主講／張雅淳、陳瀅安
記錄／吳宛霖
本文是張雅淳、陳瀅安tī 2023/7/12台語sa攏有講座演講ê摘要記錄。張雅淳是以月琴彈唱做基礎leh創作，〈開往花蓮的火車〉入選2019南面而歌，2020年發行頭一張專輯《我住在一個島上》。陳瀅安是當代舞創作kap表演者、「靚舞集Satsangdance」負責人。
台語sa攏有 - YouTube 頻道
台語sa攏有講座真歡喜邀請著兩位女性創作表演者，一位是月琴唸謠表演者張雅淳，另外一位是舞蹈表演者陳瀅安。Lán就來ná聽in ê演出，ná看in ê月琴kap舞蹈是beh按怎來結合。
張雅淳hām逐家分享伊創作kap彈月琴ê過程，伊tī khah早是讀電影--ê，畢業了後tsiah去學南管、唸歌，伊ê作品〈開往花蓮的火車〉有入選2019南面而歌，2020年發行頭一張專輯《我住在一個島上》。張雅淳sì-kè旅行、交朋友，因為伊本身tsiânn愛唱台灣民謠、歌仔戲，bat走去學日本沖繩ê三線琴。Hit時，伊bat懷疑講家己是按怎beh用日本樂器來唱台灣歌？後--來tsiah有前輩kā提醒ē-sái用月琴彈唱台灣歌。
就án-ne，張雅淳用月琴改編日本沖繩民謠〈指甲花〉、台灣民謠〈丟丟銅〉，寫自然、鄉土kap對性命ê愛，透過流浪走揣自我。〈開往花蓮的火車〉類似囡仔搖籃曲，表達坐火車ê時，hit款kánn-ná tī 媽媽ê腹肚內底、tsiok恬靜ê感覺。
2019年伊有機會hām楊秀卿老師交流、結緣，尾--à考tiâu文化部文化資產局重要傳統表演藝術傳習藝生，正式去楊秀卿老師厝--裡學師仔。Tsit時，張雅淳tsiah真正開始認真學台語文，熟sāi歌仔冊、台語文學kap唸歌ê趣味。伊ê心內mā沓沓仔teh思考，傳統ê技藝是beh按怎tsiah tuè ē著現代ê跤步？對未來創作ê方向，張雅淳認為唸歌mā ài tiānn-tiānn有新ê mi̍h件出--來，tsiah thang行出活路，bē受制限，繼續寫出lán家己ê心內話。
陳瀅安是師大美術系畢業，m̄-nā kah意畫圖，mā kah意tī舞台頂ê感覺。2007年，伊tī大學二年開始自學現代舞，後--來有機會去體驗五年專職舞者ê生活。2015年，離開舞團了後，伊開始獨立編排實驗性ê舞蹈，mā去社區活動中心做小型演出，參與民間舞蹈表演活動，經營「靚舞集Satsangdance」迷眾頁。
2019年，陳瀅安受著香港反送中運動ê影響，開始意識著台灣主體性ê重要，關心在地ê社會運動kap相關台灣議題ê演講，想beh重新來認bat、了解台灣ê歷史、過去kap未來。2020年，伊開始學習台語文，透過看展覽來走揣素材。2022年，台灣畫家陳植棋愛用ê紅色tsiânn做伊ê靈感，伊用紅布來編舞、用台語來紹介舞蹈ê內容、創作ê元素，koh用雙手畫出活跳ê圖像來記錄舞蹈。
2023年，張雅淳、陳瀅安兩人合作製作〈島嶼ê色緻kap Me-ló-tih 咱Sóa Kha步來走Chhōe〉舞蹈作品，演出有八成是用《我住在一個島上》tsit張專輯內底ê音樂，koh有融合南管ê元素，用台灣味現代舞結合月琴民謠，舞蹈ê編排mā kā畫家ê藝術、台灣ê元素hē--入-去。
#台語sa攏有講座 專欄，本文使用教育部推薦漢字kap台羅。
#台文通訊BONG報 353期，2023年8月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
