作者：林榮淑
話頭
文化是做伙生活tī仝一个所在，某一个民族ê生活方式。伊ê心臟是符號系統——文字。台語文化hōo生活tī tsit塊土地ê人知影lán是啥mih人、lán beh行去佗位。《台文通訊BONG報》 ，島嶼母語文化雜誌界ê頭人，一路行過30冬。
Pho̍k仔聲
21世紀資訊爆炸、5G ê新時代來--ah。
Tī生產量大、速度緊、碎糊糊ê資訊kap khah完整智識ê冊本中ng，紙本雜誌tsit个媒介iáu徛tī tsiânn重要ê位置，因為伊對現在發生ê代誌tiānn-tiānn做系統性ê開拆 kap應聲，tsit款重要性是bē-tàng hōo別種媒體替換--ê。尤其是過去錯誤ê語言政策，hōo lán ê母語受霸凌、賰一條細細條khuì絲仔，台文雜誌承擔ê歷史擔頭是偌nī重啊。
一本雜誌ê性命史kap人類ê生長發育史仝款仝款。落塗、紅嬰仔：七坐八爬九發牙、歪歪tshua̍h-tshua̍h學行路、兒童、少年……30年一路行--來，天災人禍無ji̍h電鈴，三不五時tshiau人kê。巨風吹、暴雨沃、滾蛟龍硩，iáu活leh世間，tī島嶼文化界算是罕有品種，是偌nī仔無簡單！尤其是一本m̄是政府出錢發行ê雜誌，一本hông歸類文化邊仔墘ê台文雜誌，行過坎坎khia̍t-khia̍t烏烏暗暗寂寞路，無怨嘆無後悔，勇敢擔起「任重道遠」ê人文使命。
伊是siáng？免懷疑，是伊，是伊，就是伊。
《台文通訊BONG報》，pho̍k仔聲鼓勵--一-下！30歲生日蠟燭點hōo to̍h，是偌濟人出錢出力，一手接一手，流落算bē完ê汗水參血水。《台文通訊BONG報》已經tī島嶼台語文歷史冊頁雕刻出hōo人尊敬ê扉頁，海內外關心母語ê人lóng看tī目睭內，無人敢講一句m̄是。
Sio拄——台語社《掖種》牽線
出世tī阿猴城ê四年級生，台語是我ê母語，台語文是性命ê本色。
國民黨政府tuì烏水溝hit爿làu-phâu來台灣，提華語當做唯一ê「國語」，強勢語言政策全面洗腦，母語遭受無情欺壓。南部囡仔tī學校，雖然大環境強迫阮講華語，放學tńg--去，參厝內ê人、厝邊隔壁、親tsiânn五十、朋友八十lóng仝款ē用母語交流，台語猶原徛在在。結婚tuè翁婿搬蹛台北城，tsit聲tann lóng害了了--ah！
好佳哉！仝款tī阿猴城生長ê戶長對跤踏ê tsit塊土地有認同，伊知影台語文化ê suí kap價值，堅持後生出世先hōo學講台語。Tī天龍國眷村出世ê囡仔beh講台語，ài有堅強ê意志抵擋四方射--來ê異樣眼光，kap厝邊頭尾sio比phīng，牛kap馬háu無仝聲。冊架仔三不五時出現台語文工具冊：《彙音寶鑑》、《福全台諺語典》、《台灣俗語辭典》……。信箱內面發現《掖種》，tsiah知影戶長儉腸neh肚tshuân sai-khia寄付台語社。Suà--落-來，郵差送來《台文通訊》、《台文BONG報》--lah。
單跤單手菜鳥仔老母規工leh舞連suà來報到ê兩个幼嬰，頭殼內té--ê lóng是「柴米油鹽醬醋茶」，tsia-ê ta̍p-ta̍p-tih-tih日常生活縛死一个人，可憐ê家庭主婦，無閒工mā無心情讀啥mih《台文通訊》、《台文BONG報》。看著查埔人下班tńg--來，大pān khiau跤lim茶研究台文，一腹肚ê欣羨、怨妒kap好奇。趁囡仔睏入眠，suà手提起來影看māi，羅馬字kap我無熟sāi，只好ná看ná臆。意思ke減讀走精，一點仔lóng無關係，台語是ē-tàng書寫ê一種語言，拍開目kheh人ê視野--looh。
夭壽佩服tsia-ê有眼光、有智慧、寂寞忍耐ē tiâu、為著台語文化奉獻心血、行leh上頭前開路ê前輩，無計較個人利益，發行台文雜誌。下勻仔tuè leh後壁，有ńg thang bih，就bē hiah-nī仔艱苦。台文種子無聲無sueh掖tī一粒愛台語ê心田內底，我暗中siàu想有一工，bē koh再用「『雞』卵散死」表示「一兩三四」，ē-hiáu用「m̄-thang」代替『母湯』，「kha-tshng」bē寫做『卡臣』。就án-ne，一个suí夢——雅正ê台文書寫，恬恬tī心房編織……。
Sio-bat——投稿《台文通訊BONG報》
1996年熱天，細漢後生國小出業，飼囡仔階段性任務暫時到一段落--ah。家庭主婦拍開門窗，金金看外口ê鳥隻，自由自在tī闊bóng-bóng ê天頂飛來飛去，想beh koh再踏入紅塵ê決心愈來愈強。天助自助，我tī教育邊仔墘khioh著io囝主動tàn掉14年ê教員飯碗。
後中年期查某重現江湖，趁錢以外，koh ē-sái做家己有興趣ê代誌，m̄-nā ē-sái增加生活ê質感，koh ē-tàng提高性命意義參價值感。掖tī心田ê台語文種子，暝日huā-huā滾。趁機會tuì特殊學校高職部考試徙去國小上班。就án-ne揣著khah濟機會參加無料ê台語研習，mā tháu腰肚仔錢報名台語社辦ê研習班、台語文學營……。講透機，ǹg望kap台語文tsiânn做tah-lia̍p ê朋友，自我挑戰，報名參加演講比賽。戶長聽著成績「2001年台北市語文競賽北區小學教師組閩南語演說第二名」，大醋桶隨tshia倒，酸kiù-kiù ê khuì口：「Hannh？像你tsit款台語，就得著演講比賽第二名！」老查某涼涼仔回喙：「好佳哉！你m̄是小學老師無資格參加，若準你有報名比賽，我就ke一名，變成第三名--ah。」厝內hit兩隻小犬聽kah beh笑koh m̄敢笑，表情夭壽趣味。
2017年12--月出刊ê《台文通訊BONG報》（第285期）tī「逐家來phò-tāu」專欄刊登〈乞食趕廟公〉。Tse是我第一擺tī《台文通訊BONG報》留--落-來ê文字跤印。Tsiok感心，tsiok感恩。時代變遷，徛蹛台北城，強勢語言「橫行霸道」 ，tī華語that倒街ê大環境，聽、講、讀kap寫幾若十年，完成一篇台語文章ài磨不止仔久ê時間，錯誤猶原bē少。Hainnh！加上tī學校上班，慣勢使用教育部公佈ê「臺灣閩南語推薦用字」，羅馬字khah少使用，進步真有限。古早人講「三日無liū，peh tsiūnn樹」，tsiok感謝專業編輯老師無棄嫌koh無惜時間，修改失誤ê所在，恩情永遠囥藏心肝底。
相隨——「阿却賞」台語繪本獎
有編輯老師免費指導、修改文章，tī台語文書寫路頂，勇敢向前行--去。Khioh著時間，就綿死綿爛一直寫。就án-ne，我tsit隻老龜母暝--時慢慢仔爬，日--時沓沓仔趖。「天道酬勤」，mā算是我好運到，《小隱士想beh有一間厝》得著「阿却賞」中高年級台語繪本獎。
美夢成真，夭壽歡喜。
一个浸踮兒童文學研究所超過十年ê人，出版繪本總算是有交代。Koh-khah樂暢--ê是，伊是台語文繪本，tse是兒童文學研究所tsiânn罕見ê成績。多謝《台文通訊BONG報》tshuā路，hōo我安安穩穩hua̍h出穩當ê跤步，徛tī「李江却台語文教基金會」巨人ê肩胛頭頂，畫出個人歷史性ê一撇，華語諺語『無心插柳，柳成蔭』。感謝再感謝，牽成我有機會為台文奉獻一絲絲仔khuì力。
致意kap祝福
台灣上有溫度ê oo-jí-sáng吳念真，一位真心守護、連結記持kap語言ê藝術實踐家。伊主持ê綠光劇團是全國上受歡迎ê戲劇團，「人間系列」連suà tsiok濟年，戲一推出，門票隨搶完。Tú開始，全劇使用台語，聽無台語ê觀眾bat吵beh退票。十幾年了後，已經有人開始感謝先覺ê堅持。是啊！台語八聲，幼路suí-tang-tang，聽入耳空內，偌爽你kám知？
語言講出喙，只是基本款。若準kan-na口傳，伊早慢也是ē斷根。新世紀新時代ê精神ài建立tī祖先沿路粒積傳--落-來ê文化頂頭，台文書寫傳承tsit塊土地多元文化，創新koh再發揚光大，tsiânn做lán台灣人共同ê價值。
一本雜誌tī短短ê時間內，tsiânn oh改變『積重難返』ê社會偏見。不而過，古諺講了好「草仔枝，mā ē kenn倒人」、「毛毛仔雨，落久塗也ē tâm」。每一期雜誌有一篇文章，有一段話，iah是一張影像、圖片ē-tàng促發lán對台語文化有khah濟ê討論kap想像。一期一期、一篇一篇、一段一段、一句一句suí-khuì ê台文；一張一張有意思ê圖片、一張一張有特色ê影像，粒積--起-來，就tsiânn做一首台文ê史詩，就tsiânn做一曲台文ê交響樂。
《台文通訊BONG報》30歲生日快樂！《台文通訊BONG報》食百二！
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
