作者：蕭聿萱
夢，真正是一个tsiok神奇ê mi̍h件；bat聽講人tī眠夢ê時tsūn，魂魄ē暫時離開你ê身軀，你所夢--著--ê其實就是你ê魂魄拄--著ê代誌；mā有人講ē眠夢kan-na是你「日有所思，夜有所夢」niā-niā；無論原因到底是佗一種，tse lóng m̄是我有能力研究ê範圍，所以我當然m̄是beh討論tsia--ê。
像阮媽媽就認為，夢是一種預言，是神明kah祖先想beh提醒伊ài注意啥mih代誌；所以阮兜有幾若本kah「解夢」有關係ê冊，媽媽有時tsūn睏醒ê頭一項代誌就是掀開tsia-ê冊來看，ná看ná lik目眉，看著伊án-ne就知影伊一定是koh夢著啥奇奇怪怪ê mi̍h件。
是講媽媽伊有一个tsiok神奇ê講法，就是講若是夢著khah無好ê夢，顛倒ē發生好代誌。
「Án-ne，若是我夢著美夢--leh？」
「若是美夢，就bē去查解夢ê冊--lah！」因為你睏醒了後，kan-na ē記得hit个tsiok爽快ê khi-móo-tsih，根本bē想著ài去看冊。
若是án-ne想，人生其實就是一直揣理由來hōo家己過了khah sù-sī。
細漢ê時，我bat有一擺夢著阿公過身，hit當時阮阿公koh leh蹛院，所以我是驚醒--ê；雖然有意識著tse lóng是夢，我iáu是趕緊kā媽媽講，就是tsit个時tsūn，媽媽kā我講「夢lóng是顛倒píng--ê」，而且伊mā tshuā我去病院，看阿公koh好好仔tī hia食飯，我就安心--ah。
Iáu-m̄-koh tsit个安心，tsiah維持五工niā-niā。
過五工，阮爸爸媽媽就tī半暝接著病危通知，隔tńg工，阿公就tńg--去--ah。
Hit擺了後，若是夢著有人死--去，我就ē緊張kah胃疼koh無法度安心落眠；m̄-koh我掀開阮兜hia-ê「解夢大全」，lóng講夢著有人死--去是好代誌，ē有錢財入--來，雖然一直到tsit-má我iáu m̄知影錢財tī佗位--lah。
Án-ne講--來，到底是夢著美夢khah好，iah是惡夢khah好？
我kah阮小妹tiānn-tiānn án-ne講sńg笑：「你就好好仔睏，夢內底啥mi̍h lóng有。」
是--lah，好--ê、bái--ê，夢內底lóng總有；若無，至少你leh睏ê時tsūn，就ē-sái暫時放sak現實生活中hit寡ak-tsak ê代誌。
Iáu-m̄-koh，hia-ê美夢mā無一定永遠是美夢。
就tī舊年年底，我夢著我小學ê代誌。
我kah小學ê同學做伙leh sńg，tsiok歡喜--ê，而且逐家lóng是我記憶中，12歲ê面容，包括我家己mā是；sńg到一半，我雄雄發現tse一切lóng是我leh眠夢，我就開始哭，12歲ê in就圍tī我ê身軀邊kā我安慰、kā我惜惜。In問我為啥mi̍h leh哭，我kan-na一直搖頭，因為我知影in lóng是我ê夢，阮lóng無法度tńg去hit个時tsūn--ah。
然後我就清醒--ah。
我摸一下仔我ê喙phué，有小可仔tâm-tâm，原來我leh眠夢ê時tsūn是真正leh哭。
因為我知影阮lóng無法度越頭倒tńg--去，kan-na ē-tàng一直向前行。
啥mi̍h是美夢？啥mi̍h是惡夢？
夢著快樂ê回憶，iáu-m̄-koh he lóng是過去ê代誌；夢著有人死--去，iáu-m̄-koh kám有啥人ē-tàng永遠活--leh bē死--去？
照án-ne想，其實mā無啥mih美夢kah惡夢ê區別--ah。
Tiānn-tiānn聽著人講：「歡喜mā是一工，悲傷mā一工。」
Tsit个講法我是同意，因為m̄管阮做啥mih代誌，m̄管阮khi-móo-tsih ê好bái，lóng無可能干涉時間ê運行。時間對每一个人lóng是公平--ê。
死亡mā是。
「既然m̄知影家己tang時ē死，就kā每一工lóng當做最後一工leh活。」
Lán lóng無法度確定家己一定iáu-koh有明仔載；活到beh 23歲，mā看過tsiok濟新聞報導，逐工lóng有人因為意外過身，kám有可能後擺就是我？Tse lóng真歹講。
「若是無細膩koh看著明仔載ê日頭，就是趁--著--ah。我一直lóng有tsit種想法。」
「人生--啊，kám m̄是一直揣理由來hōo家己過了khah sù-sī？」
