作者：石牧民
頂回講著lán台語文、台語文學現代化ê時間tsáng頭，所要意--ê，是lán teh拍拚台語運動ê客觀環境。具體來講，就是kā目標掠穩在，kā that礙看hōo真；án-ne來拚勢做，效率mā khah kuân。
頂回專欄主人公是王育德。Lán講伊ê台文khang-khuè，離開歌仔冊出版上tshia-iānn ê時代約略50冬，猶原使用歌仔冊內底借音、借字ê步數；mā koh，伊提倡無調號、無連字號ê羅馬字系統。He m̄是teh講王育德寫台文、研究台語ê成果「效率低」。論真，王育德是tī中國國民黨迫害人民、迫害台語ê客觀條件內底，揣著在伊上有效率ê齣頭來做台語khang-khuè。Hit个獨裁政權tshûn-pān beh滅絕台語ê時代，客觀條件致使台語文、台語文學完全無資源thang好生湠。事實上，獨裁者、殖民者teh惡毒，hām「台語」、「台語文學」tsit號名kap領域to無愛hōo--你。既然無一个ē-tàng顯然講ê名來做桶箍，王育德tsit款台語運動者自然真oh結做伙。逐个人tio̍h-ài家己孤一个拍拚，對抗中國國民黨。
現此時ê客觀條件已經無仝。免講「台語文」tsit種文學有tsiânn實，我teh教冊ê台灣師範大學台灣語文學系，本身就是同齊要意語言kap文學ê科系。大學內底有教台語、台文ê科系，意思是台語、台文m̄-nā「名」好勢，mā tsiânn做穩tak-tak ê領域kap體制。是按怎行到tsit个坎站？兩个tsáng頭，有台灣心ê台語運動者加入台灣民主化ê事業。民主化就是國家lán有才調家己來hua̍t-lo̍h。Lán ē-tàng hua̍t-lo̍h了後，出tī lán家己ê意志，kā台語、台語文學hē tī起造國家ê工程內底。
Án-ne生，意思是講台語運動進展到tsit个坎站，that礙 kap「對敵」m̄是中國國民黨--ah。中國國民黨tsit-má單純是政治領域ê對手——lán hōo in選bē贏就好。台語運動ê對敵m̄是khah早ê「政府」--ah。顛倒，政府擔tī lán手頭；也就是講，lán tsit-má用ē著國家ê力頭來做台語運動。比論講大學開台語課，大學教授用全台語教課鐘點費khah kuân……。Tse lóng ē-sái講是政府用國家ê力頭teh tàu sak台語。
Án-ne來講，政府thài ē是對敵？Koh-khah免講，濟濟台語運動ê有志lóng有「政府」ê身份。（政府sak了無夠大力？Án-ne伊欠教示，iah是欠鼓勵，橫直m̄是lán ê 敵人。）Ē-sái講，tann lán teh做台語運動，bē-tàng koh用khah早對抗中國國民黨政府ê心態。
Lán需要對抗ê對敵tī佗位？就是到tann猶原kā中國國民黨洗腦ê語言意識khînn-tiâu--leh ê人。Tsia-ê人，真有可能包括政治立場kap lán sio倚ê人ōo。「台語無字」、「台語tī厝--裡學準拄煞」，親像tsit款意見，kap lán「仝國」ê 人mā不時teh講，kám m̄是？
總--是，tsit款意識形態，lán就無thang ǹg望政府用國家ê力頭去處理。因端無別項，lán是跟tuè鄭南榕ê路線起造ê國家，有法治、有言論自由。掠做台語m̄免用國家力頭來要意ê言論，仝款受著保障。言論ê對敵，tio̍h-ài用言論來kap伊輸贏。親像濟濟線頂運動者用in ê手路，hōo台語tī lán社會 ê「濃度」愈來愈厚。Tsit款基層（bottom-up）ê力頭，尾手準定ē hōo社會無法度koh假做無看著「台語tsiânn做lán文化ê底蒂」是真重要。
Tse mā是顯明，tsit-má台語運動ê挑戰，是beh hōo國家sak台語ê力頭（top-down）kap基層ê力頭ē kap縫。也就是講，勢面已經m̄是khah早基層需要對抗國家壓迫，mā m̄是beh kā國家政策ián hōo倒。國家ê路線lán無滿意，意思m̄是伊tsiânn做敵人；顛倒，是lán tio̍h-ài去kā牽。對台語khang-khuè來講，上「通用（thong-iōng）」--ê，就是有國家力頭ê系統。國家tsit-má to lán ê，伊ê力頭便便，伊揀一个方案便便。Sak--落-去，效率按怎？Lán ē-tàng kā要求。講一句khah歹聽--ê，tsit-má提iáu一个系統beh來取代便便ê系統；對台語khang-khuè來講，拄好是倒退lu。
台語文、台語文學現代化ê最後一个大tsáng頭，就是好膽來掠在政權，用國家--ê、體制性ê力量來幫贊tshui-sak台語。
（作者是台灣師範大學、靜宜大學台文系兼任助理教授）
#文學káng「台」 專欄，本文使用教育部推薦漢字kap臺灣閩南語羅馬字拼音方案。
台文通訊BONG報338期，2022年5月出刊。
------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
