主講／薛翰駿
記錄／陳亮穎
本文是 2023/9/13「台語sa攏有」講座演講ê摘要記錄，薛翰駿是網路媒體「沃草」總編輯。
台語sa攏有 - YouTube 頻道
9--月ê「台語sa攏有」講座邀請網路媒體「沃草」ê總編輯薛翰駿，hām逐家分享「沃草」成立ê因tuann、媒體定位、組織運作，koh有到tann tī各種社群平台khah有影響力ê報導。
有關「沃草」成立ê原因，薛翰駿表示，tse tio̍h-ài uì 2013年「洪仲丘事件」講起。當初tsit層事件，m̄-nā引起濟濟少年家行tsiūnn街頭，為軍中人權出聲，mā促成《軍審法》修法。Koh來，因為早前主流媒體，lóng kā一等一ê記者派去台北市議會採訪，一直到公民運動tshui-sak《軍審法》修法，立法院內部ê環境tsiah沓沓仔變做媒體關心ê重點，tī tsit款情形下，hit-tsūn「沃草」ê股東就提議成立一个thang監督立法院修法ê網路媒體，就是lán tsit-má所知ê「沃草」。
自成立到tann 10冬ê時間，tī「沃草」ê組織內底，差不多有15个人，包含上頂面ê主管「營運長」、行政、總編輯、記者、影音、專案經理、社群編輯、品牌總監、社群行銷、設計師、畫尪仔冊ê畫家、工程師。若uì社群平台經營ê成果來看，「沃草」ê面冊迷眾頁有25萬人追蹤、Instagram（以下簡稱IG）上無有五萬人追蹤，啊若Twitter（現此時改名做「X」） mā有五萬人以上leh追蹤，是外國媒體報導台灣ē參考ê新聞來源。逐年「沃草」lóng ē分享in ê經營報告，hōo讀者了解in一年當中有製作啥款專題報導。
一般立法院ē tī 9月中iah是9月底起，開會審理法案，一直到12月底，等歇睏到過年了後，tsiah-koh uì 2月中iah是2月底開會到6--月。Tī立法院審理法案ê期間，「沃草」ē到立法院採訪，啊若立法院歇熱kap歇寒ê時tsūn，「沃草」mā ē思考有啥款報導主題。除了監督公民議題ê報導以外，in上出名--ê就是以尪仔冊ê形式呈現議題評論，koh有kā一般人khah oh理解ê法案內容，整理做方便讀者看ê圖文，tī社群媒體頂面發表。
M̄-koh總編輯薛翰駿mā表示，in beh製作tsia-ê圖卡，代先tio̍h-ài用tsiok濟時間了解一个法案修法前後精差tī佗位，tsiah-koh kap同事討論用啥款圖表呈現。親像《勞基法》修法，in tio̍h-ài hōo讀者理解法案按怎規範勞工歇睏ê時間，koh有像年金改革ê議題，in mā ài hōo koh-khah濟人了解年金改革ê理由kap方案。
除了tsit款複雜ê法案議題以外，「沃草」mā bat做其他ê資訊圖表專題，比論講無仝本土語言tī台灣世代之間使用ê比率、「XYZ」世代使用ê科技產品按怎變化，koh有佗一寡年歲ê人bat tī學校學著台灣史。Tsia-ê題目lóng kap lán ê歷史文化真有關係，mā引起濟濟讀者ê共感，hōo人願意分享，tī社群媒體頂面kā in湠--出-去。
「轉型正義」mā是「沃草」tsiok關心ê議題。Tī 2022年，也就是二二八事件75冬記念ê時tsūn，「沃草」發表一項專題，叫做『二二八75年後，我們拾回什麼？』。專題頂面頭先有統計，自1947年2月28到仝年4月初ê中間，受難者iah是失蹤者有偌濟（iáu無包含無名姓記錄ê人）。網站內底koh來有「互動地圖」，tshuā逐家理解hit年二二八事件爆發以來，相關歷史事件發生ê地點，mā有kap hit時ê報紙資料，kā報導內容kap事件地點做連結。專題內底有訪問受難者家屬ê報導，hōo讀者koh-khah了解，二二八事件對lán台灣社會有啥mih重大ê影響。
Tī監督立法院、政治人物，kap轉型正義議題以外，最近「沃草」mā發表kap民防有關係ê內容專案。因為台灣面對中國ê威脅，m̄-nā ài智覺中國資訊戰對台灣ê影響，mā ài培養基本ê民防智識。所以in有發行紙本ê《公民行動指南》，希望透過tsit本手冊，針對一般台灣人對戰爭ê迷思做pué-huē，mā hōo koh-khah濟台灣人知影，若拄著緊急災害甚至是戰爭，lán ài按怎疏開、按怎聯絡親人，iáu有為著避難、平常時tio̍h-ài tshuân ê mi̍h件。
Tsit kái「台語sa攏有」講座，薛翰駿以組織ê經驗起頭，分享tsit个網路媒體成立ê因tuann、初期報導方向，koh有代表性ê專題報導。逐家若想beh koh-khah了解「沃草」發表ê內容，ē-tàng跟tuè in ê面冊、IG、Twitter kap官方網站。
#台語sa攏有講座 專欄，本文使用教育部推薦漢字kap台羅。
#台文通訊BONG報 355期，2023年10月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
