作者：黃偉嘉
《教育部臺灣閩南語常用詞辭典》內底有收一个火車站名「第一分道」，屬tī阿里山森林鐵路。伊ê標音是「Tē-it-hun-tō」，一下kā看，kánn-ná無任何ê問題。總--是，lán先ài來了解，「分道」tsit个mi̍h件，到底是啥貨？
研究室除了研究台灣ê地號名以外，2022年也執行文化部國家鐵道博物館籌備處「臺灣鐵道用語暨站名調查徵集計畫」，揣台鐵、糖鐵、林鐵ê老員工，請教in是按怎稱呼火車各項ê設施。另外，也趁田野調查ê機會，問看māi蹛tī火車路沿線ê序大，是按怎來講tsia-ê mi̍h件，tsiah收集、整理、比較。
「分道」tsit个詞，《臺日大辭典》有收錄，發音是「pun-tō」，而且特別註明是tuì英語point來--ê。分道安tī火車路頂，ē用得hōo火車切換線路。M̄-nā台鐵，只要是用鐵枝路leh走ê車，包括高鐵、捷運iah是人sak ê輕便車，lóng有tsit个mi̍h件。
Lán實際訪問台鐵、林鐵、糖鐵ê老員工，in確實平常lóng ē講「分道」。阿里山鐵路ê員工khah傳統，lóng是講「pun-tō」，台鐵、糖鐵員工ê發音是「pun-tō、phun-tō、hun-tō」lóng bat聽--過。總--是因為書面語號做『轉轍器』iah是『道岔』，一般人m̄知影tsit个mi̍h件有正港ê台語講法，連幾若擺公視台語台拄著tsit个詞，有直接用華語讀『轉轍器』--ê、也有讀m̄知tuì佗來ê「fu-liàn-toh」，實在是tsiok拍損ê代誌。
Point轉音做「分道」，ē用得講是兼顧「信」、「達」、「雅」ê翻譯。（Lán ē用得比較--一-下：香港ê廣東話是將Point翻做「波口」。）而且tī阮田野調查ê經驗中，連一般作穡ê阿公、阿媽也知影tsit个「分道」。若án-ne kā看，火車確實是早期台灣上重要ê交通方法。
可惜tsiah-nī有意義ê近代台語新詞，無收錄tī教育部辭典內底。火車站名雖然算有，suah無解sueh又koh標音錯誤，實在有必要修正。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
《教育部臺灣閩南語常用詞辭典》內底有收一个火車站名「第一分道」，屬佇阿里山森林鐵路。伊的標音是「Tē-it-hun-tō」，一下共看，敢若無任何的問題。總是，咱先愛來了解，「分道」這个物件，到底是啥貨？
研究室除了研究臺灣的地號名以外，2022年也執行文化部國家鐵道博物館籌備處「臺灣鐵道用語暨站名調查徵集計畫」，揣臺鐵、糖鐵、林鐵的老員工，請教in是按怎稱呼火車各項的設施。另外，也趁田野調查的機會，問看覓蹛佇火車路沿線的序大，是按怎來講遮的物件，才收集、整理、比較。
「分道」這个詞，《臺日大辭典》有收錄，發音是「pun-tō」，而且特別註明是對英語point來的。分道安佇火車路頂，會用得予火車切換線路。毋但臺鐵，只要是用鐵枝路咧走的車，包括高鐵、捷運抑是人捒的輕便車，攏有這个物件。
咱實際訪問臺鐵、林鐵、糖鐵的老員工，in確實平常攏會講「分道」。阿里山鐵路的員工較傳統，攏是講「pun-tō」，臺鐵、糖鐵員工的發音是「pun-tō、phun-tō、hun-tō」攏捌聽過。總是因為書面語號做『轉轍器』抑是『道岔』，一般人毋知影這个物件有正港的台語講法，連幾若擺公視台語台拄著這个詞，有直接用華語讀『轉轍器』的、也有讀毋知對佗來的「fu-liàn-toh」，實在是足拍損的代誌。
Point轉音做「分道」，會用得講是兼顧「信」、「達」、「雅」的翻譯。（咱會用得比較一下：香港的廣東話是將point翻做「波口」。）而且佇阮田野調查的經驗中，連一般作穡的阿公、阿媽也知影這个「分道」
。若按呢共看，火車確實是早期臺灣上重要的交通方法。
可惜遮爾有意義的近代台語新詞，無收錄佇教育部辭典內底。火車站名雖然算有，煞無解說又閣標音錯誤，實在有必要修正。
---------------------
