作者：王馨珮 （「基進會輾轉台語文讀寫班」第11期學員 ）
Tsin huann-hí ē-tàng pò-tio̍h tsit kái ê tha̍k-siá pan, tsai-iánn Tâi-gí-bûn khak-si̍t ū jī, jî-tshiánn ū hē-thóng teh kà ta̍k-ke si̍k-sāi, hōo guá kám-kak tsin kám-tōng.
Guá sè-hàn-sî-á tiàm tshù-lāi mā sī kap sī-tuā-lâng kóng Tâi-gí, khai-sí tha̍k kok-hāu-á liáu-āu tō khah tsia̍p kóng Huâ-gí. Tshut-siā-huē í-āu, in-uī tsoh-sit ê khuân-kíng khah tiānn iōng Tâi-gí hām lâng tsih-tsiap, guá tsiah huat-hiān ka-tī ê bó-gí lîng-li̍k kìng-jiân tsham Huâ-gí tsha hiah-nī tsuē.
Siūnn-beh siōng tha̍k-siá pan, tû-liáu hi-bāng ē-tàng ka-kiông Tâi-gí thiann, kóng í-guā, mā siūnn-beh ha̍k-si̍p “guá tshiú siá guá kháu” ê lîng-li̍k, kā buē-tàng iōng Huâ-gí piáu-ta̍t ê pōo-hūn iōng Tâi-gí-bûn kì-lo̍k--lo̍h-lâi.
Thiann lāu-su tsū li̍k-sú hong-bīn khai-sí kài-siāu Tâi-gí-bûn ê khí-guân, liáu-kái Tâi-uân ê li̍k-sú kap Tâi-gí ê khùn-kíng, kìng-ka hōo guá khak-tīng ha̍k-si̍p bó-gí ê tiōng-iàu-sìng. Gún tsit tāi ê bó-gí lîng-li̍k í-king tsham sī-tuā-lâng m̄ tsai tsha guā-tsuē--khí--ah, nā-sī koh m̄ phah-piànn, tō tsiànn-káng pàng-tsuí-lâu--ah.
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
