作者：李玉鳳
Lín看我tsit-má喙笑目笑，好性地koh有話講，行到佗lóng有tsiok濟人圍tī我ê身軀邊。其實兩年進前，我m̄是現在tsit个款。孤癖、凍霜，koh歹鬥陣。
Ē記得hit工，小弟參加學校辦ê活動，tī外地過暝，無tī厝--裡；hit下晡我tī厝內，一下仔tshi̍h電視看bàng-gà，一下仔開冰箱提四秀仔來tām-sám，了後koh去提tshit-thô-mih仔來sńg。阿母看我做一項代誌，無十分鐘就peh--起-來，行來行去，無時恬ê型，就笑講：「按怎？Kám是想小弟？無人做伴是m̄是tsiok無聊--ê？」拄開始，我惜面皮——死鴨仔硬喙pue，講：「M̄是啊！我哪ē--leh！」
阿母切雞卵糕hōo我食ê時tsūn，就講：「小弟今仔日無tī厝--裡，規塊lóng hōo--你！」拄開始，我是tsiok歡喜--ê，哈哈！規塊lóng是我--ê！
Iáu-m̄-koh，m̄知今仔日ê雞卵糕是m̄是仝hit間買--ê，我suah食了ē uì。阿公看著我食kah憂頭kat面，就問我身體是m̄是無爽快，我ná幌頭ná問講：「今仔日ê雞卵糕kám是換一間買--ê？哪ē食--起-來味怪怪？」阿公kā雞卵糕ê包裝提--出-來，講：「明明就是仝一間買--ê，mi̍h件kap別人分享，雖然食少，m̄-koh顛倒khah芳、khah甜、koh-khah好食。」
Suà--落-來，阿公koh講，khah早阿祖，逐工lóng ē hiânn一鈷水囥tī庄頭ê土地公廟，凊彩人lim。Hit當時我就問阿祖，為啥mi̍h你hiah gōng，逐工囥茶tī hia，hōo人lim免錢--ê，阿祖就講，「你看日頭赤iānn-iānn，真濟過路客、iah是作穡人做kah汗流汁滴，我kan-na kā水囥tī hia，逐家就ē-sái止喙ta。」莫怪人lóng kā伊號做「歡喜茶」！分享是快樂ê代誌，無論是一塊餅、一个tshit-thô-mih仔，iah是一个笑詼，除了家己歡喜，別人mā tuè leh笑hai-hai，tsit種快樂是ē sio湠、sio-uè--ê。
我想想--leh了後，就kā阿公講，「食mi̍h件，有人分享，顛倒芳。阮mā是仝款，有阿弟做伴，阮兩个kong-ke sńg，一句來一句去；一半擺仔，koh ē sio-tak，其實顛倒khah好sńg、khah快樂。」阿公聽我講煞，微微仔笑，講：「阮阿孫仔，實在gâu，一下仔就知影阿公beh講--ê——分享是得著快樂上好ê撇步。」
自hit擺了後，我lóng ē紮毽子、跳索仔一寡tshit-thô-mih仔去學校，歡歡喜喜kap別人分享我ê mi̍h件。同學逐家做伙sńg，實在有夠趣味。「分享是得著快樂上好ê撇步，ē-hiáu kap人分享tsiah ē結好緣」，tsit句話實在有夠讚！
