講hōo伊tio̍h， mā ài講hōo伊通：
生活中ê台語實踐
/ 吳孟儒
(作者是翻譯學碩士、 tng-leh讀語言社會學博士班)
前一站仔拄著一位日本朋友，台、華語lóng ē-hiáu，伊問--我：「坐高鐵／飛行機beh問後壁ê人kám ē-sái『椅背往後倒』，台語按怎講khah好勢？」
我kah厝--裡序大khah kah意用「the」，譬如講「椅仔kám ē-sái the--leh」、「Kám ē-sái the後壁」，mā有台語有志建議用「pian/pan」、「ànn」、「ián」，a̍h是台語萬能動詞「用」（īng/iōng）。
不而過，我想著一件代誌：日本人坐車ē慣勢án-ne kā後壁ê人問--一-下，台灣kánn-ná無tsit-lō文化。若是lán tī外口坐車雄雄拄著有人án-ne問，而且koh講（tsit-má出外khah罕得聽--著ê）台語，kám有法度隨反應--過-來？
Tsia先分享一个日語ê例。有一个日本人蹛美國，有一改去當地ê日本超市買mi̍h件，拄著美國人店員用日語問伊「genkin（現金）ですか」，伊to已經講beh lù卡，對方suah kho̍k-kho̍k問伊是m̄是「genkin」。舞規晡，tsiah發現原來對方是leh問「genki（元気）ですか」。
實際上，無一定是美國店員唸m̄-tio̍h，若án-ne，是按怎tsit个日本人ē聽tānn--去--leh？伊tī社群媒體分享，有日本人解sueh：日本超市櫃台根本無人leh a̋i-sat-tsuh，無可能問你「元気」--無，莫怪ē hōo日本人誤會是leh問「現金」。
生活中使用語言，m̄是kan-na靠字詞kah語法來溝通。仝一組音，生活經驗無仝，可能就ē聯想著無仝意思，tse m̄是語言問題，是文化有差。尤其是多語多族社會，三不五時就ē「出tsit種tshuê」，有時ē當做笑詼，有時可能造成衝突。
Koh tńg來講「椅仔beh pian按怎問」tsit-lō代。我mā是日本蹛幾若冬tsiah發覺，原來tī日本坐車你無問就pian椅仔the--落-來，後壁he日本人無一定ē出聲，m̄-koh心內有可能ē罵你無水準、欠家教。
我若m̄ bat tsit種（the--落-來進前ài問--一-下ê）文化，mā無（出外應該ke講母語ê）語言意識，tī台灣坐高鐵／飛行機拄著坐頭前hit个生份人雄雄越頭án-ne kā我問，koh是用台語，我可能ē想講：「你椅仔beh pian、beh the做你用--啊，是按怎beh來問--我？A̍h是我聽m̄-tio̍h--去？E̋，kám講是pián仙仔beh來puânn-nuá、kā我騙？
現此時，台文界leh討論台語按怎講，主要是行「語言教學」tsit條路，kā重點囥tī詞彙kah語法規則。既然是教語言，重點囥tī語言ê基本元素當然無問題。不而過，講台語若kan-na看「用字有tio̍h--無？」、「用詞有suí--無？」、「有台語khuì--無？」，用tī實際生活當中就算是拄著台語人mā有可能造成溝通困難。
Tse當然m̄是講lán mài講台語，mā m̄是講mài用khah古早、khah困難ê詞，是ài提醒家己台語ài講hōo伊tio̍h，mā ài講hōo伊通。
Khah早leh學英語通譯，同學tiānn-tiānn kā重點囥tī英語ài學kah suí-khuì，上好是hōo人誤會家己是英語母語人。老師suah提醒逐家，ài kā重點囥tī「溝通」：m̄管你翻了偌suí、用偌濟C2 ê詞，觀眾聽無就是聽無；通譯ài助人溝通，m̄是來展風神、làu英語。
若án-ne講，lán出外講台語若是用著其他（聽有台語ê）人無一定聽--過ê詞，a̍h是講對方無一定有法度隨反應ê代誌，beh按怎堅持講台語，koh達成溝通效果？
我ê建議：表情、手勢來tàu-sann-kāng，字句前後加一寡情境。譬如講beh pian椅仔進前驚影響著後壁ê人，ē-tàng先越頭看--伊、會一聲失禮（「歹勢！」），講khah慢--leh，用手ná比ná講（「tse椅仔」），展一个歹勢ê表情（「我kám ē-sái」），手比一个椅仔pian--落-去ê角度（「小可the後壁」），甚至說明理由（「我想beh小歇--一-下」），上尾koh提醒對方tse是leh客氣kā伊問（「好--無？」）。M̄是kan-na講一句「正pān ê台語」，是做規套來溝通。就算對方一時反應bē過--來，a̍h是台語聽無，看你tse表情、動作，mā大概臆有你leh講啥--ah。
我kah厝--裡序大khah kah意用「the」，譬如講「椅仔kám ē-sái the--leh」、「Kám ē-sái the後壁」，mā有台語有志建議用「pian/pan」、「ànn」、「ián」，a̍h是台語萬能動詞「用」（īng/iōng）。
不而過，我想著一件代誌：日本人坐車ē慣勢án-ne kā後壁ê人問--一-下，台灣kánn-ná無tsit-lō文化。若是lán tī外口坐車雄雄拄著有人án-ne問，而且koh講（tsit-má出外khah罕得聽--著ê）台語，kám有法度隨反應--過-來？
Tsia先分享一个日語ê例。有一个日本人蹛美國，有一改去當地ê日本超市買mi̍h件，拄著美國人店員用日語問伊「genkin（現金）ですか」，伊to已經講beh lù卡，對方suah kho̍k-kho̍k問伊是m̄是「genkin」。舞規晡，tsiah發現原來對方是leh問「genki（元気）ですか」。
實際上，無一定是美國店員唸m̄-tio̍h，若án-ne，是按怎tsit个日本人ē聽tānn--去--leh？伊tī社群媒體分享，有日本人解sueh：日本超市櫃台根本無人leh a̋i-sat-tsuh，無可能問你「元気」--無，莫怪ē hōo日本人誤會是leh問「現金」。
生活中使用語言，m̄是kan-na靠字詞kah語法來溝通。仝一組音，生活經驗無仝，可能就ē聯想著無仝意思，tse m̄是語言問題，是文化有差。尤其是多語多族社會，三不五時就ē「出tsit種tshuê」，有時ē當做笑詼，有時可能造成衝突。
Koh tńg來講「椅仔beh pian按怎問」tsit-lō代。我mā是日本蹛幾若冬tsiah發覺，原來tī日本坐車你無問就pian椅仔the--落-來，後壁he日本人無一定ē出聲，m̄-koh心內有可能ē罵你無水準、欠家教。
我若m̄ bat tsit種（the--落-來進前ài問--一-下ê）文化，mā無（出外應該ke講母語ê）語言意識，tī台灣坐高鐵／飛行機拄著坐頭前hit个生份人雄雄越頭án-ne kā我問，koh是用台語，我可能ē想講：「你椅仔beh pian、beh the做你用--啊，是按怎beh來問--我？A̍h是我聽m̄-tio̍h--去？E̋，kám講是pián仙仔beh來puânn-nuá、kā我騙？
現此時，台文界leh討論台語按怎講，主要是行「語言教學」tsit條路，kā重點囥tī詞彙kah語法規則。既然是教語言，重點囥tī語言ê基本元素當然無問題。不而過，講台語若kan-na看「用字有tio̍h--無？」、「用詞有suí--無？」、「有台語khuì--無？」，用tī實際生活當中就算是拄著台語人mā有可能造成溝通困難。
Tse當然m̄是講lán mài講台語，mā m̄是講mài用khah古早、khah困難ê詞，是ài提醒家己台語ài講hōo伊tio̍h，mā ài講hōo伊通。
Khah早leh學英語通譯，同學tiānn-tiānn kā重點囥tī英語ài學kah suí-khuì，上好是hōo人誤會家己是英語母語人。老師suah提醒逐家，ài kā重點囥tī「溝通」：m̄管你翻了偌suí、用偌濟C2 ê詞，觀眾聽無就是聽無；通譯ài助人溝通，m̄是來展風神、làu英語。
若án-ne講，lán出外講台語若是用著其他（聽有台語ê）人無一定聽--過ê詞，a̍h是講對方無一定有法度隨反應ê代誌，beh按怎堅持講台語，koh達成溝通效果？
我ê建議：表情、手勢來tàu-sann-kāng，字句前後加一寡情境。譬如講beh pian椅仔進前驚影響著後壁ê人，ē-tàng先越頭看--伊、會一聲失禮（「歹勢！」），講khah慢--leh，用手ná比ná講（「tse椅仔」），展一个歹勢ê表情（「我kám ē-sái」），手比一个椅仔pian--落-去ê角度（「小可the後壁」），甚至說明理由（「我想beh小歇--一-下」），上尾koh提醒對方tse是leh客氣kā伊問（「好--無？」）。M̄是kan-na講一句「正pān ê台語」，是做規套來溝通。就算對方一時反應bē過--來，a̍h是台語聽無，看你tse表情、動作，mā大概臆有你leh講啥--ah。
