作者：黃偉嘉
台灣有一句俗語，號做「3--月痟媽祖」。意思就是舊曆3--月媽祖生ê時tsūn，各項ê活動特別濟。其中苗栗通霄白沙屯拱天宮ê媽祖進香，因為無固定ê路線、到雲林北港ê路途又koh不止仔遠，逐年lóng有tsiok濟人參加，做香燈跤陪伴媽祖婆行七到十工，算是一件盛事。
白沙屯tsit个所在，古早是寫做「白沙墩」，就是íng過tī tsia有白沙疊做一堆一堆ná像墩仔ê意思。1920年地方制度改正，日本人tsiah將全台灣有「墩」ê地號名，改用「屯」--字，就án-ne tsiânn做「白沙屯」。總--是lán到tann iáu是讀做「白沙墩（Pe̍h-sua-tun）」，若beh有在地人ê khuì口，ē用得讀做Pe̍h-á-tun、iah是連讀做Pia-tun 1。
台鐵原底ê放送m̄知tsit層代誌，「屯」就照漢字讀tîng-tânn--去，讀做tūn。經過阮研究室執行教育部計畫，尾--à tī 2020年9--月公告以後，tsit-tsūn已經lóng改--過-來--ah。
1920年「墩」全面改做「屯」，大原則就是讀音照舊底ê「墩」。M̄-koh奇怪--ê是：一寡地號名mā有tuè leh調整ê所在，tsit-má ê讀音suah無一致。譬如講：舊名「草鞋墩（Tsháu-ê-tun）」ê南投「草屯（Tsháu-tùn）」，現代「屯」ê讀音是tùn。舊名「西大墩（Sai-tuā-tun）」ê台中「西屯（Sai-tūn）」，現代「屯」ê讀音是tūn。若m̄是中部人，凡勢就ē kā tsit兩个所在ê名讀m̄-tio̍h，需要費神記--起-來。
另外，lán知影苗栗ê山線是客人鄉鎮。若用苗栗ê客話來講白沙屯，in是講做「白沙堆（pag saˊ doiˊ）」。像tsit種台語、客語稱呼無仝ê地號名，tī族群交會ê鄉鎮tsia̍p看--著，lán以後有機會koh一个仔一个紹介。
1.駱嘉鵬，《白沙屯方言的聲調特色》，http://www.kaphing.idv.tw/loh/ljp/document/C200111.pdf，第七屆閩方言國際研討會，2001年。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
臺灣有一句俗語，號做「三月痟媽祖」。意思就是舊曆三月媽祖生的時陣，各項的活動特別濟。其中苗栗通霄白沙屯拱天宮的媽祖進香，因為無固定的路線、到雲林北港的路途又閣不止仔遠，逐年攏有足濟人參加，做香燈跤陪伴媽祖婆行七到十工，算是一件盛事。
白沙屯這个所在，古早是寫做「白沙墩」，就是往過佇遮有白沙疊做一堆一堆若像墩仔的意思。1920年地方制度改正，日本人才將全臺灣有「墩」的地號名，改用「屯」字，就按呢成做「白沙屯」。總是咱到今猶是讀做「白沙墩（Pe̍h-sua-tun）」，若欲有在地人的氣口，會用得讀做Pe̍h-á-tun、抑是連讀做Pia-tun 1。
臺鐵原底的放送毋知這層代誌，「屯」就照漢字讀重耽去，讀做tūn。經過阮研究室執行教育部計畫，尾仔佇2020年9月公告以後，這陣已經攏改過來矣。
1920年「墩」全面改做「屯」，大原則就是讀音照舊底的「墩」。毋過奇怪的是：一寡地號名嘛有綴咧調整的所在，這馬的讀音煞無一致。譬如講：舊名「草鞋墩（Tsháu-ê-tun）」的南投「草屯（Tsháu-tùn）」，現代「屯」的讀音是tùn。舊名「西大墩（Sai-tuā-tun）」的臺中「西屯（Sai-tūn）」，現代「屯」的讀音是tūn。若毋是中部人，凡勢就會共這兩个所在的名讀毋著，需要費神記起來。
另外，咱知影苗栗的山線是客人鄉鎮。若用苗栗的客話來講白沙屯，𪜶是講做「白沙堆（pag saˊ doiˊ）」。像這種臺語、客語稱呼無仝的地號名，佇族群交會的鄉鎮捷看著，咱以後有機會閣一个仔一个紹介。
---------------------
