主講／呂佳靜
記錄／吳宛霖
台語sa攏有 - YouTube 頻道
今仔日ê「台語sa攏有」講座邀請呂佳靜老師來分享伊創作ê心思跤跡，伊創作ê靈感是uì「四季」來--ê，用音律ê變化唱出台灣ê四季、大自然ê日常。呂佳靜是高雄囡仔，細漢時tī廟口看歌仔戲、布袋戲，歌仔調、鑼鼓聲，koh有踮tī灶跤間看阿母teh做喙食mi̍h、點心，tsia-ê ta̍p-ta̍p-tih-tih ê記憶lóng是伊創作ê養份，變做一首一首充滿塗味ê歌詩。
呂佳靜上早期ê歌曲作品是kā lán台灣人按怎煮食kah煮食ê過程寫--出-來，你若是ē-hiáu唱，就包穩你踏入灶跤lóng免驚。譬如講《菜頭粿》，
磨，幼幼磨，將米幼幼磨。
Tshuah，一絲一絲tshuah，菜頭絲絲tshuah。
米是田內ê金仔，菜頭是塗內ê白玉。
Khiàn芳加入菜頭炒，倒入米漿慢慢炊。
炊好一sn̂g (1) 菜頭粿，食了一塊再來再來一塊。
按磨米漿、菜頭tshuah簽、khiàn芳炒--過，tsiah-koh hē lâng-sn̂g內炊，一步一步教lán按怎做出一sn̂g一sn̂g好食ê菜頭粿。歌詞寫米是金、菜頭是玉，hōo囡仔ē-tàng了解食mi̍h ê寶貴；另外，歌詞上尾句ê「再來再來一塊」，是按怎m̄是「koh來koh來」？原來呂佳靜特別藏一个意思tī內底，tsia ê「再來」是teh講「再來米」。
自生囝了後，呂佳靜就hām家己約束一定ài hōo囡仔全母語ê環境，hām囡仔講台語、唸台語故事冊，hām囡仔做伙peh山、看光景，lóng是伊創作ê養份。看著油桐花，唱：
油桐花白花花，四月時仔滿樹suí。
油桐花白花花，風若吹--過ná落雪。
油桐花白花花，日頭照--著展笑容。
油桐花白花花，雨若落--過滿地白。
拄著落雨天，唸：
落雨仔微，落bē離，滴滴答答落去佗位？
落到小溪底，落到樹葉仔邊，落到花面頂，落到厝尾頂，落到塗跤底。
舊年春天tī山--裡有聽「五色鳥仔（花仔和尚）」teh叫，靈感一下來就寫：
Kulu kulu kulu kulu，春天ê樹林仔啥人唱歌。
Kulu kulu kulu kulu，五色鳥仔真正快活。
Kulu kulu kulu kulu，輕聲幼語是啥款ê歌。
Kulu kulu kulu kulu，春色tng suí雙雙sio倚。
Tsho̍k tsho̍k tsho̍k tsho̍k，山坪ê ta木啥人leh kho̍k。
Tsho̍k tsho̍k tsho̍k tsho̍k，五色鳥仔用喙leh啄。
Tsho̍k tsho̍k tsho̍k tsho̍k，起造溫暖sù-sī ê巢。
Tsho̍k tsho̍k tsho̍k tsho̍k，迎接幼囝好好來顧。
Tī tshuā囡仔ê過程中，呂佳靜走去參加Waldorf（『華德福』）親子共學團，共學團tiānn-tiānn是先唱歌了後，tsiah來進行活動，圍圓箍仔唱季節ê歌，hōo學員thang uì文字來接觸自然ê演變。
中國壓霸雄雄來禁止台灣王梨出口ê事件，hōo呂佳靜tsiânn受氣，tī坐高鐵ê路--裡就寫出《王梨》tsit條歌，內容mā親像lán台灣人ê精神：
Tī溫暖ê土地，hōo熱情ê日頭曝。
M̄驚ta，m̄驚熱，m̄驚tshiah-ia̍h。
天kah地ê力量化做我ê葉，尖尖長長，ná寶劍閃星光。
風kah沙ê鍛鍊tsiânn做我ê皮，粗粗勇勇，ná鐵甲真堅強。
光kah水ê支持收藏變我ê果，黃gìm-gìm甜蜜蜜，映日光ê心。
Tī溫暖ê土地，hōo熱情ê日頭曝。
呂佳靜ê創作有時ē刁故意無做收尾，hōo人聽煞，曲調iáu-koh一直tiâu tī頭殼內、心肝底。透過伊ê作品，lán感受著伊對土地ê關愛kap歌曲ê力量。呂佳靜拍鼓唸歌詩，長期投入母語相關活動，伊認為lán若是感覺代誌是好--ê、是tio̍h--ê，lán tio̍h-ài一直做、一直做，伴就ē走倚--來。伊寫歌並m̄是為著別人ê認同，是beh hōo家己快樂，mā是一款自我治療，hōo家己有khuì力繼續行--落-去，hōo母語ê性命愈來愈有活氣。
- 歌詞原文是「一籠菜頭粿」，tī tsia調整做「一sn̂g菜頭粿」。
編按：Tsit篇記錄內底所有ê歌詞，lóng調整做雜誌ê漢羅用字。
