作者：黃偉嘉
教育部《臺灣閩南語常用詞辭典》收錄一个阿里山火車ê站名——「屏遮那」。Tsit个地號名幾若擺引起台語學界ê討論，主要有以下ê原因：
一、辭典記ê讀音「Hè-sen-ná」，hām漢字鬥bē起--來。
二、無論是看漢字iah是聽讀音，lóng m̄知意思。
三、無照台羅規範拼做sian，顛倒是寫做sen。
因為漢字無法度精確表達實際ê發音。對lán地理研究者來講，若beh調查一个地號名，上要緊--ê就是先請教在地老輩正確發音。總--是，拄著「屏遮那」就無法度--ah！雖然鐵路有設站，但是sionn過iap-thiap，並無人家厝仔thang問。而且附近自八八水災以後車路就崩--去，火車已經無行到tsit tah tsiok久--ah，原底ê車頭也hōo施工單位當做倉庫leh積mi̍h件。
佳哉，研究室自2021年執行文化部國家鐵道博物館籌備處「臺灣鐵道路線站名沿革調查」計畫，有才調為著tsit站特別khai khah濟ê時間去稽考。團隊tuì蹛tī嘉義市ê退休火車司機、問到竹崎鄉朴子埔（Phuh-á-poo）kám仔店頭家娘（伊過身ê ta-kuann以早是「屏遮那」ê站長）、也tsiōnn阿里山實地請教十字村講台語ê客人居民，逐家ê發音lóng一致：he11 sen33 na51 1！若看文獻，2018年bat發生一層賊仔tī鐵路工地偷提mi̍h件ê代誌，報紙將地點記做「阿里山鄉十字村二萬坪下蟬仔」，tsit个「下蟬仔」就是he11 sen33 na51，算是khah倚音ê一種漢字寫法。
Suà--落-來beh了解--ê是：he11 sen33 na51是啥mih意思？請教在地Tsou（『鄒』）族，in講是當地早期有生kài濟ê「hessi（山楂）」，加上接尾辭「-ana」表示「所在」，鬥--起-來意思就是「有山楂（sian-tsa）ê所在」。接尾辭（suffix）「-an、-ana」ê地號名tī南島語系tiānn-tiānn看--著，台灣有bē少原住民族ê地號名，比如「唭里岸（Kî-lí-gān）」、「大里簡（Tāi-lí-kán）」、『德恩亞納』，後壁lóng有tsit个接尾辭。
原來「屏遮那」是án-ne來--ê：íng過tsit塊山坪有tsiok濟山楂，就hōo Tsou族kā號做Hessiana。後--來日本人聽--著，就用日文假名寫做ヘイシヤナ，而且選幾个仝音ê漢字「平遮那」做火車站名。對日本話來講，漢字、讀音是鬥ē bā--ê。當地代先漢字是tuè日本人寫--ê，1965年省政府tsiah改字做「屏遮那」，但是唸iáu-koh照Tsou族ê話讀做he11 sen33 na51，漢字hām讀音就án-ne鬥bē起--來--ah。
接suà來討論羅馬字按怎標注khah好。代先，lán tio̍h-ài考慮kám真正需要特別創一个「sen」ê拼寫法？看--起-來應該是m̄免。因為無論Tsou族ê話iah是日本話，原底lóng有kah一个「i」ê音，凡勢百年前ê台語mā讀做「sian」，是khah uànn口語tsiah tsiânn做「sen」。Án-ne kā看，iáu是照台羅ê規則，寫做「sian」khah好；又koh台語有聲調，lán就照「反推本調」ê方式，將三个字本調定做：第七調（轉第三調）、第一調（轉第七調）、第二調。
最後，地號名頭字lán慣勢大寫。Án-ne生，「Hē-sian-ná」ê標注就完成--ah！
1.編按：羅馬字正手爿下跤細細字ê阿拉伯數字表示tsit个音節實際聽--起-來ê kuân低，5上kuân、1上低。11表示低平、33表示中平、51表示高降。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
教育部《臺灣閩南語常用詞辭典》收錄一个阿里山火車的站名——「屏遮那」。這个地號名幾若擺引起臺語學界的討論，主要有以下的原因：
一、辭典記的讀音「Hè-sen-ná」，和漢字鬥袂起來。
二、無論是看漢字抑是聽讀音，攏毋知意思。
三、無照臺羅規範拼做sian，顛倒是寫做sen。
因為漢字無法度精確表達實際的發音。對咱地理研究者來講，若欲調查一个地號名，上要緊的就是先請教在地老輩正確發音。總是，拄著「屏遮那」就無法度矣！雖然鐵路有設站，但是傷過揜貼，並無人家厝仔通問。而且附近自八八水災以後車路就崩去，火車已經無行到這搭足久矣，原底的車頭也予施工單位當做倉庫咧積物件。
佳哉，研究室自2021年執行文化部國家鐵道博物館籌備處「臺灣鐵道路線站名沿革調查」計畫，有才調為著這站特別開較濟的時間去稽考。團隊對蹛佇嘉義市的退休火車司機、問到竹崎鄉朴子埔（Phuh-á-poo）𥴊仔店頭家娘（伊過身的大官〈ta-kuann〉以早是「屏遮那」的站長）、也上阿里山實地請教十字村講臺語的客人居民，逐家的發音攏一致：he11 sen33 na51！若看文獻，2018年捌發生一層賊仔佇鐵路工地偷提物件的代誌，報紙將地點記做「阿里山鄉十字村二萬坪下蟬仔」，這个「下蟬仔」就是he11 sen33 na51，算是較倚音的一種漢字寫法。
紲落來欲了解的是：he11 sen33 na51是啥物意思？請教在地鄒族，𪜶講是當地早期有生蓋濟的「hessi（山楂）」，加上接尾辭「-ana」表示「所在」，鬥起來意思就是「有山楂的所在」。接尾辭（suffix）「-an、-ana」的地號名佇南島語系定定看著，台灣有袂少原住民族的地號名，比如「唭里岸（Kî-lí-gān）」、「大里簡（Tāi-lí-kán）」、『德恩亞納』，後壁攏有這个接尾辭。
原來「屏遮那」是按呢來的：往過這塊山坪有足濟山楂，就予鄒族共做號Hessiana。後來日本人聽著，就用日文假名寫做ヘイシヤナ，而且選幾个仝音的漢字「平遮那」做火車站名。對日本話來講，漢字、讀音是鬥會峇的。當地代先漢字是綴日本人寫的，1965年省政府才改字做「屏遮那」，但是唸猶閣照鄒族的話讀做he11 sen33 na51，漢字和讀音就按呢鬥袂起來矣。
接紲來討論羅馬字按怎標注較好。代先，咱著愛考慮敢真正需要特別創一个「sen」的拼寫法？看起來應該是毋免。因為無論鄒族的話抑是日本話，原底攏有佮一个「i」的音，凡勢百年前的臺語嘛讀做「sian」，是較晏口語才成做「sen」。按呢共看，猶是照臺羅的規則，寫做「sian」較好；又閣臺語有聲調，咱就照「反推本調」的方式，將三个字本調定做：第七調（轉第三調）、第一調（轉第七調）、第二調。
最後，地號名頭字咱慣勢大寫。按呢生，「Hē-sian-ná」的標注就完成矣！
---------------------
