作者：黃偉嘉
高雄市南爿有一區，號做「林園」，tsit-má捷運紅線tng-leh tuì小港（Sió-káng）延長到hit tah。幾年以後，若坐tsit條紅線，應該就ē一直聽著「林園」出現tī放送內底。總--是，tsit个「林園」是按怎讀--leh？
先講一段歷史：tsit个所在上早是號做「林仔邊（Nâ-á-pinn）」。凡勢因為屏東mā有一个「林仔邊」，日本人為著分ē清楚，就tī大正9年（1920年）ê時tsūn，將高雄--ê改做「林園」、屏東--ê改做「林邊」。Án-ne看--起-來，「林園」ê歷史tú-tsiah滿百冬，照漢字讀「Lîm-hn̂g」應該就tio̍h？
是無m̄-tio̍h。不而過，若是實際拜訪當地，lín ē聽到在地人是讀做——「Lîm-mn̂g」！而且根據阮研究室ê調查，附近ê鄉鎮一直到鳳山lóng是án-ne講，到高雄市區tsiah有khah濟人是讀做「Lîm-hn̂g」。
Ē tuì「Lîm-hn̂g」變成「Lîm-mn̂g」，是因為語言學ê「同化」（assimilation）。簡單講，就是因為前一字韻尾是「-m」，喙就合--起-來。若無刁工唸hōo清楚，就ē影響著後一字ê發音，「h」就tsiânn做「m」--looh！Lán tī別位mā ē看著tsit款情形。譬如講：宜蘭蘇澳ê南方澳，在地人除了講「Lâm-hong-ò-á」，mā有人講「Lâm-mng-ò-á」，甚至就án-ne kā漢字寫做「南門澳」。
話koh講倒tńg--來。你認為未來捷運通車以後，「林園」應該ài讀佗一種？
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
高雄市南爿有一區，號做「林園」，這馬捷運紅線當咧對小港（Sió-káng）延長到彼搭。幾年以後，若坐這條紅線，應該就會一直聽著「林園」出現佇放送內底。總是，這个「林園」是按怎讀咧？
先講一段歷史：這个所在上早是號做「林仔邊（Nâ-á-pinn）」。凡勢因為屏東嘛有一个「林仔邊」，日本人為著分會清楚，就佇大正9年（1920年）的時陣，將高雄的改做「林園」、屏東的改做「林邊」。按呢看起來，「林園」的歷史拄才滿百冬，照漢字讀「Lîm-hn̂g」應該就著？
是無毋著。不而過，若是實際拜訪當地，恁會聽到在地人是讀做——「Lîm-mn̂g」！而且根據研究室的調查，附近的鄉鎮一直到鳳山攏是按呢講，到高雄市區才有較濟人是讀做「Lîm-hn̂g」。
會對「Lîm-hn̂g」變成「Lîm-mn̂g」，是因為語言學的「同化」（assimilation）。簡單講，就是因為前一字韻尾是「-m」，喙就合起來。若無刁工唸予清楚，就會影響著後一字的發音，「h」就成做「m」囉！咱佇別位嘛會看著tsit款情形。譬如講：宜蘭蘇澳的南方澳，在地人除了講「Lâm-hong-ò-á」，嘛有人講「Lâm-mng-ò-á」，甚至就按呢共漢字寫做「南門澳」。
話閣講倒轉來。你認為未來捷運通車以後，「林園」應該愛讀佗一種？
---------------------
