主講／Kapoli Aturaturaw（黃稚嘉）
記錄／李 維
本文是2024/12/11「台語sa攏有」講座ê摘要記錄，Kapoli Aturaturaw是台中教育大學台語系研究生、客委會諮詢委員、少女卡拉主唱／詞曲創作人。
Tsit改ê講者黃稚嘉真特別，厝--裡講客語，m̄-koh in阿媽是Siraya（『西拉雅』）族--ê，黃稚嘉有一个Siraya ê名號做Kapoli，是tsit-má少數ē-hiáu三種台灣本土語言（台語、客語、Siraya語）ê音樂創作者。Kapoli ê祖厝tī雲林，in講ê客語是「詔安腔」，以中國地理來看，是分佈tī漳州（詔安、平和、雲霄、南靖四个縣）ê客語。
Kapoli深入研究客語ê歷史kah分類，特別關心「雲林客事」。雲林客人自稱客語是「客事〔1〕」（kha-su）〔2〕，iah是詔安腔客語，是原鄉tī福建ê客語，kah廣東ê客語無完全仝款，代表有台中、雲林ê張廖家族，雲林崙背姓李ê家族等等。伊講，目前台灣客語腔口ê分類iáu是用中國原鄉地名來號，m̄-koh因為長期ê變化，lán tsia雲林「客事」kah中國詔安ê客語ê語詞已經有真濟精差。目前ē-hiáu講tsit款腔口ê客人，多數是有歲ê序大，語言ê傳承面對重大ê挑戰。
是按怎beh做本土語言創作？
Kapoli自細漢接觸Rock and roll，初中開始kah樂團參與一寡演出，tī高中ê時因為參加字音字型比賽，對客語、台語開始有趣味，自án-ne開始用本土語言創作音樂。Tī 2016年、伊大學ê時，kah王薈雯合作ê台語作品《揣你（tshuē--lí）》得著『統一咖啡廣場硬地音樂挑戰賽』冠軍，tsit改ê成功hōo伊對創作母語歌曲開始有信心。
Suà--來幾年陸續有台語、客語作品tio̍h獎。2020年，伊參與樂團「Siàu-lú khah-lah／少女卡拉」，in發行ê第一張專輯《卡拉電台》就入圍第32屆金曲獎「最佳客語專輯獎」。Kapoli分享講，伊入圍金曲獎了，有一擺夢著in開基祖媽來kā罵，講伊ê客語講kah li-li-lak-lak，腔口sì-kè烏白鬥，伊tī夢中tsiok艱苦、m̄敢kā應，kan-na kā阿媽講，「lóng hōo你安排--lah！」
組樂團寫在地ê故事
2021年，Kapoli kah朋友春棋做伙組「搞頭王樂團」。Kapoli、春棋兩人ê老爸lóng是雲林ê客人，為著生活來都市拍拚。所以兩人自細漢tī都市成長，雲林對in來講，是熟sāi又koh生份ê所在。Kapoli tī大學、研究所ê訓練當中，開始走揣家己ê根，m̄甘願看家鄉ê語言kah文化漸漸消失，甚至hōo人看bē起，決心勇敢學客事、講客語，組雲林ê樂團、寫雲林人ê歌。In ê歌詞是用都市移民二代、他者ê觀點來寫雲林ê故事。
《做我的Tso ngai e》專輯內底ê歌，以雲林客語為主，mā有部份是台語。Tsia-ê歌曲原本只是一个計畫，m̄-koh創作ê作品愈來愈濟，經過三年ê拍拚，整理出規張專輯。內容有講『城鄉差距』、西海岸環境汙染等議題，mā有講著家鄉ê語言文化kah雲林人拍拚ê故事。Kapoli有淡薄仔操煩，tsit-má iáu蹛tī雲林ê老人對「客事」ê復育無啥ǹg望，in對在地文化漸漸消失ê狀況並無重視。
本土語言創作ê挑戰
Kapoli用雲林客語創作ê時，tiānn-tiānn有人建議伊改用四縣腔來唱，in講，客語歌已經真少數，無應當koh分腔口。Kapoli認為，一个創作者應當ài堅持用家己ê腔口，雖然語言ê變化真oh避免，m̄-koh lán ē-tàng用「作品」ê型式hōo伊流傳--落-去。伊分享講，伊ê音樂可能iáu無法度真正對社會有啥mih改變，m̄-koh猶原ē-tàng kā土地、社會、環境、時代ê狀況記錄--起-來，hōo聽--著ê人有共鳴，期待thang改變眾人ê想法。
Kapoli強調，本土語言創作需要有聽眾支持。濟濟人選擇寫華語歌，是因為中國市場ê誘因khah大。Kapoli聽伊寫華語歌ê朋友講，去中國巡迴，逐个城市唱一場就有一萬，而且tse一萬，m̄是台票，是人民票。就收入來講，寫華語歌確實khah有吸引力。M̄-koh Kapoli認為，台灣有2,300萬人口，市場其實無lán想ê hiah狹，重點是beh按怎建置有利ê本土語言創作環境。Ài有系統性ê計策，tsiah有法度kā人才留--落-來。
另外，Kapoli mā建議，beh做本土語言創作者，ài有夠khuì ê語言能力。學語言上重要--ê是ài有查字典ê習慣，就親像學英文仝款，無主動去學，仝款學bē-hiáu。伊認為本土語言ê程度上無ài有教育部檢定C1 ê水準，án-ne創作tsiah ē khah自在。Tsit-tsūn本土語言樂團ê創作，大部份是一个人寫，若是規團ê成員lóng參與，一定ē激出khah濟創意，hōo作品koh-khah趣味。
結語
做一个多語ê創作者，Kapoli也希望用台語ê經驗，來提升逐家對客語消失ê危機感。Kapoli ê觀點是：台語若愈強，客語ê tshui-sak mā ē愈大力，兩種語言ē-tàng互相刺激、求進步。Kapoli tsit-má mā開始用Siraya語leh創作，tsia-ê作品lóng是伊對家己身份ê認同；伊講，透過本土語言ê創作，lán一定ē-tàng tī全球化ê世界當中，揣著lán家己ê路，hōo台灣ê語言kah文化繼續發展--落-去。
2.Tsia是用台羅標客語音。
