作者：張學謙 （國立台東大學華語文學系教授）
台灣本土語言出頭天ê路--裡，拄著獨尊華語ê中國化hām傾銷英語ê國際化tsit兩塊鎮路ê石頭。Khah早，用中國化ê名義、獨尊華語ê政策，壓制本土語言，致使本土語言流失。Tsit-má雖bóng hōo本土語言國家語言ê地位，suah koh用國際化ê名義，獨尊英語，tī雙語國家政策內底，排除本土語言。
「雙語國家」政策獨尊英語，kā外語算做本國官方語言，suah kā法律認定ê國家語言拍出籠外，是價值錯亂ê語言地位規劃，嚴重妨害著台灣主體意識ê建立。Lán iáu直直等無本土語言ê轉型正義，suah有可能tī「英語上好」ê強勢潮流之下，變做海邊仔ê大水柴。
雙語國家實際上是「中英雙語國家」，行--ê是新加坡ê路。在地語言hōo華語取代--去，suà--落-來，換英語kā華語消滅。Tsit款發展m̄管是獨尊英語iah是華語，代價lóng是犧牲在地語言。2020年新加坡ê人口普查顯示，英語是家庭內底上tsia̍p使用ê語言（49.3%），華語是29.9%，若是漢語方言就kan-na賰8.7%。2009年ê資料顯示，國校一年仔tī厝內講英語ê人數teh-beh 60%。可見，無站無節擴展英語，無顧慮在地社會語言生態hām語言權利，ē hōo族群語言真緊就流失--去。
台灣應該ài智覺英語是外語、國際交流ê共通語，m̄是tī社會內底使用ê語言。台灣ê競爭力應該是台灣本身特殊ê語言、文化、藝術、傳統所培養--出-來ê創造力。雙語國家政策內底，lóng無講著國家語言ē-tàng按怎變做台灣在地全球化ê資源，kan-na講推動政策bē去危害著本土語言，hōo人真giâu疑。
台灣語言多樣性beh久長，tio̍h-ài有積極正向ê語言管理，控制強勢語言，hōo伊無法度危害弱勢語言生存，認真規劃hām照顧弱勢，tsiah ē-tàng維持語言花園ê多樣性。也就是講，需要提供上濟ê權利kap資源hōo上需要保護ê本土語言，m̄是據在強勢語言無限制leh擴張。
放棄無看見本土語言ê雙語國家政策，行向本土語言優先ê多語言國家政策，tsiah ē-tàng達成加添式ê「正面ê語言規劃」，hōo台灣ê語言多樣性ē-tàng久長發展--落-去。
（Tsit篇原文是華語，作者同意編輯部翻譯做台文發表。）
#Lán來講看māi 專欄，本文使用教育部推薦漢字kap臺灣閩南語羅馬字拼音方案。
台文通訊BONG報334期，2022年1月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
