作者／丁鳳珍、梁淑慧
Chit本冊是台中教育大學人文學院台灣語文學系執行ê教育部高教深耕計畫「中等學校本土語文（台語文）教材教法課程研發方案」額外ê禮物。因為阮無領教育部ê稿費，出冊mā無提教育部ê錢，所以，阮歡喜自由做阮愛做--ê。
阮自2020年春天無閒到taⁿ，第三个春天已經離開。多謝台中教育大學郭伯臣校長kap王如哲前校長領導ê行政kap學術團隊，多謝師資培育暨就業輔導處魏麗敏處長貼心sio-thīn，多謝人文學院林欽賢院長kap莊敏仁前院長熱情ê鼓勵參支持，多謝台語系林茂賢主任全然ê信任koh慷慨提供精彩ê文稿，多謝台語系陳麗華秘書、人文學院黃怡菁秘書kap計畫助理鄭翔茹小姐不sám時tàu-saⁿ-kāng。
深深感謝阮chit个方案ê共學實踐社群委員參助理：丁鳳珍、梁淑慧、楊允言、程俊源、施炳華、蔣為文、陳麗君、林秀珍、曹芬敏、林麗姿、江澄樹、黃進旺、傅美玲、許芳誠、翁曉萍、龔昱豪、廖永平、施秀玟、曾珮瑄、陳柏鈞、宋展旭、鄭凱元。
Ài感謝ê人chiâⁿ濟，感謝教lán講台語ê鄉親序大，感謝éng過濟濟為搶救台語ê性命來奉獻青春ê sia̋n-pái，多謝五南ê台灣書房願意替lán出冊，多謝願意掀開chit本冊ê你。Lán人人生ê溪水彎彎oat-oat ǹg前流--過-去，有緣同齊為lán台語人ê母語教育奉獻青春，lán歡喜甘願。
人生bōe得圓滿，世事oh得chiâu-chn̂g。本chiâⁿ阮想beh kā全部文稿ê用字、腔口lóng盡量改hō͘一致；落尾，阮想講，chit-chūn是lán人轉型正義ê新時代，éng過威權時代壓霸ê「一統」、「統一」，m̄是真理，mā ài考慮著自由、個性chit个原則。當然共有ê規範是互相溝通所需要--ê，m̄-kú，到底按怎做khah好？阮想che需要lán逐家鬥陣來實踐，只有無停睏繼續來書寫台語文，有hit一工，lán ē自然形成共識。因為án-ni，chit本冊ē tī尊重多元參建構台語文書寫ê標準化chit兩个角度，來調整文稿ê用字。阮知影按怎做lóng有遺憾，chit本冊定著有bōe少欠點。若是beh thèng候到圓滿，永遠to bōe有出版hit一工。Ē-tàng tī台語文書寫標準化ê路途當中奉獻青春，lán是有福氣ê人。
Chit本冊代先beh服務ê對象是大學ê中等學校台語文專長ê師資培育生，因為in ê「中學台語文教材教法」chit門課程chiâⁿ需要tòe ē著時代ê教科書，che正是教育大學台語系老師ài擔--起-來ê社會責任。Koh來，beh提供hō͘「12年國教本土語文課綱」2022學年度開始實施ê中學台語教師sù配ê教材指引。Chit本冊mā beh獻hō͘愛beh自我精進台語文ê台語人，mā幫贊想beh引chhōa囝兒序細學母語ê台語人。Lán mā ài繼續要求中華民國ê教育部，緊緊落實「轉型正義」，mài koh一直提威權時代壓迫lán人ê「閩南語」chit款殖民ê印記，來蹧躂lán台語人。Lán是台語人，lán愛beh教lán ê囝孫聽ē-hiáu台語、gâu講台語、興讀台語文、慣勢寫台語文。
Lán ê先祖留落濟濟ê台語文祖公媽產hō͘--lán，可惜濟濟台語人受殖民教育太久，soah m̄知lán有hiah-nī濟珍貴ê白話字（台灣字）文獻參漢字ê歌仔冊（歌仔簿）文本ài寶惜kap傳承。Lán hō͘文化殖民教育變做無過去ê「中國閩南語人」，kan-na看有目睭前ê mi̍h件，lán kám chiâⁿ實有才調行出phong-phài ê未來？愛beh chiâⁿ做台語專業老師ê人，kám好意思繼續講，白話字kap歌仔冊ê文化資產，lán人bōe-hiáu、m̄知mā無要緊--leh？到底是家己看無、m̄學，a̍h是chiâⁿ實無想beh繼承祖公祖媽送hō͘ lán台語囝孫ê文化遺產。無想beh做「台語文ê好額人」，soah堅心beh做「台語文ê散凶人」？
2020年5月初8行政院文化部ê文化資產局公告第2屆「台灣世界記憶國家名錄」，m̄-nā有台灣文學館提報ê「台灣白話字文學及相關作品」，koh有台灣基督長老教會歷史檔案館提報ê「賴永祥長老史料庫」kap 伊 hām台南神學院、長榮中學聯合提報ê「南部基督長老教會在台灣傳教之歷史文獻之巴克禮相關文物」，che對台語白話字文獻ê研究kap推廣意義重大。為beh幫贊師資培育生冗早chiâⁿ做「好額ê台語文老師」，lán chit本冊ê羅馬字khah濟是採用在來ê白話字（台灣字），當然mā有寡所在ē用中華民國教育部2006年公佈ê「台灣閩南語羅馬拼音方案」。阮chiâⁿ貼心，koh有tī冊ê頭前專工囥一份羅馬字對照表，相信愛beh chiâⁿ做優等、gió-toh ê台語文教師ê你，定著看有。
人生是學習ê旅途，m̄-kú，學問、智識是學bōe完--ê，lán kan-na ē-tàng「提真心來交換」。Lán就án-ni，繼續拚勢栽培lán家己；不時自我精進ê老師，定著是鼓勵學生骨力學習上好ê模樣。
1.編按：本冊按算tī 2022年尾進前由「台灣書房」（五南關係企業）出版，目前iáu leh調查市場需求量，ē-sái參考文尾ê作者註。
