七娘媽粿

作者:林淑卿

天拄光,阮阿母就tī埕斗,咾咕石邊ê石磨頂e米,準備明仔載透早炊七娘仔粿,祭拜七娘媽。

阮祖先tuì唐山福建漳州府,渡過烏水溝來到澎湖白沙鄉,唯一無靠海ê所在安身,囝孫代代tī tsia生湠。阮庄頭ê口音kap祭拜神明ê風俗,kap隔壁庄有淡薄仔無仝款。但是,對神明敬意ê心是仝款。

阮阿母kā洗好ê在來米,按米桶盤過石磨頂,額頭大粒汗細粒汗,慢慢仔e出米漿,流落舂臼頂ê麵粉袋仔內,kā麵粉袋仔縛好,倚tī椅liâu邊,用石頭硩ám。林--家祖厝邊有兩欉百年ê粿葉樹,囡仔tī樹頂peh kuân peh低,kā上大葉ê粿葉挽tī竹籠內,紮tńg去厝--裡,準備炊粿用。

上鬧熱就是七娘媽生hit一工,阮阿母透早就kā硩ám ê米漿,liàm做細塊細塊,落鼎炒熟,起鼎nuá-nuá--leh,用棍仔摃hōo平,koh用食飯碗印模。圓圓ê七娘媽粿,代表團圓。

鼎內鋪一層粿葉仔,七娘媽粿就囥tī粿葉仔頂,鼎蓋khàm好,鼎邊有縫ê所在,就用tâm-tâm ê麵粉袋仔that hōo bā。50年代阮iáu細漢,負責顧灶火,khiú風管ê聲音,tuì大聲漸漸細聲,火就穩定。

逐年ê七娘媽生,一定ē落雨;今年奇怪--ê是,到下晡4點左右雨就停--ah。Tsit時tsūn,厝邊隔壁就kā案桌,搬去門跤口,祭品點香祈求七娘媽保庇厝內ê囡仔健康、平安。祭品有福金、七雙箸,阮阿母ē準備七碗無仝款ê手路菜。七娘媽粿是其中ê一項,面頂掖白糖kap塗豆粉;若是掖別款mi̍h件,就礙味。一塊粉餅,一條紅線,一面鏡。針線、尺kap鉸刀,是beh hōo織女裁剪新衫。水紅仔色、白色ê春仔花各七蕊,面盆té清水,鋪一條面巾,hōo牛郎kap織女,一年只有一擺tī鵲橋見面,傷心拭目屎用--ê。

拜拜ê時tsūn,阮阿母踏話頭,禁止阮囡仔厚話屎:「囡仔人,有耳無喙。」Hit時tsūn,就是阮kap厝邊隔壁ê囡仔,做伙tuì庄頭se̍h到庄尾,規陣hi-hi-huā-huā,看佗一家祭拜七娘媽ê菜料khah phong-phài,看kah吞喙瀾,tsiah甘願tńg去厝。

日頭沉落海進前,差不多5點左右,tio̍h-ài拜好收案桌。Tsit時tsūn,阮阿母kā春仔花囥tī洗面水頂面,替iáu-koh是嬰仔ê小妹,雙手放hōo輕輕,溫柔kā伊洗面、拭手,一面唸:「七娘媽suí,洗洗hōo suí。」了後tsiah輪著厝內ê阿姊洗。聽講用拜過七娘媽ê水洗面,ē親像織女仝款suí。Suà--落是縛紅線,喙唸:「絭綰(kǹg-kuānn)過後,紅kah hōo你食kah老老老。」保庇健康平安,長歲壽。

澎湖七娘媽生,由厝內女性長輩主持祭拜儀式,tshuā細漢囡仔做伙kā七娘媽祈求平安。澎湖海島生活艱苦,tī tsia生活ê婦jîn人,內內外外lóng ài ē。Tsiūnn山作穡,落海掠魚,奉待序大人,照顧嬰仔,每一位婦jîn人,若無--三-二-步-七-仔,tsiok歹擔起tsit个家。
  
七娘媽生,mā是leh記念澎湖代代母親ê偉大精神。





#台灣人寫真 專欄,本文使用教育部推薦漢字kap臺灣閩南語羅馬字拼音方案。
台文通訊BONG報330期,2021年9月出刊。


--------------------------------------------

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會



李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。