《用台語走揣自我，
用台文起造BL青春世界》
主講／李鈺凰 記錄／張偉萍
本文是2025/7/9講座ê摘要記錄，主講人李鈺凰是台語BL小說《相片款的紺色時際》ê作者。
今仔日ê講者是台文BL小說ê作者李鈺凰，伊ê小說m̄-nā是台文有聲冊，今年koh用讀劇會ê形式發表，受著觀眾真熱烈ê回應！Tsit位iáu未30歲ê少年家，原本是讀電影出業--ê，bat做過YouTuber、拍過短片，tsit-má是影片剪接ê自由創作者。今仔日伊beh來分享伊是按怎kā台語khioh--tńg-來，iáu-koh有創作BL小說《相片款的紺色時際》ê過程，又koh是按怎用台語去思考小說內底ê人物應該ài有ê角色設定、講話khuì口、敘事鋪排、情節轉換等等。
Uì拍片到台文創作
Tī寫小說進前，李鈺凰其實是做影片khah濟。因為自國小就對影片真有興趣，李鈺凰開始揣網路自學，學鉸影片，到高中開始拍影片，大學自然就讀電影相關ê科系，拍片到tann有一khí年--ah。畢業了後，創作ê影片雖然有bē-bái ê流量成績，伊suah開始揣無靈感，開始想「啥mih款ê作品ē-tàng代表我？」，思考了後ê答案竟然是「台語」！
Tī高雄楠仔坑出世ê李鈺凰，雖bóng tī台語箍仔大漢，m̄-koh，序大人並無積極ê台語意識，所以，伊kan-na ē-hiáu聽。2019年阿華師hit支台語失落ê影片，hōo伊覺醒，反省家己kah台語ê感情tsiah-nī仔深，suah tiānn-tiānn講kah khê-khê，無法度順利講出喙，自hit-tsūn開始，李鈺凰決心beh kā台語學--tńg-來，mā開始學寫台文，想beh用台文創作。
李鈺凰開始確定家己beh用台文創作了後，發現台文創作ê題材m̄是siàu念阿公阿媽、以早ê庄跤生活，就是khah嚴肅ê政治事件、歷史思考，感覺hia--ê lóng kài成是課本，m̄是uì現此時in少年人ê角度出發ê創作。伊想beh寫--ê是輕鬆浪漫ê台文故事，規氣用台語來設定規篇故事，用現代少年學生做主角，而且伊想beh寫ê題材是台文作品khah罕得看--著ê「BL」。
BL拄著台語
BL簡單來講，就是「Boy’s Love」1，一種ná親像少女bàng-gà ê戀愛偶像劇，只是少女換做查埔niâ。Tsit種小說畫面suí、故事浪漫、主角飄撇，注心tī-leh談戀愛，呈現出一个自由ê Utopia（『烏托邦』）。Tsit種類型ê小說若是用全台文來描寫，m̄知是啥mih款ê光景？就是因為有tsit款hònn玄，hōo自細漢激骨ê李鈺凰規心致意liâu入去台文BL小說創作ê世界。
李鈺凰tī大學讀電影ê時接觸著BL世界，m̄-koh伊對內底khah重鹹ê描寫無啥滿意，伊想beh改變tsit種注重感官ê敘事風格，轉做戀愛ê心理變化，創作單純談戀愛、無肉體關係ê「清水BL」故事，寫出逐家m̄ bat看--過ê台文創作。伊想著日本文學內底有一句真出名ê形容：「Ing暗ê月娘真suí！」Uì tsit句開始有靈感，想beh寫出像án-ne，雙方有意愛，suah是kan-na台語tsiah有法度感應ê形容，規个故事就uì tsit句改寫：「月光曝久mā ē燒熱！」沓沓仔展開。
方向確定了後，李鈺凰就uì家己高中營隊ê經驗開始，寫少年囡仔ê青春友情、成長ê茫渺、感情ê曖昧，沿路寫主角tī營隊ê成長kah感情變化，沿路調整家己寫作ê手路。伊頭起先tsiok貪心--ê，想beh kā所有ê營隊經驗內底感受--著--ê，lóng總囥--入-去，初初真滿意家己ê作品，去參加比賽，suah無tio̍h獎，伊隨反省調整，規氣注心寫談戀愛ê場景kah雙方ê心情變化。
李鈺凰為著beh寫兩人頭一擺sio唚ê氣氛，koh揣著lán台灣特有ê熱天點心「檸檬ò-giô」，借檸檬ò-giô酸bui仔酸bui ê滋味，來象徵戀愛微微仔酸、淡薄仔甜hit款曖昧ê變化。伊koh-khah大ê野心就是希望tsit个意象ē-sái親像華語文學內底講著老爸ê愛，就ē想著柑仔hit款，hōo人記tiâu-tiâu！
Hōo人安心ê台文創作
除了注心寫beh hōo讀者心肝底ngiau-ngiau ê BL戀愛情節以外，因為是uì家己ê高中生活經驗開始，tio̍h-ài直直翻頭去回想、去澄清，寫到尾--à，李鈺凰mā發現講，寫作ài誠實面對家己，是一種自我療治，koh一擺面對考試ê束縛、面對厝內人ê期待，伊tsit擺借作品內底主角ê對照，好好仔接受無hiah-nī仔完美ê家己，而且koh智覺著「無一百分mā是有人kah意，上無hit个人是我家己！」
M̄-nā tuè時節變化用無仝mi̍h件、色水去記錄苦澀ê青春記持、甜but-but ê戀愛，李鈺凰mā趁tsit个機會kā家己故鄉特有ê地理景致「後勁溪」（Āu-ngē-khe），koh有親像「東北季風是扁風」等等，故鄉特殊ê腔口kah語詞khioh--tńg-來，寫入作品，留下心愛故鄉ê形影。伊講，tse是因為台語ê聲hōo人感覺安心，tsiah有法度聽著家己心底ê聲。
未來ǹg望
有人可能ē感覺用台語來寫BL故事，看--起-來kám bē礙虐？M̄-koh，李鈺凰講，新ê台文創作題材，總--是ài有人開始做，開始有人做，未來就有機會tsiânn做sù常ê代誌，就親像lán mā m̄ bat想--過，台語歌有一工ē hông唱kah「tsiok芳、tsiok芳」2hia有法國芳味--啊？
最後，李鈺凰希望tsit本台文BL小說ē-sái引tshuā逐家，除了看了歡喜、看了爽以外，iáu-koh ē-sái hōo逐家有溫暖、有力量。目前《相片款的紺色時際》tng-leh進行改編，希望未來有thang看著戲劇ê演出。伊mā希望台文創作像日本bàng-gà仝款，出現各種想像kah實驗ê題材，期待有熱血戰鬥ê場面，mā有青春中二病ê描寫，真正行到「台語寫萬項」ê理想世界，he tsiah是lán自由ê Utopia！
1 編註：查埔kah查埔戀愛ê故事。
2 編註：歌手李竺芯〈足芳足芳〉tsit首歌內底ê歌詞（tsia有調整漢羅用字），歌曲ê特色是kā台語唱kah有法語ê氣味。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
