數字歌
本專欄「台羅會交流道」ê稿由台灣羅馬字協會提供kap校對，編輯部無koh做文字編輯。
It-nî ê gín-á kā kan-tan ê sò͘-jī liām-chò “chí, nn̄g, saⁿ, sì, ō͘, lá, chhih, peh, káu, chá”, nā siang-ūi-sò͘ liām, “ chá, jī-chá, saⁿ-chá, sì-chá, ō͘-chá, lā-chá, chhì-chá, peh-chá, káu-chá, chì--pah” thâu gōng-gōng... Bêng-bêng liām sò͘-jī nā-ē piàn ăi-sat-chuh ?
Tn̂g-kî kàu-ha̍k koan-chhat, gín-á pêng-siông chiok-gâu liām chi̍t-kóa hôa-gí ū-ê bô-ê ê koa-iâu, siong-tùi Tâi-gí soah piàn é-káu, kì-tî lāi chhōe bô sin-sek ê gín-á liām-iâu, khah liām tō hia-ê peh-lêng-si, hóe-kim-ko͘, thiⁿ-o͘-o͘…., in lóng bô chhù-bī só͘-í bē ài, tong-jiân ē hông kám-kak Tâi-gí lóng he kū-àu kū-chháu, lāu-lâng leh kóng ê ōe, Tâi-gí koh ū siáⁿ-mih sī kó͘-chá thoân lo̍h--lâi, ē-tàng hō͘ gín-á liām ê, góa mā it-ti̍t leh chhōe, it-ti̍t leh su-khó, siūⁿ beh kái-piàn...
Kin-nî se̍k-sū pit-gia̍p khah-ū sim-su pìⁿ kàu-ha̍k ê tāi-chì, tō lâi tián-pó chi̍t-ē, ē-tàng liān chhùi-súi cheng-ka Tâi-gí lêng-le̍k siōng tiōng-iàu ê sī pa̍t-lâng bô ê, ū-kàu chhiⁿ...
“Pe̍h-ōe-jī bûn-hiàn-koán” bāng-chām ê chu-liāu, 1959 nî 11 goe̍h Tām-chúi tiong-ha̍k Pe̍h-ōe-jī sú-liāu Iù-tī khò-pún tē-jī khò ê “Sò͘-jī koa”:
1 2 (chi̍t nn̄g) chhōe ke-nn̄g, 3 4 (saⁿ sì) gia̍h khoe-sìⁿ,
5 6 (gō͘ la̍k) khioh gîn-kak, 7 8 (chhit peh) tì chháu-le̍h,
9 10 (kàu cha̍p) hō͘ sap-sap, 11 12 (cha̍p-it cha̍p-jī) o̍h siá-jī,
13 14 (cha̍p-saⁿ cha̍p-sì ) chia̍h hê-chìⁿ,
15 16 (cha̍p-gō͘ cha̍p-la̍k) mn̂g tio̍h sak,
17 18 chē chin kheh, 19 20 chheh tō ha̍p.
Kàu-ha̍k su-kiû góa ka-tī pó͘-chhiong cheng-ka 21-30.
21 22 ( jī-it, jī-jī) lâi kiâⁿ-kî, 23 24 (jī-saⁿ jī-sì) siù chiam-chí
25 26 (jī-gō͘ jī-la̍k) o͘-ba̍k-ba̍k, 27 28 (jī-chhit jī-peh) the̍h tī ngeh
29 30 (jī-káu saⁿ-cha̍p) óaⁿ tò-khap.
Kah gín-á chò-hóe liām rap ná kín ná bān, Tâi-gí khò piàn im-ga̍k khò.
Sin-sek ê chhòng-chok sī chin-hó, m̄-koh kò-jîn khah kah-ì ū le̍k-sú sèng ê chu-liāu, tāi-piáu lán ū kú-tn̂g ê bûn-hòa té-tì, chí-sī hông pàng bē-kì niâ, lán ài kā khioh tńg--lâi. Tâi-gí sī sian-chìn tòe ē tio̍h iù-jî 0-3 hòe n̂g-kim-kî náu-tì chhì-kek khai-hoat ê tiâu-liû, gí-giân lêng-le̍k sī bī-lâi kok-chióng lêng-le̍k hoat-tián ê chí-piau, siōng tiōng-iàu ài iông-ha̍p sò͘-ha̍k, bí-su̍t, gí-giân, seng-oa̍h ê to-goân chêng-kéng kah seng-oa̍h keng-giām.
Che bûn-hiàn chu-liāu sī ta̍k-ê kong-ke sú-iōng, nā-ū lâng ē-tàng iân-sio̍k kā chiap lo̍h--khì, lán mā sī leh chò iân-sio̍k “láu-ki chiap sin oe” ê khang-khòe.
