作者：徐慧娟
我kah意行路
日--時行路曝日頭
暗時行路看月娘
熱--人ê時行路規身軀tâm
寒--人ê時行路規身軀燒
有閒ê時行路khuann-khuann仔來
無閒ê時行路ài揣空縫
一人行路自由快活sì-kè看
濟人行路有伴開講凊彩行
春天ê時行路 我看花草puh芽
熱天ê時行路 我揣金sih-sih ê海
秋天ê時行路 我khioh lak--落-來ê suí葉仔
冬天ê時行路 我愛siàn澎湖gōng風
我kah意行路 心情歡喜 健康食百二
思念
作者：晏冠仁
落雨天
落雨天
總--是hōo我想著你
Tī天頂做天使ê你
Tsit-má好--無？
你講
落雨天真顧人怨
雨絲hōo你感覺tsiok憂愁
我mā無愛落雨天
因為伊mā hōo我感覺tsiok憂愁
我ê憂愁
是因為
對你ê思念……
善霸
你ê學生講
有ê人惡事做盡
是惡霸
Kan-na你
是善霸
啥mih好代誌lóng hōo你做了--ah
M̄-koh
我甘願你無做hiah-nī濟好代誌
Án-ne
上帝就bē因為m̄甘你siunn忝
早早kā你接去天頂歇睏
Hōo我逐改想著你
心就tsiok疼……
茯苓糕
Ē記得hit年過年
你iáu-koh ē-tàng自由行踏ê時
Lán做伙去peh山
歇喘ê時
你看著有人leh賣茯苓糕
Tsiok想beh食
Suah講——
癌細胞愛食甜 我bē-sái食
後--來 你疼kah擋bē tiâu
就án-ne去蹛院
一直到上帝接你tńg--去
tsiah出院
我逐改看著賣茯苓糕--ê
Lóng tsiok想beh買hōo你食
叫我全部lóng買mā無要緊
只要ē-tàng koh看著你食茯苓糕ê
滿足、歡喜ê表情
就好……
台文通訊BONG報367期-封面作品：希望之樹
作品名稱
希望之樹
作品說明
我國校仔五年仔ê時，學校美術課老師叫阮逐家畫希望之樹，若是有一欉ē-sái hē願ê樹仔，天使ē幫助你完成願望，我想beh做一个真正ê台灣人。
#希望#台灣#獨立#自由
我tī台灣出世
我甘願死tī台灣
我是一个「正港」ê台灣人
創作年代
2024年6--月
創作形式
色鉛筆
作品寸尺
38x26cm
作者簡介
廖文綺（A-Khí），11歲，蹛tī桃園龜山，讀大崗國小，我上愛看冊、畫圖kah tshit-thô。
台文通訊BONG報367期-編輯室ê話
入秋天涼，風起雨落，〈半島蝶仔影〉、〈Khioh稻穗〉描寫秋天ê光景，〈落雨了ê khang-khuè〉、〈落雨天ê四秀仔——露螺〉uì雨去描寫台灣人ê生活。天涼gâu iau-sâi koh gâu siàu念，〈阿媽ê番麥〉、〈月餅〉、〈查埔人ê灶跤〉寫出食mi̍h kah對厝內人ê回憶。總--是khah早社會重男輕女，〈豬m̄大，大tuì狗--去〉、〈阮阿媽叫阿招〉寫kah真清楚，tsit-má lán m̄-nā ài性別平權，koh-khah ài語言平權，〈寫hōo總統ê批——uì教學現場看台語教育〉、〈母語ê美麗kah哀愁〉呼籲lán去重視tsit个問題。台灣tsit phiàn土地，有hōo lán思念ê過去，mā ài有hōo lán thang ǹg望--ê、koh-khah好ê未來。
心內話 - 一等一ê生日禮物
《一等一ê生日禮物》/曾韻瑄
阮兜ê姊夫是基督教長老教會ê牧師，為著爸母靈魂ê得救，阿姊是有喙講到無瀾，十外冬ê耐心放送，大姊hām姊夫總算kā阿爸阿母chhōa入去信仰ê世界，70歲開始，chiâⁿ做上帝ê羊仔。Hit工規家伙仔lóng到教會，參加阿爸阿母ê洗禮典禮，真無簡單。
我chit个做小妹--ê，愛súi是厝內底無人比，生囝了後，為著減肥啥mih死人骨頭lóng願意哺--落-去。健身到taⁿ， tih-beh十冬，逐擺ê訓練結束，身軀痠疼，kiōng-beh昏--去。不而過，後--來我ê辛苦有價值，我m̄-nā瘦kah súi-tang-tang，chûn--年，koh開始比健美。無論按怎辛苦kah痠疼，lóng bōe-tàng阻擋我想beh做一隻烏貓ê決心。
M̄-koh，健身hō͘我上大ê好--處，m̄是kan-ta ē-sái chiâⁿ做「天仙妖精」niâ，koh ài開始過健康ê生活，食、練、睏，ài注意kah齊全，規律ê訓練、原形ê食物、睏眠ê飽tīⁿ，筋肉一工一工訓練ê累積，年久月深，除了愈來愈妖嬌健康，無論ku、跳、走、peh iah是khiú、kōaⁿ、夯、扛，lóng輕輕鬆鬆，bōe輸20歲ê少年囡仔仝款。
所擺，若是聽著阿母講伊身軀痠疼到無一塊好，我就叫伊去健身房上課，學我攑石碾，避免骨頭hâm-sau，維持筋肉ê力量，學費我kā出，我講kah我喙角專 pho，阿母bōe-giàn去就是bōe-giàn去。
阿母雜唸ê時，真正chiok gâu haiⁿ，我聽著心狂火to̍h就khí-mo͘ bái，iáu-m̄-koh，無法度，伊是阮阿母，ài忍耐。是講逐禮拜聽伊se̍h-se̍h唸，我chih載bōe tiâu，為著我ê耳空kah健康，姑不而將，規氣來宣傳我「肌督教」ê理念，唸倒tńg--去，看kám有效。橫直，去練身體mā是痠，規工tī厝無活動mā是疼，不如試看māi，kā阿母洗腦，無的確有一工伊ē願意去。
就án-ne，想bōe到chit工hō͘我等--著--ah！
本chiâⁿ叫是「火燒罟寮——無漁網（ 希望）」，想bōe到今年tī我生日進前，阿母叫我chhōa伊去健身房，伊beh開始學習hām訓練--ah！Ai-iō，kám是有孝感動天？感謝上帝。
Hit工教練傳阿母ê錄影hō͘--我，我看伊姿勢不止仔標準，果然是練武奇才！阿母注心學，kā我臭屁講：「提兩公斤，無啥重量，bōe忝--lah！無你講ê hiah-nī仔痠疼--lah。」
多謝阿母送我生日禮物，看你認真學，食到老，學到老，為家己ê健康拍拚，做序細--ê chiâⁿ歡喜。因為無啥mi̍h比食老ē-sái sì-kòe pha-pha走koh-khah好ê人生--ah！
辛苦一世人ê阿母，ǹg望你走káⁿ-ná飛，活跳跳sì-kòe趖，訓練hō͘勇健，看lán有thang做伙koh去遊覽世界--無。若án-ne，我chit个「肌督教」ê傳教士任務就圓滿--ah！
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
做伙來唸詩 - 一个人ê下晡
《一个人ê下晡》/陳俐雯
烏雲lio̍h-lio̍h仔挲過日頭
Chhàng鬚ê燒氣沓沓仔lian--去
神--去ê頭殼用鬥搭ê節奏，
飛chiūⁿ烏phú ê雲尪
我ê翁某囝兒、親人朋友、錢財名利……
Chia一切ê「有」，kám真正是我ê？
徛踮雙叉路口
繁華鬧熱ê路--裡
車來來去去
In是beh去佗位？
Chia規路chheⁿ-cho̍h閃身ê聲
Kám是teh講人有夢上súi？
原來地動--ê是我ê心
Tòng-gōng ê頭殼tī時間ê chhoah流
勻勻仔坐清
了解無常吞食美麗是無情ê事實
明白性命在穩ê「有」是絕對ê「無」
人生在世無一項mi̍h件是我ê
Chit chōa旅程
唯一ē-tàng掌握--ê
kan-na是活--leh ê分分秒秒
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
Sann-kap讀小說 - 好天--ah（二）：日頭赤iānn-iānn
《好天--ah（二）：日頭赤iānn-iānn》
/雁翎
舊年hit套囡仔冊：《小朋友看台灣》tng-leh籌備ê時，翰翔集團要求阮每一位編輯ài先試做六頁樣稿hōo in所有部門審查，逐家看了有通過，in tsiah beh hām阮公司正式簽約。
Hit當時公司頭一改做圖文冊，逐家lóng無熟，ē-sái講是tshuah leh等。雖然桂英bat踮過本土雜誌社，秋雯進前有做七、八冬汽車雜誌，我khah gâu採訪kah寫文章，若如萍，kan-na ē-hiáu畫舞台布景……，啥人mā無把握有法度做kah hōo翰翔集團滿意，tàm頭參楊總--à合作。
按照楊總--à ê意思，阮tio̍h以手頭ê khang-khuè為重，試做ê樣稿是兼落去做niā-niā，等簽約了後，tsiah ē-tàng專心做tsit套新冊。我pun著做贈書《台灣se̍h透透》，桂英做《台灣原住民：阿美族》、秋雯做《台灣ê河川：濁水溪》、如萍做《台灣人ê生活：kám仔店》、那竹欣hām經理負責一本《台灣ê外來文化：建築篇》。公司kah翰翔hia-ê大粒頭有明呼：出刊號先出版贈書hām兩本新冊。了後五个編輯逐個月一人做一本，上尾--à tsiah由翰翔派人來審查，選四本出版，另外一本做上bái--ê ài重koh調整，hit个編輯後月日就bē-sái pun新題目hōo--伊，伊ài將手頭ê冊做kah通過tsiah ē-sái。萬一修改一個月koh無過關，án-ne生就ài鼻仔摸--leh tńg去食家己。
俗諺講：「日頭赤iānn-iānn，隨人顧性命。」逐家lóng beh展出工夫kah伊拚。Hit時我特別無閒，一方面有翻譯冊ài做，一方面手頭也有一本大總舖師教人按怎煮料理ê《台灣第一味》leh進行，出去採訪阿津師有食koh有掠我是tsiok kah意，m̄-koh《台灣se̍h透透》我tsiah kā文稿寫好niâ，看別人已經開始叫人來畫圖--ah，愈想愈煩惱！
頭一回hām翰翔ê高層開會，逐家先交出試寫ê文字稿，只有我kah那竹欣一聲就通過，koh hōo總編輯呵咾kah ē tak舌，桂英in三个lóng ài退回重寫，如萍當場目屎四lâm-suî，桂英忍kah散會了後tsiah走去便所哭。
「Án-ne生，無我ê代誌--ah，我是一个文字編輯，賰--ê lín家己想辦法。」那竹欣tsit句話講煞，隨tāi-sù-ki beh來走。看伊生做suí-tang-tang，穿插mā kài高尚，不而過講話siunn sáng勢，莫怪經理m̄敢叫伊來上班，一寡人liam-mi hōo得失了了。
Hit-tsūn仔編輯室頂kuân有三个低氣壓形成，是m̄是ē變做風颱？Ài koh觀察tsiah知影。桂英in一直掀冊、揣資料，一工到暗三个人tshi-bú-tshi̍h-tshū leh討論beh按怎重寫，ná像驚hōo我聽--著siāng款。我tsiah無興趣偷聽。楊總--à koh huan咐我處理伊科技公司hit爿辦活動ê文宣kah海報，我創kah無閒tshih-tshih，啥人食飽siunn閒愛管別人ê閒仔事？
「講話ē-sái khah細聲--leh--無？吵死人！」我tng-leh hām華藝ê黃經理講電話，參詳海報ê色緻，秋雯雄雄huah一聲，害我tshuah一tiô。
我心內tsiok無歡喜，lín家己愛開「niáu鼠仔會」，參我啥tī代？我講一下仔電話也ài lín管！——真是「bē生牽拖厝邊」！家己寫bē出--來suah想空想縫beh揣人ê麻煩。
有tang時仔我顛倒khah想beh去華藝看稿，無愛留tī公司。經理kah伊ê助理依婷是tsiok心適，逐家hi-hi-hua-hua真趣味。若想著beh入去hit間編輯室我就頭殼疼，講話ài輕聲細sueh，行路bē-sái粗跤重蹄，明明是一隻虎suah hōo人關入籠仔底，tsiânn艱苦！
最近一直tn̄g著一寡仔怪事，hōo阮想lóng無，到底啥人孝飽hiah閒？一工中晝雨來ta̍p滴，我kah依婷beh出去食飯，發現我囥tī樓梯頭ê雨傘無--去，按怎to揣無，別人--ê iáu好好tī--hia。Suà--落-去是下班時，我ê鞋仔又koh m̄知走去佗位，食晝hit-tsūn也有穿，tsiah過幾點鐘久就失蹤--去--ah。經理有去問厝邊頭尾，in講蹛幾若十年m̄ bat聽過tsit款代誌。
「“歹年冬，厚痟人！” 啥人手tsiah賤，無偷提人ê mi̍h件是ē死--ooh！Ē做賊仔koh tsiah m̄ bat貨，lín祖媽ê名牌貨無提，suah去提hia-ê普通貨色……」，經理徛踮樓梯頭氣phut-phut，罵hōo空氣聽。
依婷叫我去告經理，講伊雖然是beh替我出水，m̄-koh發言無適當，顛倒hōo我ê雨傘kah鞋仔受著二度傷害，hōo人偷提--去準拄煞，koh hōo伊講是「普通貨色」。
「歹勢！歹勢！我m̄是講你ê mi̍h件bái ，是講hia--ê無值錢……」經理一下氣--著烏白罵、lām-sám講，落尾--à連伊家己to起愛笑，無愛替我討公道--ah。M̄-koh伊叮嚀我出入ài細膩，上驚是拄著變態，若無，一般正常人應該bē去偷kuānn人ê鞋。
楊總--à上厚話，竟然kā我hit工穿經理ê淺拖仔tńg--去ê見笑代講hōo吳副總聽，副總--à叫阿洲三不五時tio̍h uat過來看--我。阿洲見若來就講副總--à派伊來--ê，bē輸伊是奉命行事，姑不而將tsiah來--ê。
後--來我kā《台灣se̍h透透》試做稿發hōo一个小學老師白崇德畫圖，伊先提三張大圖來交，畫風kah色彩我lóng tsiânn欣賞。依婷講伊生了kài緣投，我看hām我ê阿風老師bē比--得！
Tsit站仔桂英in三个lóng tsiok uànn走，秋雯先去載in後生來陪伊加班，為著beh替公司爭取tsit个大案件，逐家lóng liâu--落-去--ah。
我hām白老師tī會議室開講到9點外，上尾--à順suà坐伊ê車去捷運站。我想講坐捷運khah緊到厝，免得逐工hiah暗tńg，hōo阿母唸kah teh-beh臭耳聾--去。
隔tńg工，秋雯走來kā我講：「查某囡仔人ài khah檢點--leh，人白老師已經訂婚--ah，m̄-thang參人膏膏纏。」
我聽無伊leh講啥，臆講無的確是進前in翁外口有查某，所以鬧kah離婚，伊tsiah ē走來kā我講tsia-ê五四三。貧惰tshap--伊！In三个lóng siāng款，親像外面ê天氣變來變去，liam-mi落雨，liam-mi好天，hōo人sa無tsáng！
後--來白老師suah來「失蹤」--去--ah。M̄知按怎就是揣無人，電話、手機仔無接，電子批信、訊息mā lóng無回。我ê大圖畫好，小圖iáu未畫，是tio̍h急kah beh害--去。連suà揣幾若个人來畫，結果全仝款——允人tiānn-tiānn，誤人空行。
依婷趕緊替我聯絡一个外號「孝呆」ê大學生，伊也是公司bat接觸--過ê插畫家。伊苦勸依婷：「免白了工--ah！Hit个楊筱雅做人siunn失敗，無人敢kah伊合作。」
Beh按怎？桂英in三个ê圖lóng提--tńg-來--ah，明仔載就beh開始排版。我ê文稿上早寫好，tsit-má suah拄著無圖thang用，後禮拜一翰翔隨beh來看樣稿，若做bē出--來tsit聲規盤害了了。
「筱雅，你到底得失著啥mih人？愈看愈感覺是有人刁故意beh kā你創空……」，經理問--我。本來經理beh替我處理畫圖ê代誌，啥人知那竹欣雄雄khà電話來ná哭ná講營--ā雄雄死死昏昏--去，tsit時tng tī病院急救。經理bē顧得hiah濟，隨拚去看伊ê心肝囝。
Koh過兩工，桂英in ê樣稿全處理好勢--ah，拜五暗仔三人準時5點半下班。我仝款揣無人thang畫圖。經理留tī病院照顧營--ā，楊總--à ài tńg去陪in查某囝，tsit兩翁仔某連suà兩日無看著人影，我hām依婷bē輸是tū水ê人tī tsia bo̍k-bo̍k泅，真正是「叫天天bē靈，叫地地bē應」！
人講：「使豬使狗，不如家己走。」落尾依婷thīn我到底，阮決定家己來畫。
我ê《台灣se̍h透透》內底有三个主角：阿三哥、十一妹kah大嬸婆，故事是寫in tshuā小朋友去台灣滿sì-kè se̍h透透。「Án-ne lán先來畫tsit三个主角，參考資料早就tshuân便便，只要照畫就好--ah。」
外口teh-beh落雨--ah，阮mā懶屍出去食暗，規氣落去樓跤超商買泡麵tńg來泡。食飽了後，kā門關hōo好勢，兩人bih入去會議室穩心仔來大畫--一-下。阮講好下暗beh拚暝工畫hōo好，「我來khà電話約阿洲明仔載頂晡10點排版。」
一切安排妥當，依婷講伊beh畫十一妹tsit个suí姑娘仔，我看大嬸婆應該khah好畫就先畫，賰hit隻阿三哥tsiah來想辦法。
拄仔開始畫kah tsiok tsheh心，一直怨嘆家己哪ē tsiah hân-bān，sian畫to畫無一个款，畫了拭掉，拭了koh再畫……m̄知tī-tang時tsiah ē畫出一个樣來？
外口雨水ta̍p-ta̍p滴，會議室內時鐘ê聲音聽kah現現，時間一分一秒一直過，阮ê手m̄敢停--落-來，一筆一劃，ná畫ná看，ná改ná畫，無要求tio̍h畫偌suí，大約仔有七八分成就ē-sái。
到9點外，阮對家己愈來愈有信心--ah，感覺外口ê落雨聲koh不止仔有hit種詩情畫意ê氣氛，尾--à suah hōo一直tân bē煞ê電話聲破壞了了，本來拍算無愛管待--伊，依婷講kám ē是楊總--à khà--來，姑不將kā接起來聽。
原來是阮ê救兵到位--ah。阿洲騎車tuì外口經過，看著公司火光光，臆講一定是我kah插畫家leh加班，khà電話問tsiah知是阮家己來。伊只好起來tàu跤手。
「Án-ne阿三哥交hōo--我。我mā bē-hiáu畫，m̄-koh ke一个人ke一份力量。」
阿洲真是謙虛。其實伊畫了tsiânn讚，三兩下手就畫好勢，koh替阮kā十一妹kah大嬸婆調整kah活lîng-lîng。落尾--à漆色ê khang-khuè當然是交hōo伊，阮兩个bāu做雜差仔，phâng茶、倒水、洗畫筆……ná像伊ê小書僮siāng款。
阮三个ná畫圖ná開講，一目nih仔已經半暝2點thóng--ah。佳哉今仔日是拜六，阮koh有兩工ē-sái完成tsia-ê khang-khuè。
大功告成ê時，已經3點--looh！阿洲問阮beh按怎tńg--去，依婷家己騎機車，m̄-koh我無公車thang坐，所以伊ài留落來陪--我。「Lín兩个beh留tī tsia？若是偷kuānn鞋仔ê變態koh來，beh按怎？」
「烏鴉喙！Mài kā人heh驚好m̄好？」
「我看我tio̍h “送佛送tsiūnn天，好人做到底”！Beh蹛公司，我陪--lín。」
阮畫kah腹肚iau--ah，就去冰箱提飲料出--來，配經理拜拜ê糖仔餅食。本來阿洲beh落去超商買『關東煮』，阮兩个驚kuānn鞋仔ê變態koh出現tsiah無愛hōo伊離開一跤步。
拜一楊總--à tshuā阮五个編輯去翰翔集團交試做ê樣稿，結果當然是tsiok成功--ê。In隨約楊總--à三工後就ē-sái簽約，tsit套冊確定beh交hōo阮公司來做。逐家歡喜kah笑hai-hai，第一擺發現我kah桂英in三个mā有立場仝款ê時tsūn，hit種感覺tsiok奇妙，ná像明明leh落雨sap仔，天頂suah出淡薄仔日頭花，beh講是雨天ē-sái，beh講好天也可以。
開會煞，楊總--á hām王董--à koh有代誌beh講，那竹欣ài去病院參經理換班，桂英in pâ駛車來載阮tńg公司。一路上in三个一直詼我「三劍客」ê代誌，我想講交ē過就好，beh按怎講由在--in！佳哉阿洲有--二-步-七-仔，若無阮「三劍客」出馬，tsit聲正經無救--ah。
啥人知tńg到公司隨去tn̄g著一tsūn捲螺仔風，一聲kā我捲到天邊海角，一下摔落地頭眩目暗，滿天全金條，beh sa無半條……。
「筱雅，……有一个痟婆beh揣--你，hia！」經理iáu未到位，依婷偷偷仔走來我耳空邊講。
「我是楊筱雅，請問你揣我有啥mih代誌？」
「楊筱雅，你tsit个狐狸精！白崇德是我ê未婚夫，請你m̄-thang koh再kah伊交纏。你án-ne綿死綿爛硬beh倒jiok--伊，已經造成阮真大ê困擾……我今仔日來是警告--你，你m̄-thang敬酒m̄食beh食罰酒，你若koh m̄放伊煞，我就去法院告--你……」
「小等--一-下，請你kā話講hōo清楚，我kah白老師……到底……有啥mih代誌hōo你tsiah-nī掠狂？」
原來伊就是白老師ê未婚妻，掠準講我是白老師外口ê女朋友。Tsit聲誤會大--ah！進前我是一直khà電話hōo--伊無m̄-tio̍h，m̄-koh he是為著beh催稿；寫批？我kan-na寫電子批信，koh有寄訊息hōo--伊，我無寫啥mih「情批」hōo--伊！
對方隨提出一大疊證據，講一工寄一張，名寫「楊筱雅」，地址是阮公司，重點是tuì阮公司對面hit間郵局寄--出-去--ê。
「無可能！我m̄ bat寫批提去郵局寄hōo外編人員，而且tse用電腦拍字--ê，按怎證明是我寫--ê？」
「楊筱雅，你敢做m̄敢擔當！」看伊惡khia̍k-khia̍k，親像beh kā我拆食落腹siāng款。
「拜託--leh！依我楊筱雅ê眼光，lín兜白老師，無夠看！照我楊筱雅ê文筆，tsit款情批siunn低路！所以絕對m̄是我，歹勢，你揣m̄-tio̍h人--ah！」
對方氣到tè，koh提出另外兩項證據，tsit聲換我雞喙變做鴨喙，無話thang講--ah。
「Tse雨傘，tsit蕊珠仔花，kám m̄是你--ê？哪ē tsiah拄好lak tī白老師ê車內？」
「我ê雨傘，tse是我鞋仔頂kuân ê珠仔花……hit暗是白老師載我去捷運站，m̄-koh雨傘kah鞋仔進前就拍無--去……。」
Suà--落-來，變成所有ê人（桂英、秋雯、如萍，連桂英爸--ā mā入來tàu鬧熱）做伙「公審」--我，十喙九kha-tshng，罵我無應該介入別人ê感情。我有話無tè講，依婷想beh替我講話suah m̄知beh tuì佗講起。
「Án-ne我來走ē-sái--無？」Hōo in逼kah我進無步、退無路，只好選擇離開公司。
最後，我tsiok凊心--ah。楊總--à kah經理當然是無beh hōo我辭頭路，m̄-koh in mā無按算beh調查tsia-ê怪代誌，ài我當做一切lóng真正常，雨傘kah鞋仔家己ē生跤走去白老師ê車底，電腦家己ē寫情批提去郵局寄，hit个未婚妻是家己懷疑tuì我tsia來……我tsiah m̄相信，世間哪有tsiah hàm古ê劇情？
尾--à我決定放棄tsit份khang-khuè。雖然楊總--à、經理tiānn-tiānn khà電話來關心--我，m̄-koh想著in bē-tàng還我一个公道，真正bē堪得氣！我心肝掠坦橫，m̄信離開明翰文化就ē iau--死。
半個月後，依婷mā無做--ah。伊儉有夠錢，拍算beh家己開店賣飲料。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
心內話 - 仝心就仝面
《仝心就仝面》/蕭文興
真濟人hònn玄leh問：「Lín to就已經有兩个查埔囡仔--ah，為啥mi̍h koh beh去pun一个查某囝？萬不二伊若知影家己ê身世，kám ē就離開--lín？」差不多18年前，阮透過兒童福利聯盟pun著一个查某囝了後，tsit个問題直直hōo人問起。
論真講，其實tsiânn單純，阮翁某想beh koh愛一个查某囝，驚又koh生著查埔--ê，規氣用pun--ê khah妥當。而且ē-sái hōo一个需要家庭ê囡仔有一个閃風ê港口，mā是一件好代誌。有後生koh有查某囝ē ke tsiok圓滿。阮爸母知影了後mā真認同。
領養ê過程無hiah-nī簡單，tio̍h-ài經過面試、上課、考核、鬥對、試養、法院判決等等ê法律過程，足足過兩年hiah久，tsiah提著一張薄薄ê法院證明，比家己有身生--出-來--ê koh-khah oh，實在有夠歡喜。
查某囝tshím來ê時tsiah一歲外，伊生做古錐巧神，看著人lóng是笑bi-bi。因為厝內雄雄ke一个囡仔，厝邊看阮某ê眼神感覺奇怪奇怪。有一个oo-bá-sáng細聲問講：「是偷生--honnh？哪ē無看著你大腹肚？」後--來伊知影是阮pun--ê，tsiah無繼續leh tshi-bú-tshi̍h-tshū。有一工beh暗仔tshuā查某囝去社區一樓散步，厝邊阿婆問講：「Hit个是lín查某孫--ooh？」我講：「無--lah，是阮查某囝--lah。」
阿婆繼續講：「看bē出--leh，kánn-ná是lín查某孫--neh！」我笑講：「伊減我45歲，做阿公mā ē得過--lah！」想bē到查某囝來，我隨變做少年阿公。
有人煩惱血緣ê問題講，萬一若是有一工冤家ê時，伊氣phut-phut講：「我m̄是lín親生--ê，lín mài tshap--我」，beh按怎？Kám ē頭越--leh就走？電視劇真濟lóng án-ne搬--neh！Tsit方面阮自伊細漢就不時kā伊講：「你m̄是阮親生--ê，m̄-koh上帝tsiok疼--你，hōo你比一般人koh ke一對爸母來惜--你。」「無m̄-tio̍h，你m̄是uì阿母ê腹肚生--出-來--ê，m̄-koh的確是阮心肝頭生--出-來--ê--őo！」——tsit句話，是我想好tsiok久ê答案。
前一站仔，阮翁某結婚30年tī教會慶祝，規家伙做伙hip相做記念ê時，tsiok濟人leh問講：「伊kám m̄是lín pun--來--ê？哪ē kah媽媽生做hiah-nī成？」阮某應講：「Suah m̄知影 “仝心就ē仝面”--lah！Hah hah！」舊年阮查某囝接受訪問ê時講：「我知影我是阿爸阿母pun--來--ê。進前ê性命親像一tsuā冒險ê旅途，khah早是in照顧--我，後擺in食老就換我來照顧--in。」聽--著阮翁某目箍tâm-tâm！見若心內有惜疼，親情感情就bē散！領養tsit件代誌實在是值得逐家來tshui-sak。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
心內話 - Hit年中秋tī三貂角
《Hit年中秋tī三貂角》/賴恆黎
Bē記得hit年ê中秋有看著月娘--無，kan-na ē記得規家伙仔tsiú做伙，幸福、安心ê感覺。
阿爸是職業司機，阮自細漢看伊pháng ha̋n-tóo-luh m̄ bat停--過。Uì駛貨車載貨，到駛校車載學生；uì南部來到台北，一直到考入去日本商社駛公司車，阿爸ê khang-khuè tsiah khah快活。
雖然講食公司ê頭路khah穩定，m̄-koh上下班時間mā tiānn-tiānn leh變動，ài看用車ê部門按怎安排。有tang時仔是透早，載部長去摃goo-lú-huh；有tang時仔是暗時，載處長去應酬，uànn-uànn tsiah有thang tńg--來。啊若無出車ê時間，就ài洗車、拭車，隨時kā車準備hōo好。唯一ê好--處是，阿爸ē-sái kā車駛tńg來厝--裡囥。所以，若都合ē拄好，阿爸就ē tī歇睏日載阮出去tshit-thô。
Hit年ê中秋，阿爸載阮去北海岸tshit-thô，下晡歇tī三貂角海邊，等日頭落山beh看月娘，koh beh過暝等看日出。Ē記得我拄讀國中，兩个小弟iáu leh讀小學，kánn-ná是中秋歇煞就beh考月考ê款，我m̄-tsiah ē紮課本出去讀。我tī車頂讀冊，thìng候mi̍h件tshuân好，阿母tsiah叫我落車去食。
阿母tshuân tsiok濟好食mi̍h，連月餅mā是家己做--ê。阿母ê月餅，皮是tīng-khok-khok，紅豆餡是滿kah tsuh--出-來，雖然無像店--裡賣--ê hiah-nī芳koh suí，阮mā是一下仔就hut了了--ah。逐家ná食ná聽阿爸講故事，thìng候天色暗--落-來，阿爸就用車燈來tshiō光。Tsit个光suah hōo阿兵哥走來巡，好佳哉伊無beh kā阮趕走，kan-na交代講海邊有管制，bē-sái有光。阮只好kā mi̍h件收收--leh，勼tńg去khû tī車頂。
阮坐tī車--裡，繼續開講、講故事。講--leh講--leh，我ê目睭皮愈來愈重，無偌久就眠--去--ah。坐leh睏，當然無親像倒tī眠床hiah sù序，m̄-koh海邊仔草埔內蟲thuā ê聲，tshap-lām海湧ê聲，tsiânn做hōo人輕鬆ê交響曲，iáu-koh有阿爸、阿母、小弟lóng tī我ê身軀邊，hōo我真安心好落眠，án-ne一下睏就睏kah日頭出--來tsiah精神。
阿爸bat tshuā阮去真濟所在tshit-thô，m̄-koh我印象上深--ê就是tsit擺。阿爸bat講--過，規家口仔beh tī仝一pha電火下跤食飯，真無簡單。阮mā真珍惜，年仔節仔lóng kā大大細細箍--tńg-來，kah阿爸阿母做伙食飯。M̄管食好食bái，阿爸阿母看著序細平安健康，士農工商有出脫，就真歡喜。Tse tsiah是團圓ê意義。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
台灣人寫真 - 新竹米粉寮ê東德成米粉
《新竹米粉寮ê東德成米粉》/蔡秋芬
「Uah！米粉炊好--ah！細膩，ài退後--ōo！」炊米粉ê lâng-sn̂g大門一下開，工廠內底即時白煙phōng-phōng-ing，大人囡仔ê心肝tsiâu tuè leh phi̍h-pho̍k-tshíng。9月份培育台語家庭計畫ê台語導覽，新竹市本土語推廣協會tshuā逐家來到南勢米粉寮內中唯一iáu願意hōo人參觀ê「東德成米粉工廠」。
傳承四代ê東德成，今仔日是第三代頭家親身出馬為阮紹介開破。頭家講，做炊粉無啥mih撇步hām獨家祕方，伊ê米粉kan-na在來米kah水niā-niā，米是彰化hia農會ê米，水是政府ê自來水kā hiânn--過，獨獨一項ài斟酌細膩--ê，是米粉kám炊有透、炊有熟，掠外就無別个mê角。
阮事先去稽考ê時，是先熟sāi頭家娘，伊講起做炊粉ê往事，uì透早4點半開始e米，直直到beh倚10點出爐，長時間以來身體hām精神tsiâu是tsiânn大ê負擔，頭家koh bat因為siunn過忝頭，致使破病入院修養。後--來阮koh去過幾改，沓沓仔ē-tàng hām in ná朋友án-ne開講拍lā涼。阮問--in：「Lín規家伙仔lóng是新竹在地人，tio̍h--無？因為lín ê台語lóng是新竹腔！」In講：「Tio̍h--啊，阮lóng新竹在地--ê。」
一點鐘ê行讀kan-na ē-tàng看著「uì攪粿tshè、kā硩hōo tsa̍t腹、到tàn入去tsinn出一條一條幼幼ê米粉、sak入去lâng-sn̂g炊」ê過程，就算án-ne，uân-á是一步一步tsiâu tio̍h人工，莫怪進前上kài tshia-iānn ê時、bat有百幾間ê南勢米粉寮，現此時已經賰無十間--ah。
「Tsit-má逐家lóng改用機器leh做--ah，我tsia是唯一傳統iáu用人工--ê，mā ē-tàng講是全台灣上細間--ê。我逐工ē-tàng做偌濟就偌濟，siunn濟我mā做bē去。」頭家喙ná替阮解sueh，手ná nuá粿tshè。
等待ê làng縫，阮tshuā逐家行跤花到附近ê土地公廟歇涼，「十冬前，tsit箍圍仔ê厝，壁面頂lóng全全是leh畫米粉製作ê過程，逐家tsit-má看--著ê停車場tsit phiàn地，khah早就是leh曝米粉ê所在。」阮kí遠遠ê壁堵hām家己所徛ê位置，提進前ê相片hōo逐家來對照hiàng時hām tsit-tsūn。「是--ooh！Uah！阮lóng無注意--著！」
行踏過愈濟傳統市場kiau店家了後，阮愈來愈感覺著有ê mi̍h件，若是tsit-má無kā記錄--落-來，無的確真緊就ē消失kah無影無跡--ah。逐日現做、流汗流滴、純手工、百分之百純米ê tâm米粉，m̄知影十年後，lán iáu 有機會食--著？
米粉寮哀歌
五十年代水田規phiàn
日頭tshiō--來青ling-ling
客雅溪（Khiah-á-khue）坐清but-but甜
九降風吹天時地利
南勢在來米下港tia̍h
崙仔蓬萊米厝內用
郭--家祖厝五合院
正身護龍上尾間
家家戶戶米粉廠
頭喙手工步步khînn
炊粉oh趁厚工費時
Iau bē死 脹bē肥
中秋清明霜風gàn
米粉jió-toh第一等
透風ê時水粉日
炊粉thìng候風微微
百外間ê工廠ba̍t-ba̍t是
米粉寮米粉埔全台tshìng
六十年代米價起
番麥粉lām-sám成事實
人工傷重機器進
公道三1一通地值錢
Hiàng時曝米粉ê美麗光景
現此時kan-na賰相片
南勢米粉寮ê繁盛tshia-iānn
永遠活踮序大in ê夢--裡
1 編註：新竹市一條路ê名。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
訂閱：
意見 (Atom)