《台文通訊》tī「台語文字化」工程ê實踐 1
主講／呂美親
記錄／白鎔維
《台文通訊》tī「台語文字化」工程ê實踐，可能對大部份ê人來講，是幾个真簡單ê關鍵詞niâ；m̄-koh uì一个研究者ê角度看--來，呂美親教授認為是真無簡單，mā有tsiok濟層意義ê代誌。
Beh知影《台文通訊》對台語文字化工程ê意義，ē-tàng uì現代ê語文改革運動來看起。日本近代文學形成ê過程當中有「言文一致運動」；tī中國，《新青年》雜誌頂kuân mā leh tshui-sak「白話文運動」。Tsia-ê運動，m̄-nā beh kā口語文字化，mā配合現代文學ê創作，去起造現代化ê文體kap標準語。台灣tī日本時代有日本話、中國白話文、台語ê白話字koh有世界語，無仝ê支持者lóng提出觀點beh改造台灣話，m̄-koh因為拄著日本政府ê皇民化運動kap「國語運動」（日本話），koh有戰後國民政府ê「國語運動」（北京話），台灣話suah無法度tī hit時達成現代化ê語文改革。
張我軍是日本時代台灣tshui-sak新文學ê重要旗手，伊自中國留學tńg--來，主張借中國白話文來改造台灣話，連結逐家對漢人文化ê認同。M̄-koh hit時逐家bē-hiáu講北京話，suah造成1920年代hit款言文無一致ê「類中國白話文」。雖然有對「祖國（中國）」ê認同，hit時ê中國白話文thang講是台灣新文學真重要ê血肉，總--是逐家用--起-來iáu是小可仔khê-khê，m̄-tsiah引tshuā出後壁1930年代ê「台灣話文運動」。
台灣話文運動拄著皇民化政策，就án-ne消無--去；戰後koh有「國語運動」影響幾若十年，對中國ê認同太重；koh來，雖然有向陽、林宗源tsia-ê作家leh寫台語詩，m̄-koh tī 1990年代進前，規个文壇thang講無啥人leh思考台灣話beh按怎改造、台灣話ê文學beh按怎起造。一直到1990年代鄭良光先生創辦《台文通訊》，tsiah-koh開始tshui-sak台語ê文字改革，仝時間koh有蕃薯詩社leh創作；tī in ê拍拚之下，引起戰後規模上大ê台語文、台語文學ê論戰kap suà--來ê種種實踐。
Hit時，真無簡單起造--起-來ê「台灣文學」總算得著正名，也tsiah拄beh行入體制化，台語文學又koh tī tsit个時tsūn「走--出-來」，逐家lóng頭殼疼。M̄-koh，連本身是客人ê「台灣文學之母」鍾肇政先生to寫一篇〈統一台語表記，刻不容緩〉，來肯定台語文字標準化ê改革運動。鄭良光mā用筆名羅文傑寫一篇〈滅種中的台灣語言〉，說明台灣話ê歷史運命，beh延續自1930年代郭明昆、1960年代王育德ê主張：「建立標準化ê現代台灣語文」，來tī 1990年代ê台灣文壇攑頭銃beh改革。
早期台語文運動tshui-sak ê力無夠，lán ē-tàng看著台語文發展ê歷史一直受著壓迫，運動mā tiānn-tiānn kap政治運動結合，包袱真重。但是良光先生本身是一个生理人，伊主張推廣台語ài用社會科學來思考，m̄是kan-na悲情niā-niā。伊用商業行銷ê方法去tshui-sak，串連濟濟人，hōo《台文通訊》發刊量tī hit時上濟ē-tàng到逐期兩萬外份，是一个tsiok驚--人ê數字。
Khah早電腦iáu未普及ê時tsūn，鄭良光、鄭良偉tī國外就結合科技，開發台語ê輸入法。In強調台文ê普及化ài靠電腦，因為拍字ê時tsūn ài選字，輸入羅馬字就ē顯示漢字，使用漢字ke真有自信；透過tsit个過程，逐家所使用ê字就ē愈來愈接近，hōo標準化ê速度koh-khah緊。
《台文通訊》tī台語文字化ê過程扮演「組織」tsit个重要ê角色，而且透過雜誌tsit个平台kā逐家箍--起-來，參與ê人自少少變濟濟，上重要--ê就是起造台語文自主ê「場域」；有tsit个場域，運動ê聲量tsiah有法度hùn大。《台文通訊》ê英語名是Taiwanese Writing Forum，就是「台語書寫論壇」ê意思。若照鍾肇政ê講法，就是『提供各家一個 “吵架” 的場合』，簡單講，有冤家tsiah ē進步。《台文通訊》ê創刊號有講著伊具體ê目的，是beh「提高台灣人用台語文思考、寫作kap閱讀ê能力，提倡大眾傳播媒體使用台文ê風氣，koh有促成台文工作者ê分工合作」。《台文通訊》mā kā無leh寫台語ê華語、客語作家箍入來討論，譬如講東方白有寫台語散文專欄，koh有朱真一用漢羅寫客語文章kap陳雷先生討論，lóng hōo tsit个場域有重大ê意義。
《台文通訊》iáu有一个重點，就是主張用「漢羅合用」ê文體。漢羅合用雖bóng自1960年代王育德就已經提出，鄭良偉ê研究mā延續tsit个主張，m̄-koh一直到《台文通訊》tsiah有一个場域thang發展。後--來，漢羅合用變做tsit-má台語書寫ê主流，幫助台語達成標準化、普及化tsia-ê現代語文改革ê目標。
漢羅合用ê文體內底，台語羅馬字就是扮演強調聲音ê角色，ē-tàng記錄聲音；拄著漢字寫bē出--來ê詞，就用羅馬字來寫，bē因為書寫ê困擾致使母語文化流失。羅馬字koh ē-tàng提醒讀者用台語思考，看--著就知影是台語文，mā ē知影仝一个漢字ē-tàng用幾若款語言來讀，去挑戰華語聲音中心主義。
《台文通訊》mā提醒逐家白話字文學tī台灣文學史內底ê重要性，試beh kā台語文學囥入去台灣文學ê範圍內底，kap台灣文學界開始對話。所以《台文通訊》leh tshui-sak ê台語文字化工程m̄-nā文字、文學層面，koh-khah深入--ê是去影響台灣文學所ē-tàng展現ê多元化。後--來ê《台文BONG報》繼續sak台語文學化，kap《台文通訊》合刊了後變做《台文通訊BONG報》，目標就是beh hōo台語文koh-khah普及、hōo台語文學ê素質ē-tàng koh-khah提升，in有清楚ê階段性目標，一步一跤印去完成。
《台文通訊》leh做--ê是「本格」3 ê台灣語文改革，倒tńg去新文學運動ê目標：起造一个ē-tàng普及化ê現代文體，完成1930年代台灣話文論戰、koh有郭明昆、王育德等人ê「未竟之路」。漢羅合寫tsiânn做「新台文」ê書寫，拍破舊底文字、語言ê觀點，mā影響其他本土語言ê寫作，真正去落實台灣ê多元化、多語化，起造以台灣、尤其是以本土語言為主ê新文學、新本土文化，當初ê hit pha火也愈燒愈旺--ah。
（講者呂美親是台灣師範大學台灣語文學系助理教授）
