作者：黃偉嘉
若坐火車tī台南落車，tuì車頭直直行中山路，就ē拄著一个圓環仔。Tsit个圓環仔不止仔大，有七條街仔路到tsia sio-kap，算是台南府城ê正中心。而且伊ê歷史意義也真豐富，國家臺灣文學館、臺南市美術館、五層樓仔（林百貨）lóng kheh tī tsia。老輩ê台南人，lóng叫tsia是「石像」慣勢。
日本時代大正年間tī tsia起造圓環仔，號做「大正公園」，內底有總督「兒玉源太郎」ê像，tsua̋n hōo台南人稱做「石像」。
戰後，圓環仔改名「民生綠園」。為著記念二二八事件中受著牽連，tī tsia hōo中國軍隊銃殺ê湯德章律師，1997年正式改名「湯德章紀念公園」。今年3--月，台南市政府宣佈beh推動將中正路頭ê 170公尺（湯德章紀念公園到忠義路）改名「湯德章大道」，也tī文學館先啟用一塊「湯德章大道1號」ê門牌仔，英文照台羅翻做「Thng Tik-tsiong Blvd.」。
話講倒tńg--來。日本時代結束了後，兒玉ê石像就無--去--ah。2015年，tī一个日本舊宿舍ê下跤，竟然揣著消失半世紀ê石像，也hōo台南府城增加一層傳奇故事。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
若坐火車佇臺南落車，對車頭直直行中山路，就會拄著一个圓環仔。這个圓環仔不止仔大，有七條街仔路到遮相敆，算是臺南府城的正中心。而且伊的歷史意義也真豐富，國家臺灣文學館、臺南市美術館、五層樓仔（林百貨）攏𤲍佇遮。老輩的臺南人，攏叫遮是「石像」慣勢。
日本時代大正年間佇遮起造圓環仔，號做「大正公園」，內底有總督「兒玉源太郎」的像，就按呢予臺南人稱做「石像」。
戰後，圓環仔改名「民生綠園」。為著紀念二二八事件中受著牽連，佇遮予中國軍隊銃殺的湯德章律師，1997年正式改名「湯德章紀念公園」。今年3月，臺南市政府宣佈欲推動將中正路頭的170公尺（湯德章紀念公園到忠義路）改名「湯德章大道」，也佇文學館先啟用一塊「湯德章大道1號」的門牌仔，英文照臺羅翻做「Thng Tik-tsiong Blvd.」。
話講倒轉來。日本時代結束了後，兒玉的石像就無去矣。2015年，佇一个日本舊宿舍的下跤，竟然揣著消失半世紀的石像，也予臺南府城增加一層傳奇故事。
---------------------
