Ke-lō͘-piⁿ ê Tāi-chì
作者：陳 雷
舊年8--月tńg去台灣，無意中遇著幾項代誌，tī台灣ê街仔路邊，大概tiāⁿ-tiāⁿ看ē著，在地人慣勢無奇怪。M̄-kú對我離開台灣十冬拄tńg--來ê人客，kài成是特別安排，專工表演ê精彩劇本。
Kū-nî 8--goe̍h tńg-khì Tâi-oân, bô-ì-tiong gū-tio̍h kúi hāng tāi-chì, tī Tâi-oân ê ke-á-lō͘-piⁿ, tāi-khài tiāⁿ-tiāⁿ khòaⁿ ē tio̍h, chāi-tē-lâng koàn-sì bô kî-koài. M̄-kú tùi góa lī-khui Tâi-oân 10 tang tú tńg--lâi ê lâng-kheh, kài sêng sī te̍k-pia̍t an-pâi ê cheng-chhái ê ke̍k-pún.
Chit日，台北ê朋友參我去路邊店--裡買咖啡。買好離開ê時，朋友無細膩甌仔chhia--倒，咖啡潑一塗跤。去kā店員會失禮，店員應無要緊，liam-mi阮ē清。朋友堅持借塗跤布先去拭，拭好beh離開ê時，店員ùi店內出--來，提一甌燒咖啡hō͘--伊，講：「歹勢，hō͘你手燙--著，koh拭塗跤。」Ē 記得hit間店大概叫做Louisa Coffee？我m̄知hit个店員ê名。
Chit ji̍t, Tâi-pak ê pêng-iú chham góa khì lō͘-piⁿ tiàm--lih bé ka-pi. Bé hó lī-khui ê sî, pêng-iú bô-sè-jī au-á chhia--tó, ka-pi phoah chi̍t thô͘-kha. Khì kā tiàm-oân hōe-sit-lé, tiàm-oân ìn bô iàu-kín, liam-mi goán ē chheng. Pêng-iú kian-chhî chioh thô͘-kha-pò͘ seng khì chhit, chhit hó lī-khui ê sî, tiàm-oân ùi tiàm-lāi chhut--lâi, the̍h 1 au sio ka-pi hō͘--i, kóng: “Pháiⁿ-sè, hō͘ lí chhiú thǹg--tio̍h, koh chhit thô͘-kha.” Ē-kì-tit hit keng tiàm tāi-khài kiò-chò Louisa Coffee? Góa m̄ chai hit ê tiàm-oân ê miâ.
Ùi台南小東路去成大台文所無真遠，m̄-kú需要坐車。路邊cha̍h計程--ê，無人beh停，lóng tio̍h-ài電話中先叫，約好chiah beh來載。我拄到台灣，bē-hiáu用手機叫車。Chit時落雨cha̍h無車，拄好tī小東路口一間賣房地產公司ê辦公室外口。無法度，入去拜託辦公室ê小姐。小姐好禮請阮坐，koh泡茶請阮lim。隨就khà電話去tha-khú-sih公司叫車，講好十分鐘就ē來。
Ùi Tâi-lâm Sió-tang-lō͘ khì Sêng-tāi Tâi-bûn-só͘ bô chin hn̄g, m̄-kú su-iàu chē-chhia. Lō͘-piⁿ cha̍h kè-thêng--ê, bô lâng beh thêng, lóng tio̍h-ài tiān-ōe-tiong seng kiò, iok hó chiah beh lâi chài. Góa tú kàu Tâi-oân, bē-hiáu iōng chhiú-ki kiò chhia. Chit-sî lo̍h-hō͘ cha̍h bô chhia. Tú-hó tī Sió-tang-lō͘-kháu 1 keng bē pâng-tē-sán kong-si ê pān-kong-sek gōa-kháu. Bô-hoat-tō͘, ji̍p-khì pài-thok pān-kong-sek ê sió-chiá. Sió-chiá hó-lé chhiáⁿ goán chē, koh phàu tê chhiáⁿ goán lim. Sûi tō khà tiān-ōe khì tha-khú-sih kong-si kiò chhia, kóng hó 10 hun-cheng tō ē lâi.
時間beh到，小姐chhōa阮行去隔壁街約好ê地點等車。攑雨傘替阮cha̍h雨，等到車來hō͘阮入去車內坐，koh特別hoan咐ùn-chiàng，kā伊講成大佗一个校園、佗一搭落車。
Sî-kan beh kàu, sió-chiá chhōa goán kiâⁿ khì keh-piah ke iok hó ê tē-tiám tán chhia. Gia̍h hō͘-sòaⁿ thè goán cha̍h hō͘, tán kàu chhia lâi hō͘ goán ji̍p-khì chhia-lāi chē, koh te̍k-pia̍t hoan-hù ùn-chiàng, kā i kóng Sêng-tāi tó 1 ê hāu-hn̂g, tó 1 tah lo̍h-chhia.
過幾工，仝款問題koh去拜託hit位小姐。原在親親切切請阮坐、lim茶，替阮叫車，chhōa阮去坐車。Koh hoan咐，後擺若有需要，koh去揣--伊，m̄免細膩。
Kòe kúi kang, kāng-khoán būn-tê koh khì pài-thok hit ūi sió-chiá. Goân-chāi chhin-chhin- chhiat-chhiat chhiáⁿ goán chē, lim tê, thè goán kiò chhia, chhōa goán khì chē chhia. Koh hoan-hù, āu-pái nā ū su-iàu, koh khì chhōe--i, m̄-bián sè-jī.
Che m̄是特別安排hō͘人客看ê劇本。我想，單單tī人人有安全感，互相信任、尊敬ê社會，chiah ē來自然發生。獨裁、政治迫害ê國家無chit款代誌--lah。
Che m̄ sī te̍k-pia̍t an-pâi hō͘ lâng-kheh khòaⁿ ê ke̍k-pún. Góa siūⁿ, tan-tan tī lâng-lâng ū an-choân-kám, hō͘-siong sìn-jīm, chun-kèng ê siā-hōe, chiah ē chū-jiân hoat-seng. To̍k-chhâi, chèng-tī pek-hāi ê kok-ka bô chit khoán tāi-chì--lah.
