作者：黃偉嘉
教育部4--月公佈ê「以本土語言標注臺灣地名計畫（第2階段）」，lóng總7,207筆ê地號名。其中國家風景區ê部份，是當初發公文請交通部觀光局提供13位國家風景區ê「雙語詞彙」來增加本土語言ê講法。
Tsit幾十年來，地方為著beh發展觀光，tiānn-tiānn將lán ê傳統地號名烏白改，甚至用外國ê文化來替換，thang講是一種悲哀。譬如講，tī國家風景區提供ê名單內底，小琉球有一位『威尼斯沙灘』、北海岸有『櫻木花道』、綠島有『哈巴狗岩』kap『睡美人岩』，用跤頭趺想mā知影在地絕對m̄是án-ne叫。今仔日lán就先來看澎湖湖西鄉ê『摩西分海』。
湖西鄉奎壁山（Ku-piah-suann）山跤ê北寮（Pak-liâu）kap赤嶼（Tshiah-sū）是地形學所講ê「陸連島」（land-tied islands）。洘流（khó-lâu）ê時tsūn，ē出現一條「玄武岩」（basalt，澎湖人俗稱「烏石」）ê石頭仔路sio-thàng。Tsit位tī Google Maps有4.5粒星、16,300篇評論，可見是澎湖上kài出名ê景點之一，地位非常重要。
總--是，Google Maps頂寫ê名，是『奎壁山摩西分海』，是用以色列猶太人『摩西過紅海』ê傳說來號名。若到現場，tuì馬公（Má-king）出發一路看--著ê路牌仔，也lóng是tsit个名。甚至觀光局tī北寮所設ê遊客中心內底，也全部用『摩西分海』來寫tsit个景點ê名。若m̄是看著邊--a服sāi保安大帝ê保安宮tsiânn suí koh大間，真正ē hōo人叫是講：北寮人kám是信基督教khah濟？
在地人實在leh講--ê，是「赤嶼仔腰（Tshiah-sū-è-io）」，凡勢是kā石頭仔路看做是赤嶼ê腰帶，強調伊是赤嶼ê一部份，tse hām「陸連島」ê概念是sio-siāng--ê。比較--起-來，傳說中ê『摩西分海』m̄是「陸連島」，kap在地ê歷史文化無關係，名稱只是siânn人目睭ê步數niā-niā。
「赤嶼仔腰」ê名稱內底，有在地湖西腔ê台語特色——變調kap小稱詞。小稱詞就是「～仔」，優勢腔是講「-á」，但是湖西腔是「-è」。Tsit方面ē-sái參考《台文通訊BONG報》第347期，陳昭蓉ê〈阮澎湖ê腔口真特別〉。若用調值寫--起-來，是「tshiah51-su11-e33-io55」。
阮tsit擺特別附一張「赤嶼仔腰」ê相片hōo逐家看。後擺若去澎湖tshit-thô，ài叫伊正港ê名--őo！
當地人ê發音參考：
https://youtu.be/7YtVV0udpuQ?t=125
《台文通訊BONG報》第347期
陳昭蓉〈阮澎湖ê腔口真特別〉
https://www.youtube.com/watch?v=A8gCZ-WoctM
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
教育部4月公佈的「以本土語言標注臺灣地名計畫（第2階段）」，攏總7,207筆的地號名。其中國家風景區的部份，是當初發公文請交通部觀光局提供13位國家風景區的「雙語詞彙」來增加本土語言的講法。
這幾十年來，地方為著欲發展觀光，定定將咱的傳統地號名烏白改，甚至用外國的文化來替換，通講是一種悲哀。譬如講，佇國家風景區提供的名單內底，小琉球有一位『威尼斯沙灘』、北海岸有『櫻木花道』、綠島有『哈巴狗岩』佮『睡美人岩』，用跤頭趺想嘛知影在地絕對毋是按呢叫。今仔日咱就先來看澎湖湖西鄉的『摩西分海』。
湖西鄉奎壁山（Ku-piah-suann）山跤的北寮（Pak-liâu）佮赤嶼（Tshiah-sū）是地形學所講的「陸連島」（land-tied
islands）。洘流（khó-lâu）的時陣，會出現一條「玄武岩」（basalt，澎湖人俗稱「烏石」）的石頭仔路相迵。這位佇Google Maps有4.5粒星、16,300篇評論，可見是澎湖上蓋出名的景點之一，地位非常重要。
總是，Google Maps頂寫的名，是『奎壁山摩西分海』，是用以色列猶太人『摩西過紅海』的傳說來號名。若到現場，對馬公（Má-king）出發一路看著的路牌仔，也攏是這个名。甚至觀光局佇北寮所設的遊客中心內底，也全部用『摩西分海』來寫這个景點的名。若毋是看著邊仔服祀保安大帝的保安宮誠媠閣大間，真正會予人叫是講：北寮人敢是信基督教較濟？
在地人實在咧講的，是「赤嶼仔腰（Tshiah-sū-è-io）」，凡勢是共石頭仔路看做是赤嶼的腰帶，強調伊是赤嶼的一部份，這和「陸連島」的概念是相siāng的。比較起來，傳說中的『摩西分海』毋是「陸連島」，佮在地的歷史文化無關係，名稱只是唌人目睭的步數爾爾。
「赤嶼仔腰」的名稱內底，有在地湖西腔的台語特色——變調佮小稱詞。小稱詞就是「～仔」，優勢腔是講「-á」，但是湖西腔是「-è」。這方面會使參考《台文通訊BONG報》第347期，陳昭蓉的〈阮澎湖ê腔口真特別〉（https://www.youtube.com/watch?v=A8gCZ-WoctM）。若用調值寫起來，是「tshiah51-su11-e33-io55」。
阮這擺特別附一張「赤嶼仔腰」的相片予逐家看。後擺若去澎湖𨑨迌，愛叫伊正港的名喔！
當地人的發音參考：
https://youtu.be/7YtVV0udpuQ?t=125
---------------------
