Lán台文界ê朋友，真濟lóng是為著母語ê傳承，就算無啥mih資源，mā是拚性命chiâⁿ認真teh做台文ê khang-khè。
Án-ne講--起-來，ē-tàng tī體制內教台語，有影是chiok好命。2000年民進黨執政了後，經過南社ê走chông，透過教育部ê政策支持，台灣ê大學校院陸續設立台灣文史相關系所，chit當中，khah拍損--ê應該是台灣文學系所差不多lóng變做是掛台灣khăng-páng ê中文系所。
表面上，根據教育部ê認知，台灣語文相關系所有二十外間，看--起-來chiok迷人，m̄-koh若斟酌去kā算，台語系所內底，有半數以上台語師資、勉強ē-tàng及格--ê，其實kan-na兩間，chit兩間是台中教育大學（簡稱「中教大」）kap中山醫學大學（簡稱「中山醫」）ê台語系。中山醫台語系今年開始停止招生，現有ê學生，koh過三冬畢業了後，就ē行入歷史，chhun--落-來ê中教大台語系koh ē-tàng維持外久，mā是chiâⁿ oh按算ê代誌。
2010年，因為特別ê因緣，我來中教大台語系做老師。對我個人來講，ùi花蓮盤來中央山脈另外一爿ê台中，家庭生活受著真大ê變動；ùi原來用華語上電腦ê課到chit-má改做用台語上台語ê課，教學、研究ài開始轉型。一目nih，到taⁿ已經三冬過。
台語系ê學生，就我家己觀察--著-ê，一半是無按算讀台語系iah是m̄知影台語系是the pìⁿ啥báng，拄好填著chit个系，所以就入--來-ê；另外一半，確實有想beh讀台語系，可能是因為對台語chit个語言iah是傳統戲曲、民俗有感情所以入--來-ê，m̄-koh大概無因為對台語文有趣味所以入--來-ê。整體來講，台語系ê學生，普遍比別个系所khah有淡薄仔台灣意識，至少khah敢kā「愛台灣」講出喙，m̄論in心內ê台灣是清楚iah是含糊ê概念。
推薦甄試ê時，來參加免試ê學生通常lóng講台語真要緊，文化傳承chiok重要，m̄-koh入--來了後，罕得聽著in講話用台語。當然，就算原底厝內有teh講台語，經過高中職進前ê體制教育，mā hō͘華語洗kah差不多--ah。
一年仔拄入--來ê學生，聽著老師一開喙lóng是台語，甚至點in ê名mā用台語（有ê名姓ài查字典chiah讀ē出--來），大部份學生lóng感覺真gông-ngia̍h，大概經過半學期，就漸漸ē-tàng接受chit个（可能in心內認為）無奈ê現實。有一位學生，有一擺雄雄聽著我kap一个外系ê老師講華語，伊kā我講：「老師，原來你ē-hiáu講華語！」
有法度而且願意用台語kap老師對話ê學生，kap年級有關係，愈高年級ê學生，kap老師用台語對話ê比例愈koân（che表示建立台語ê環境不止要緊）。當然mā是ē拄著一直到畢業lóng無才調iah是無願意用台語kap老師講話ê學生，我心內lóng ē想講，無彩你讀四冬台語系。
Goán有要求中教大台語系ê學生ài通過台語、客語、日語、英語ê檢定，其中台語ài有中高級，ē-sái參加教育部台語認證iah是成大ê台語檢定。其中，教育部ê台語認證，過去三冬逐年題型lóng有變動，困難度mā無仝，bat有學生tī學校ê成績bōe bái，soah因為無通過台語檢定，無法度順利畢業。有時仔mā ē看著一寡台語程度夭壽bái ê同學，拄好hit擺認證考試khah簡單，hō͘伊通過中高級，心肝頭實在是chiok凝--ê。
我感覺tī台語系教書，上費氣ê部份是教材。台語系用ê教材應該ài是用台語文書寫--ê，而且為著幫贊學生通過認證，漢字ài遵照教育部ê規範（雖然chit个規範逐年lio̍h-á ē修改），m̄-koh到taⁿ可能iáu揣boē著ha̍h chit个標準ê教材。Che應該是老師ê責任。我上過「台語文習作」，教育部2007年出ê台語朗讀文章，若是beh照教育部規範ê用字，平均一篇ài修改十外字。教育部出版--ê是án-ne，lán就知問題有外嚴重。
所以tī chia上課，準備上課講義佔我大部份ê教學時間。真ǹg望未來幾冬，有一寡ha̍h教育部用字規範ê教材ē-tàng出版。
本chiâⁿ台灣史chit門課是一位退休ê兼任老師teh教，我入--來ê第一冬，心內就開始teh按算，後--來等到chit位老師超過七十歲bōe-sái koh教ê時，就換我來上。我接台灣史ê想法，除了想beh利用chit門課來加強學生ê台灣意識以外，另外一項koh-khah要緊--ê，就是ē-tàng要求學生用台文來寫台灣史ê報告，增加學生ê台文訓練。Chit-má ê學生當然比lán有khah幸福，高中職進前ê歷史課本就有台灣史，總是hit-chūn為著考試，就是記人名、記事件，我想，對台灣ê過去應該mā是懵懵懂懂，考慮chia-ê情形，我決定盡量利用看影片ê方式來進行，第一學期終戰前，第二學期戰後，koh補充一寡台語文運動ê代誌。戰後ê部份，用khah濟時間看二二八事件、白色恐怖、美麗島事件、台灣獨立運動相關ê影片，補充體制內ê台灣史課程ê不足。
另外，mā因為學生ê台語能力tī入學進前就已經hō͘華語洗kah差不多--ah，大部份學生ê台語，其實是華語式ê台語，可比講：「你幫我做」（vs「你kā我tàu做」）、「是án-ne嗎？」（vs「Kám是án-ne？」）、「是án-ne吧！」（vs「是án-ne--lah！」）、「歡喜ê做」（vs「歡喜來做」）、...等等，上華台對譯ê課ê時，下性命kā in糾正、提醒，總是效果chiâⁿ有限。語法ê情形是án-ne，用字koh-khah免講，教育部寫「予你」，考試mā án-ne考，交作業ê時，仝款「互你」、「乎你」規大堆。
聽我án-ne講，可能hō͘逐家感覺台語系ê學生ná像實在是chiok bái ê bái，其實mā無影，tī chit个漸漸放棄家己母語ê世代，台語系ê學生不時ē hō͘別系ê學生phì-siùⁿ講讀台語系有啥路用（恁家己mā應該去照鏡，看恁讀ê系kám有影khah有路用？），in koh願意（不管是無細膩iah是刁意故）來讀台語系，hō͘ goán ē-tàng用台語來上課，我iáu是ē kā in chhi̍h「讚」！
我心內其實一直teh期待今年入學ê大學生，因為in是第一屆自國校一年就開始上本土語言課ê囡仔，唯一感覺遺憾--ê是，chhun一間！
（本文使用傳統白話字）
