台語新聞過音ê鹹酸苦澀
主講／邱丹霓
記錄／蘇錦蘭、陳亮穎
本文是2025/11/12講座ê記錄，講者是公視台語台新聞過音、主播、節目口白。
無論是新聞報導iah是節目預告，lóng有畫面kah專業ê口白說明。Tsit改「台語sa攏有」邀請公視台語台ê新聞主播、過音員邱丹霓，hām逐家分享訓練過音ê mê角、寫稿ê時按怎用台語思考，koh有khah早拄--著ê心適代。
台語新聞過音——He是啥？
逐工早起，電視台新聞部ê成員ē先開會決定beh報導啥mih議題，tsiah派文字記者hām攝影記者去採訪。「新聞過音」就是kā文字記者寫ê稿讀--出-來、錄--起-來ê過程。過音真注重人ê聲質、咬字、語速、語氣。一句話ê聲調有kuân有低，lán若用無仝ê身體部位發聲，ē-tàng變出幾若種聲情，tsiah uì其中揣出適合ê聲音。
咬字beh清楚，ài按怎練習？
除了調整聲情以外，過音員mā ài練習咬字，因為發音若差一屑仔，意思就差tsiok濟。譬如講「囡仔（gín-á）」，濁音無唸清楚，就變「印仔（ìn-á）」；「獨裁（to̍k-tshâi）」ê入聲kah送氣音若無清楚，ē變「肚臍（tōo-tsâi）」。邱丹霓表示，lán ē-sái tsia̍p唸數字1至20，tsia-ê讀音有濁音、入聲、合脣音，lán若tiānn-tiānn練習，久--ah就ē慣勢。
有時仔一个詞內底若khah濟入聲，凡勢ē hōo人唸kah喙舌拍kat。拄著tsit款情形，邱丹霓分享一項撇步，譬如講「有納入健保」，「納入」連suà兩字lóng是入聲，tsit時ē-sái用仝意思ê「健保有給付」代替，khah好唸。「若有涉及不法」ê「涉及不法」連suà四字lóng是入聲，ē-tàng改做「若有違法」，án-ne字khah簡省，意思mā ē通。
寫稿ê時ài用台語思考
華語新聞稿有一寡台華共用詞，thang用台語照唸，mā ē-tàng揣台語ê仝義詞代替。像『奔波』thang直接講「奔波」（phun-pho），mā thang講「tsông」。『安裝』就是台語ê「鬥」、「安」、「裝」（tsng），像「安冷氣」、「鬥冷氣」，beh照原本--ê讀做「an-tsong」mā ē用--得。
有一寡詞就無適合照唸，ài用台語ê方式去思考，意思tsiah bē走精--去。譬如『吸晴』，lán台語講「hiánn目」、「siânn人目」。Koh來像拄著『毆打』tsit个詞，邱丹霓ē去揣新聞畫面看當事人按怎拍，tsiah決定beh用啥mih動詞。因為台語ê動詞tsiok幼，m̄-nā「拍」，iáu有「摃」、「舂」、「hám」、「bok」等等，tsia-ê動作ê力度koh有分輕重。
過音心適代
有ê過音員kan-na uì字面理解，m̄知伊tī台語本底ê意義，用詞就ē造成誤會。邱丹霓講，伊iáu ē記得khah早有一條新聞，是leh講有兩个立委起呸面，發生『肢體衝突』；想bē到in同事竟然kā『肢體衝突』翻譯做「跤來手來」，伊m̄知「跤來手來」是「烏白kā人摸」ê意思。若照原本ê情境，應該ài講hit兩个立委「起跤動手」tsiah tio̍h。
另外一條新聞，是leh講囡仔生--出-來了後，hông發見有一項症頭，ài長期治療，其中有一句口白是：「Tī兒科醫生ê照顧之下，tsit-má囡仔兩歲外，“活跳跳” 拍球、運動lóng真有pān。」「活跳跳」一般是leh形容蝦仔、魚仔真鮮、tsiok有活力，若用來形容人，意思就怪怪。記者本底是beh講hit个囡仔tsiânn健康、活潑，án-ne ài用「活跳」形容，意思khah tio̍h。
專有名詞ê台語按怎講？
有時beh kā華語ê過音稿翻做台語，ē拄著khah困難ê詞。邱丹霓舉例，有一改伊拄著華語新聞內底出現『兔脣』，tsit个詞台語按怎講？Lán自底就有leh講「khih喙」，íng過mā有人講「pit巡」，參考tsit个詞講做「pit脣」mā合理。
現此時有愈來愈濟新詞出現。像前一站仔新聞出現『熟廚餘』，台語自早無人án-ne講，所致邱丹霓招講座現場ê聽眾同齊來思考，『熟廚餘』所講ê phun，是用「煮」--ê，iah是用「hiânn」--ê來處理？無的確lán有法度揣著khah tuì-tâng ê講法。公視台語台ê「台語新詞辭庫」有定期收錄khah新ê詞，lán ē-sái ke運用tsit項資源。
台語新聞過音學問真深，針對無仝款ê報導，過音員ài調整聲sàu、語氣，也ài注重用詞kah語法，因為tsit-má tsiok濟觀眾ē看台語台學台語。邱丹霓表示，伊希望in阿母tī厝--裡ná揉塗跤、ná看伊報新聞ê時，ē-tàng免看畫面就聽有新聞leh講啥；hōo厝--裡ê人kah觀眾lóng了解報導ê內容，是伊做過音khang-khuè ê目標。
無論是新聞報導iah是節目預告，lóng有畫面kah專業ê口白說明。Tsit改「台語sa攏有」邀請公視台語台ê新聞主播、過音員邱丹霓，hām逐家分享訓練過音ê mê角、寫稿ê時按怎用台語思考，koh有khah早拄--著ê心適代。
台語新聞過音——He是啥？
逐工早起，電視台新聞部ê成員ē先開會決定beh報導啥mih議題，tsiah派文字記者hām攝影記者去採訪。「新聞過音」就是kā文字記者寫ê稿讀--出-來、錄--起-來ê過程。過音真注重人ê聲質、咬字、語速、語氣。一句話ê聲調有kuân有低，lán若用無仝ê身體部位發聲，ē-tàng變出幾若種聲情，tsiah uì其中揣出適合ê聲音。
咬字beh清楚，ài按怎練習？
除了調整聲情以外，過音員mā ài練習咬字，因為發音若差一屑仔，意思就差tsiok濟。譬如講「囡仔（gín-á）」，濁音無唸清楚，就變「印仔（ìn-á）」；「獨裁（to̍k-tshâi）」ê入聲kah送氣音若無清楚，ē變「肚臍（tōo-tsâi）」。邱丹霓表示，lán ē-sái tsia̍p唸數字1至20，tsia-ê讀音有濁音、入聲、合脣音，lán若tiānn-tiānn練習，久--ah就ē慣勢。
有時仔一个詞內底若khah濟入聲，凡勢ē hōo人唸kah喙舌拍kat。拄著tsit款情形，邱丹霓分享一項撇步，譬如講「有納入健保」，「納入」連suà兩字lóng是入聲，tsit時ē-sái用仝意思ê「健保有給付」代替，khah好唸。「若有涉及不法」ê「涉及不法」連suà四字lóng是入聲，ē-tàng改做「若有違法」，án-ne字khah簡省，意思mā ē通。
寫稿ê時ài用台語思考
華語新聞稿有一寡台華共用詞，thang用台語照唸，mā ē-tàng揣台語ê仝義詞代替。像『奔波』thang直接講「奔波」（phun-pho），mā thang講「tsông」。『安裝』就是台語ê「鬥」、「安」、「裝」（tsng），像「安冷氣」、「鬥冷氣」，beh照原本--ê讀做「an-tsong」mā ē用--得。
有一寡詞就無適合照唸，ài用台語ê方式去思考，意思tsiah bē走精--去。譬如『吸晴』，lán台語講「hiánn目」、「siânn人目」。Koh來像拄著『毆打』tsit个詞，邱丹霓ē去揣新聞畫面看當事人按怎拍，tsiah決定beh用啥mih動詞。因為台語ê動詞tsiok幼，m̄-nā「拍」，iáu有「摃」、「舂」、「hám」、「bok」等等，tsia-ê動作ê力度koh有分輕重。
過音心適代
有ê過音員kan-na uì字面理解，m̄知伊tī台語本底ê意義，用詞就ē造成誤會。邱丹霓講，伊iáu ē記得khah早有一條新聞，是leh講有兩个立委起呸面，發生『肢體衝突』；想bē到in同事竟然kā『肢體衝突』翻譯做「跤來手來」，伊m̄知「跤來手來」是「烏白kā人摸」ê意思。若照原本ê情境，應該ài講hit兩个立委「起跤動手」tsiah tio̍h。
另外一條新聞，是leh講囡仔生--出-來了後，hông發見有一項症頭，ài長期治療，其中有一句口白是：「Tī兒科醫生ê照顧之下，tsit-má囡仔兩歲外，“活跳跳” 拍球、運動lóng真有pān。」「活跳跳」一般是leh形容蝦仔、魚仔真鮮、tsiok有活力，若用來形容人，意思就怪怪。記者本底是beh講hit个囡仔tsiânn健康、活潑，án-ne ài用「活跳」形容，意思khah tio̍h。
專有名詞ê台語按怎講？
有時beh kā華語ê過音稿翻做台語，ē拄著khah困難ê詞。邱丹霓舉例，有一改伊拄著華語新聞內底出現『兔脣』，tsit个詞台語按怎講？Lán自底就有leh講「khih喙」，íng過mā有人講「pit巡」，參考tsit个詞講做「pit脣」mā合理。
現此時有愈來愈濟新詞出現。像前一站仔新聞出現『熟廚餘』，台語自早無人án-ne講，所致邱丹霓招講座現場ê聽眾同齊來思考，『熟廚餘』所講ê phun，是用「煮」--ê，iah是用「hiânn」--ê來處理？無的確lán有法度揣著khah tuì-tâng ê講法。公視台語台ê「台語新詞辭庫」有定期收錄khah新ê詞，lán ē-sái ke運用tsit項資源。
台語新聞過音學問真深，針對無仝款ê報導，過音員ài調整聲sàu、語氣，也ài注重用詞kah語法，因為tsit-má tsiok濟觀眾ē看台語台學台語。邱丹霓表示，伊希望in阿母tī厝--裡ná揉塗跤、ná看伊報新聞ê時，ē-tàng免看畫面就聽有新聞leh講啥；hōo厝--裡ê人kah觀眾lóng了解報導ê內容，是伊做過音khang-khuè ê目標。
