作者：黃偉嘉
台灣是一个使用漢字ê社會。所以地號名m̄-nā是口語傳承，也ē受著所寫ê漢字ê影響，尾--à就轉音--去，而且無一定ê規則。Lán tsit個月就來看台南、新北兩位有關「菁（青）」ê地號名。
新北市平溪區有一tsuā「平溪線」鐵路，盡磅有一站號做「菁桐」，在來ê地號名是「青桐坑」，平溪老泉腔讀做「Tshinn-tông11-khinn」 ；若是基隆市、瑞芳街tsia-ê khah偏漳腔ê所在，就讀做「Tshenn-tông33-khenn」〔1〕。
根據地方ê講法，tse是因為早期有tsiânn濟野生ê青桐生tī tsia。總--是日本時代就寫做「菁桐坑」，戰後kā車頭ê四箍圍仔設一个「菁桐村」、火車站名也配合改做「菁桐」，到tann當地6、70歲tsit沿已經tsiânn普遍讀做「Tshing-tông」，算是變做文讀音--ah。
Suà--來看台南後壁，有一庄叫做「菁寮」，在地讀做「Tshenn-liâu」。若照地方ê講法，tsit位ê「菁」是一種ē-tàng做青色染料ê植物。進前一齣劇《俗女養成記》就是tī菁寮hip--ê，tsit-tsūn已經是出名ê觀光場所。
趣味--ê是，雖然tsia tī戰後mā設一个「菁寮村」，當地suah無變做文讀音。顛倒是台語新聞leh放送ê時，主播iah是記者tiānn-tiānn讀tîng-tânn做「*Tshing-liâu」抑是「*Tsing-liâu」（加星號代表是無正確ê音），百面是hōo漢字騙--去。
是按怎「菁桐坑」音變--ah，「菁寮」suah無--leh？阮想可能ê原因有：
1.因為「菁桐坑」改做「菁桐」有減字，照台語人ê khuì口就ē開始講起文讀音。上出名ê例就是彰化ê「田中央」，在來讀做「Tshân-tiong-ng」。1920年hōo日本人一下改做「田中」，tsit-tsūn lóng講「Tiân-tiong」--ah。
2.庄頭名提升做行政區iah是交通站名以後，mā khah有可能變做文讀音。譬如高雄ê「九曲堂」，在來讀做「Káu-kha-tháng」。火車設站ê仝一年（1907年）ê白話字文獻就隨出現文讀ê「Kiú-khiok-tông」，到tsit-tsūn已經用kah tsiânn慣勢。
3.「菁桐」改讀文音以後，就無漳、泉腔ê分別，對平溪、瑞芳兩爿腔口ê人lóng利便。「菁寮」附近ê鄉鎮lóng倚優勢腔，就khah無tsit款問題。
4.文音「tshing」hām泉音「tshinn」本底音就差無kài濟，後壁接ê「桐」又koh是「-ng」，唸久自然「同化」（assimilation）--ah。
各位koh有啥mih看法--leh？
〔1〕編按：羅馬字正手爿下跤細細字ê阿拉伯數字表示tsit个音節實際聽--起-來ê kuân低，5上kuân、1上低。11表示低平、33表示中平。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
臺灣是一个使用漢字的社會。所以地號名毋但是口語傳承，也會受著所寫的漢字的影響，尾仔就轉音去，而且無一定的規則。咱這個月就來看臺南、新北兩位有關「菁（青）」的地號名。
新北市平溪區有一逝「平溪線」鐵路，盡磅有一站號做「菁桐」，在來的地號名是「青桐坑」，平溪老泉腔讀做「Tshinn-tông11-khinn」；若是基隆市、瑞芳街遮的較偏漳腔的所在，就讀做「Tshenn-tông33-khenn」。
根據地方的講法，這是因為早期有誠濟野生的青桐樹生佇遮。總是日本時代就寫做「菁桐坑」，戰後共車頭的四箍圍仔設一个「菁桐村」、火車站名也配合改做「菁桐」，到今當地6、70歲這沿已經誠普遍讀做「Tshing-tông」，算是變做文讀音矣。
紲來看臺南後壁，有一庄叫做「菁寮」，在地讀做「Tshenn-liâu」。若照地方的講法，這位的「菁」是一種會當做青色染料的植物。進前一齣劇《俗女養成記》就是佇菁寮翕的，這陣已經是出名的觀光場所。
趣味的是，雖然遮佇戰後嘛設一个「菁寮村」，當地煞無變做文讀音。顛倒是台語新聞咧放送的時，主播抑是記者定定讀重耽做「*Tshing-liâu」抑是「*Tsing-liâu」（加星號代表是無正確的音），百面是予漢字騙去。
是按怎「菁桐坑」音變矣，「菁寮」煞無咧？阮想可能的原因有：
文音「tshing」和泉音「tshinn」本底音就差無蓋濟，後壁接的「桐」又閣是「-ng」，唸久自然「同化」（assimilation）矣。
各位閣有啥物看法咧？
---------------------
