁿ招伊出去sńg。有招，伊lóng無去niâ。無法度，伊知in mā艱苦過，m̄甘in khai錢。
啊，後生--leh？
後生按怎才情，lóng親像別人ê故事。
孫，孫mā是另外一个故事。伊m̄知孫今仔日kah chiâ冤家、m̄知孫今仔日點心食啥mi̍h、m̄知孫ê跤穿幾號鞋、m̄知孫tiang時仔hō͘蠓叮一下喙phé腫oai-oai koh jiàu kah破皮。規年thàng天看講有十句話--無？人in烏lu-lu lóng聽有伊ê話，準兩老--ê為孫翻譯伊聽有ê話，伊mā無愛kah阿公阿媽sńg。Lóng án-ne--ah，lín koh希望我按怎？
看in囝ê喙親像魚脣hop--leh hop--leh，阿好--à雄雄想--著，檢采in孫mā是án-ne leh看--in。伊m̄ bat--我、我m̄ bat--伊。
「Mài問che，我是koh ē-sái kah伊講啥？」
（煞）
編註：
華語用無仝字體色水標示。
