主講／廖秋娥
記錄／蔡玉薰
本文是2024/10/9講座ê摘要記錄，廖秋娥博士是台灣師範大學地理研究所博士、台東大學文化資源與休閒產業學系副教授退休，mā是東糖研究會發起人之一。
台東糖廠kah在地ê發展是真貼bā，為著beh tī當地起糖廠，土地ê開墾kah交通ê建設lóng tsiânn要緊，koh有因為糖廠發展tshuā--來ê外來人口，濟濟lóng是台東區域發展ê重點，lán就來聽廖秋娥分享台東糖廠kah區域發展。
踏話頭——台東糖廠歷史簡單講
畫本《我欲來去揣阿爸》是寫1925～1930時代tī台東ê故事，講一个蹛tī台東旭村ê囡仔——阿全beh去揣踮台東糖廠食頭路ê阿爸，故事結合台東糖廠發展ê歷史，kā hit當時ê產業、交通、人文lóng寫--入-去，kā東糖研究會整理ê複雜資料kah田野調查用畫本ê方式表現，簡單講hōo大人、囡仔了解台東糖廠ê歷史。
台灣ê製糖廠發展
台灣自荷蘭時代（1624～1662）就有發展製糖，tsit-tang-tsūn是「舊型糖廍」（thn̂g-phōo），ài靠牛來拖tsiah ē-tàng kheh甘蔗來做糖。到日本時代（1905～1911）有「改良型糖廍」，是用機械來代替牛ê力來kheh甘蔗。路尾到1900年代有新型製糖工場，伊外形有煙筒管，kheh甘蔗ê方式參改良型糖廍sio-siāng，lóng是用機械teh kheh，m̄-koh新型製糖工場有kā糖kah蜜拆分開ê技術，ē-sái生產無仝款ê糖——白糖、赤砂kah烏糖，新型製糖工場tī日本時代上興，全台灣有50間，m̄-koh tsit-má iáu有teh製糖--ê kan-ta賰台南ê善化糖廠kah tī雲林ê虎尾糖廠。
日本時代ê移民政策
因為台灣東部平洋曠闊、人口koh少，總督府決定beh推動「內地化（日本化）東台」ê政策，按算beh kā台灣東部tsiânn做日本人生活ê所在，是日本經營東部重要ê政策之一。自1909年開始，總督府tī花蓮港做官辦ê移民村（吉野〔1〕、豐田、林田村）。原底koh beh tuì台東發展，想bē到tī 1911年7--月發生「成廣澳事件」，為著mài刺激著當地ê原住民，總督府就無繼續推動官辦ê移民村，轉做鼓勵台東製糖株式會社tī 1915年來辦私人ê移民村〔2〕（鹿野、鹿寮、池上、旭村），人uân-á無夠用，東糖koh tī 1918年辦本島移民村，m̄-koh兩款移民lóng無啥效，上尾就開放自由移民。直到1938年，為著beh配合「皇民化政策」，總督府koh一擺tī東部做官辦ê移民村（敷島村）。
製糖廠取締原則
總督府tī 1905年設「製糖廠取締原則」，tsit个制度規定講「一个所在收ê甘蔗lóng總是某一个糖廠--ê」，也就是講逐个製糖廠有家己ê「原料採集區域」，所擺若tsit个糖廠beh tī tsit箍圍仔收著koh-khah濟甘蔗，就ài家己出錢、出力建設地方，譬論講交通、開墾kah起造淹田ê系統。
輕便車
Beh講台東糖廠進前，先紹介一个對糖廠發展上kài要緊ê交通工具——「輕便車」（khing-piān-tshia），tse就是日語ê「手押台車」，tsit款車是用柴枋鬥四粒輪仔、用人sak車tī鐵枝路頂行ê交通工具，ē-sái載人mā ē用得載貨，是比五分仔車（路尾ê糖鐵）koh-khah早ê交通工具，拄beh發展糖廠ê所在因為設備iáu未齊全，lóng ài靠tsit-lō來搬糖廠ê機械kah載甘蔗。
台東糖廠ê發展
代先是總督府1910年tī卑南kah里壟〔3〕之間起輕便車路，仝hit年tsiah開始有改良型糖廍tī台東發展，頭--ā是里壟ê新鄉製糖場〔4〕，koh來是卑南ê野田製糖場〔5〕，1913年為著beh發展新型製糖場，野田製糖場就kā新鄉製糖場合--起-來，tī東京成立「台東製糖株式會社」，仝hit年ê年底koh tī新開園〔6〕起改良型糖廍，糖廠ê機械lóng ài靠輕便車tuì卑南港kā機械載--入-來，因為總督府ê輕便車路起無透，台東糖廠ài家己起，所擺lán ē-sái看著tsit條輕便路是倚山teh行，kā tsit三个改良型糖廍接接--起-來，tsit箍圍仔就是台東糖廠ê原料採集區域。
1914年開始，台東糖廠tī馬蘭起新型製糖場，tsit个製糖場一日ē-sái kheh 350噸ê甘蔗，正式運作了後野田製糖場就變做辦公室，里壟kah新開園ê改良型糖廍就轉做預備--ê。自1916年開始，因為新型製糖廠ài ê甘蔗量khah大，輕便車載無法，koh加上總督府無按算beh tī台東起鐵枝路，為著beh hōo糖廠ē-tàng運作，台東糖廠只好鼻仔摸--leh家己khai百thóng萬起自卑南thàng到里壟〔7〕ê鐵枝路，koh sio連suà鋪橋造路，帶動台東ê發展。
台東糖廠ê發展其實無啥順序，tī 1919年拄著風颱，工場、宿舍、道路等等lóng hōo風颱掃kah mi-mi-mauh-mauh，ài khai錢整修，liam-mi koh tī 1920年tn̄g著世界性ê景氣bái，致使東糖負債累累，經營困難，kah總督府參詳了後，東糖日後就做糖廠ê代誌就好，其他像交通、移民村ê khang-khuè就交hōo台東開拓株式會社處理。
台東糖廠發展ê轉變是tī 1925年，王登科tuì西部紮「大莖種」ê甘蔗來台東種，因為tsit款品種ê甘蔗粗骨、產量koh tsiânn kuân，東糖ê負責人知了後，就tsiânn器重王登科，伊就變做西部移民kah東糖之間ê中介，tī 1933年東糖tsiah開始趁錢。到1943年因為太平洋戰爭，日本tī台灣發展ê重點改變，東糖就hōo kap入去資本khah kuân ê「明治製糖株式會社〔8〕，改做「台東製糖所」。
戰後台灣ê糖廠全hōo台灣糖業公司接收，1950年代teh討論台東糖廠ê產量siunn少ài廢掉，m̄-koh地方人士認為東糖對地方tsiânn重要，應當ài保存，sio連suà khai 2,000萬換設備、10億tī池上起糖漿廠，因為糖價siàu無偌好，台東糖廠經營到1986年就煞鼓，其實自1980年開始就有做轉型，譬論講開設農場、飼牛、飼羊……，落尾東糖ê土地mā貢獻tsiânn濟hōo台東縣政府做都市計畫kah徵收，mā kā土地租hōo當地ê農民，提供在地人經濟ê基礎。
8.明治製糖株式會社ê總部是tī台南總爺，tsit-má ê麻豆。
台語sa攏有
線頂看影片
