主講／陳豐惠
記錄／田永承
李江却台語文教基金會tī 1997年創立到tann，出盡心血tshui-sak台語文。除了通人知ê《台文通訊BONG報》，koh有1998年就創辦、鼓勵創作優質台文詩、小說、劇本ê阿却賞。阿却賞ê獎勵初初m̄是針對繪本，因為tsit-má有愈來愈濟有母語意識ê家庭，親像台語親子共學團，ǹg望囡仔ē-tàng有一个全台語ê環境。M̄-koh少年爸母家己ê母語能力無才調經營，少年爸母若beh hōo囡仔學母語顛倒koh ài拜託in ê爸母kap家己ê孫講母語。市面上koh無夠額ê台文繪本thang輔助hōo囡仔浸tī母語內底，為著滿足母語家庭ê需求，tsiah tī 2015年增加繪本創作ê項目，kā社會大眾徵求好故事。Mā希望透過出類koh趣味ê繪本，hōo大人、囡仔lóng對台語文作品有趣味。
雖然理想真好，但是實際開始做繪本ê時tsūn suah拄著真濟挑戰。基金會徵稿kan-tann收繪本故事ê文字，繪本ê靈魂——古錐ê圖，tio̍h-ài另外揣人畫。基金會ài kap畫圖者、作者開會討論畫圖風格、分鏡。故事ê作者leh寫故事ê時tsūn mā無一定ē思考文字相對ê畫面beh按怎呈現，或者是講一頁圖beh配偌濟文字、文字beh囥佗一爿，tse lóng ài kap作者、畫圖者溝通。繪本ê內容若是歷史故事，親像阿却賞繪本之一ê《高雄二二八》，koh ài khai時間研究當時人ê穿插kap街道ê形。
除了圖以外，文字ê處理mā是一个問題。基金會一直leh tshui-sak漢羅合用ê台語文體，m̄-koh一開始設想大眾普遍khah m̄ bat羅馬字，所以頭前出版ê幾本繪本，漢字ê比例khah kuân。後--來考慮著漢羅用字ê標準化kap一致化，落尾繪本tsiah-koh調整做tuè雜誌ê用字，羅馬字ê比例就變khah濟。但是m̄管是漢字khah濟iah是羅馬字khah濟ê繪本，下跤lóng ē有全羅馬字對照，hōo想beh學台語、但是漢字無hiah熟sāi ê台灣人，iah是講對台語有興趣ê外國人，lóng ē-tàng知影漢字ê讀音。甚至tī繪本《暗mi-moo》內底，koh有英文翻譯。若準講有外國人beh學台語，檢采ē-tàng tsiânn做in學習ê資源。為著beh kā英語翻譯處理好勢，koh有請英語母語者來tàu修改，其實khai真濟時間，文字ê處理真無間單。
到tann tio̍h阿却賞、已經出版ê作品有六本，其中《Tsiâ偷食菜頭粿》、《來𨑨迌》，分別是hōo囡仔熟sāi台灣傳統食si̍t文化kap蟲thuā台語稱呼ê故事，koh有為著hōo囡仔熟sāi台灣歷史悲劇ê《高雄二二八》，逐本lóng是優秀ê好作品。Tsia-ê作品真受消費者歡迎，甚至koh有劇團真kah意tsia-ê繪本，有意beh提繪本來做舞台劇。Tse是起造台語囡仔文學ê好開始，基金會希望未來有滿腹創意ê少年人ē-tàng來投稿，hōo阿却賞ê作品主題ē-tàng愈來愈多元。Mā希望未來ē-tàng kā繪本分年歲分詳細，分做有適合hōo紅嬰仔看--ê，iah是hōo拄leh學講話ê囡仔讀--ê等等。另外mā希望增加徵求針對國中生ê文章，hōo阿却賞愈來愈豐富。
上尾，基金會期待未來有一工，繪本lóng m̄免koh另外kap音檔。雖然kap音檔ē-tàng hōo想beh學台文ê消費者真方便學，m̄-koh án-ne讀者就ē失去家己享受文字氣味ê機會，而且有tang時仔配音無一定ē kap作者想beh表達--ê仝款。又koh，因為tsit-má ê錄音檔無親像進前是kap CD，lóng是tī冊--裡附QR code ，án-ne就ē有「有人掃QR code suah無beh買」ê風險。總--是，為著台語文，為著hōo逐家有優質ê作品thang讀，mā希望透過繪本ē-tàng hōo社會大眾愈來愈知影認bat台文讀寫，漸漸仔hōo台文ê書寫有共識。阿却賞ē繼續獎勵好故事創作，mā邀請逐家投稿，同齊為台語文努力。
（主講者陳豐惠是李江却台語文教基金會執行長，tsit篇是2022年5月15義光教會松年團契專講ê文字記錄。）
