主講／郭華仁
記錄／黃悅綺
編按：本文是2020/7/30棲地復育台語講座「基改食品對身體佮環境ê影響」講座摘要記錄，講者郭華仁是台大農藝學系ê教授。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家tī逐個月第三禮拜五暗時七點到九點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
全世界ê「基因改造食品」（genetically modified food）99％是大豆、番麥、稻仔、棉仔tsit四項。親像美國種作ê方式kap台灣無仝。若是有基因改造ê植物，透過基因轉殖、基因編輯ê技術kā抗除草劑、刣蟲ê基因種tī植物內底，美國農夫掖種、掖肥、除草iah是除蟲lóng ē-sái駛飛行機完成大部份ê khang-khuè。
「嘉磷塞（Ka-lîn-sài）」是一種作穡人tiānn-tiānn用ê除草劑，因為基因改造--過ê植物對tsit款除草劑並無反應，ē繼續大漢，m̄-koh蟲若食--著ē隨死--去。Tuì 1996年美國開始種基改作物，除草劑使用ê量愈來愈濟，抗除草劑ê「超級雜草」就án-ne ná來ná大欉，刺莧（tshì-hīng）ê骨ē-tàng大到成年人ê大頭拇kap kí-tsáinn sio拄hiah-nī粗。嘉磷塞使用過度，到尾m̄-nā影響ia̍h-á、蜂，甚至是影響規个生態。出產基因改造植物kap除草劑ê大公司獨占農用資材kap基改作物ê種子，農民bē-sái留種子，收成了後，種子lóng ài還hōo大公司，致使農民受著迫害，愈種愈散赤。
M̄-nā是植物niā-niā，mā有人kā基因改造ê技術用tī動物身--上。2015年為著beh hōo豬肉ê產量koh-khah好，就去改造豬仔體內一種號做MSTN、ē-tàng控制筋肉生長ê基因，hōo豬ê跤腿生khah濟肉，m̄-koh豬ē一直大隻--起-來。豬仔因為跤腿siunn過大肢，自án-ne徛bē tsāi，mā ē khah oh生囝、豬仔囝khah早死。2017年為著無愛hōo牛sio-tak，致使死傷影響產量，研究出基因改造--過ê「無角牛」，因為副作用所致，無角牛m̄知按怎，生出兩排目睫毛。後--來有人發現豬仔若是kā飼基改飼料，致病、tio̍h胃炎ê比率比食非基改飼料--ê kuân三、四倍；若是羊母kā飼基因改造ê黃豆，m̄-nā羊奶ê卵白質kap脂肪ē khah tsiánn，免疫球卵白mā ē khah薄。Tī毒理ê試驗mā意外來發現，白niáu鼠若是khè著基改番麥kap嘉磷塞，引起器官毒性ê機率khah kuân，致使白niáu鼠ê癌瘤出現了khah緊、khah濟。
你若問講「基改食品kám有安全？」，其實全世界ê學者到tann iáu無共識。
台灣家己無leh種基改作物，m̄-koh有開放部份進口。若準是進口黃豆ê品質、品種kap lán台灣家己生產--ê就無仝，黃豆ê產品有濟濟項，原本是tuì「統豆」（iáu未揀--過ê豆仔）內底揀品質khah好--ê，提來加工製造豆腐、豆奶、豆花等等，其他--ê提去tsuànn油，kā豆phoh提來做飼料。非基改ê食品級黃豆有生產履歷，卵白質mā khah濟；若是飼料級ê基改黃豆，因為種作ê方式無仝，除草劑ē留小可仔tī黃豆面頂。另外，基改黃豆進口ê時tsūn，因為船肚真溼熱，ē落khah濟殺菌ê藥劑來防止黃豆生菇。網路面頂有流傳，ē-sái看黃豆「肚臍」（編按：豆菜puh-ínn ê所在）ê色來判斷是m̄是基改--ê，tsit个方法無法度100％準確，m̄-koh，若是選用台灣生產ê黃豆，無論「肚臍」啥mih色lóng一定是非基改--ê。
台灣tī 2014年kā基改食品寫入法律規範，若是有用著基因改造食品做原料，就ài標示「基因改造」iah是「含基因改造」ê字樣。Lán去賣場買mi̍h件ê時tsūn，ē-sái斟酌看頂kuân ê標示，iah是優先選用lán台灣家己種ê作物。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
