作者：前衛出版社
長期參與台文運動，旅蹛加拿大，台語文學史代表性ê海外醫生作家陳雷（本名吳景裕），tī加拿大時間6/27暗時過身，hōo人m̄甘。
陳雷先生是台南麻豆人，因為爸母tī中國南京做生理，伊就tī南京出世，二戰過後tńg來台灣蹛台北，小學四年到高中lóng tī家族世居ê台南生活、成長，tsit段經驗kap台南母土ê歷史，後--來也tsiânn做伊台文創作、走揣認同ê重要底蒂kap主題。
伊考入台大醫學系，後--來出國去美國Michigan大學做實習醫生，koh去加拿大讀免疫學，去英國做博士後研究，最後tńg去加拿大做開業醫，是hit-tang-tsūn真有才調ê本土智識份子。
陳雷先生在醫學之外，對文學ê經營也真早。伊bat有華文詩kap散文出版，自1980年代開始台文創作，而且是以hit-tang-tsūn iáu是禁忌ê二二八事件做主題，1988年所出版ê《百家春》，是台灣頭一phō二二八事件ê長篇小說。後--來著作ê《阿春無罪》、《無情城市》、《永遠ê故鄉》、《鄉史補記》、《白色ê甘蔗園》等等，也lóng是台語文學史、台語小說必然ài提起ê經典。
除了小說，伊創作文類多元，筆力仝款深透，也有詩、散文、劇本、評論，thang講是全能型ê台文作家。運動方面，伊m̄-nā參與共同發起《台文通訊》tsit份重要ê海外台文刊物，對台灣島內ê台文時事kap相關活動、會議也tsiânn關心。
雖然伊長期無法度tńg來台灣，m̄-koh伊真gâu透過在地ê鄉里奇聞，來表現斯當時台灣故鄉ê情形，刺探白色恐怖ê政治kap社會現實，追問台灣人ê歷史記持kap認同。後--來，伊ê語言kap文學，開始走揣嘉南平原Siraya ê平埔族認同，自短篇ê〈鄉史補記〉擴寫做長篇ê台語大河小說《鄉史補記》，是台語文學「Siraya書寫」真重要ê代表作，也是探討台灣平埔住民按怎受歷來統治者kap漢人移民壓迫、同化，悲史hōo人消磨ê見證。
陳雷先生在生將伊ê散文《咱人ê視界：Hō͘少年朋友ê人生筆記》交hōo前衛出版，伊想beh透過束結、趣味ê短文，hōo學生、少年朋友、台文初學者有thang親近台語、學習台語，進一步思考台灣文化kap未來ê讀本，也是伊思念土地、人生回顧、思想精華ê文字素描。伊分享家己對祖國台灣、家鄉台南ê思念kap關心，對土地認同ê思考，對台灣話、台語文、台灣文化傳承發展ê論述kap建議，生活所看、所聽，koh有對哲學、政治、道德ê探討，ǹg望hōo後一代台灣少年朋友，thang有知bat自身ê眼界kap心界。Tse是一本貴重ê人生筆記，也是hōo台灣深重ê交代kap繼承。
Lán深深感謝、追念陳雷先生一生為台語文學拍拚、開創前路ê偉大貢獻。
