《台文通訊》30歲賀詞

《台文通訊》30歲

鄭良光（《台文通訊》創辦人、第1期～50期總編輯）

智慧者teh問

Lín tùi佗位來？

Beh tùi佗位去？

藝術家講

阮來畫一蕊花

獻hō͘台語文運動者

文學家講

阮看著「hō͘人驚惶ê美麗」

大開ê花蕊　thián到盡磅

Theⁿ（撐）tī烏暗暝

Kám ē隨時lian--去？

運動者講

阮感受著　台灣魂ê性命

無保留　無計較

歡喜甘願

Teh展in最後美麗ê形影

遠遠一陣囡仔兄teh hoah

囡仔王子mài koh藏--ah

做伙來扮公伙仔

Lín ê故事台灣人m̄知

Lán kā寫--落-來

人間30年，世間3,000年
——賀《台文通訊》創刊30冬紀念

李勤岸（《台文通訊》第51期～68期總編輯）

有人ē-tàng算出lán人ê寵物，講雖然飼五冬，等於lán人ê 50歲。我ē-tàng算出lán辦ê台語文刊物，一冬等於100歲。所以《台文通訊》tī人間辦30冬，就ē-tàng流傳世間3,000冬。

《台文通訊》所主張ê漢羅書寫文體，相信m̄-nā是現此時台文書寫ê主流，mā是有可能流傳萬世代ê台語文文體。

台灣語文香火ê傳承

蘇正玄（《台文通訊》第69～96期總編輯）

今年是《台文通訊》30週年紀念。非常感謝「李江却台語文教基金會」tī 2011年年底接手《台文通訊》ê編輯工作。後--來kap《台文BONG報》合刊做《台文通訊BONG報》，chiâⁿ做台語文學化ê專業雜誌，hō͘《台文通訊》chit pha延續台灣語文香火ê「火種」，ē-tàng繼續thn̂g--落-去。

30冬ê祝福

張秀滿（《台文通訊》第97～118期總編輯）

時間過真緊，一目nih，《台文通訊》創刊到taⁿ已經30冬！我真榮幸bat參與《台文通訊》編輯ê khang-khòe，koh擔任過總編輯，tī chit中間我學習真濟，真寶惜chit个經驗。 一粒種子，puh芽成長，祝福伊繼續大欉，開花結子！

祝福《台文通訊》30冬

葉國基（《台文通訊》第119-142期總編輯）

嬰仔iⁿ-iⁿ睏，一暝大一寸 

一目nih 30冬，嬰仔變大人

30个春夏秋冬

海外轉戰tùi美國L.A.

Ha-óa-ih到Tho͘-lún-tho͘h

Taⁿ親像salmon來歸鄉

祝福《台文通訊BONG報》30冬

生湠無停，tī Formosa故鄉

感謝逐家為台語付出

吳宗信（陽明交通大學機械工程學系教授，2021年8--月起接任國家太空中心主任）

《台文通訊》已經30年--ah！真無簡單，感謝tī chit个過程中所有有志辛苦堅持ê付出。伊是我出國讀博士，開始有台灣意識以後，第一本接觸ê台語文月刊。透過伊ê文章，我學習著正確ê語言態度，也就是文字是使用來記載語言最主要ê元素（聲音kap語法）ê工具。所有ê語言lóng是平等--ê，mā hō͘ 我對台語復興ê態度kap做法提供健康ê養份。

最後，願伊thang繼續發行--落-去直到永遠，chiâⁿ 做一本有影響力ê《台文通訊》。

島內、海外sann結連復振台語

周清玉（台灣母語聯盟理事長）

30年前ê台灣，tī kan-na ē-tàng講所謂ê『國語』ê年代，台灣人bē-tàng講家己ê台灣話；海外kap島內ê人民，人雖然分離，心猶原sann結連，創立《台文通訊》，tse是真寶貴ê感情kap智慧！連續30年海內外sann連無歇無煞，是偌濟人ê疼惜、努力kap堅持！阮ǹg《台文通訊》團隊致上大ê尊敬kap感謝！ 

好佳哉！台語文火脈無hua--去，漸漸愈濟人覺醒，加入台語文復振ê隊伍。台灣母語聯盟全體lóng ē跤步同齊，做伙拍拚！台灣人加油！

推動文字化hām文學化ê重要

鄭麗君（青平台基金會董事長）

我tī文化部長任內bat參與推動《國家語言發展法》ê立法，助力各族群語言ê復振、傳承kah繼續發展；深深體會著：若無《台文通訊》30冬來tshui-sak台灣本土語言ê文字化hām文學化，tī-leh民間粒積ê khuì力，lán tī體制內mā無才調進一步tshui-sak改變，實行文化平權。

我真愛kah家己ê囡仔講台語。邀請逐家做伙支持《台文通訊》，hōo koh-khah濟台灣囡仔thang有自信來講家己ê母語，寫家己ê文字。

邀請逐家來sio-kīng

陳柏惟（立法委員）

《台文通訊》創刊號是1991年出刊，伊有親像puh芽mā親像火種ê logo。古早人講「三十而立」，tsit份刊物tsiah濟年來猶原無bē記得當初ê目標kap理念。Ǹg望《台文通訊》thang繼續成長、大欉，延續本土語言ê香火。邀請逐家來sio-kīng，做伙來生湠台語文化到萬世代。

母語傳承，文化記憶

林昶佐（立法委員）

《台文通訊》今年30歲--ah，tse原本是鄭良光、李豐明等前輩成立ê「台文習作會」當年tī美國L.A. tuì學習台語電腦文書開始，進入台文書寫、台語文學賞析，進一步串聯台灣kap美國ê台文團體、學術研究等，為30年前hit个台灣劇變ê年代，留落一phiàn phong-phài ê母語塗壤。

《台文通訊》就tī tsit phiàn塗壤中puh-ínn、大漢，tsiânn做現存iáu teh發行中、上長久ê台文刊物。Tsit份刊物m̄-nā是一份母語傳承ê火種，koh ē-tàng hōo lán透過其中ê作品看著30年來台、美兩地，台灣人ê思維想法、生活習慣等文化記憶，tsiok值得逐家來讀、大力支持！

普及台文書寫，建立民族主體意識

楊大正（滅火器樂團團長）

台灣語文ê斷種危機，一直是濟濟朋友擔心ê問題，少年世代聽無，無願意講ê狀況確實hōo人憂心。

是講tsit幾年有真濟tsiok受歡迎ê藝術作品，無論是電影戲劇iah是音樂，lóng是全台語--ê，雖然危機原在，但是我認為無需要過度悲觀。

李江却台語文教基金會久年來一直tī台語正字ê讀寫系統上，扮演非常重要ê角色，透過普及近代台文書寫ê形式，建立台灣語言ê民族主體意識～《台文通訊》是近代台文運動上重要ê台文刊物。

請逐家繼續支持

吳永吉（董事長樂團團長）

講台語，hōo我有自信，唱台語，hōo我有靈魂。 

《台文通訊》30年，逐家繼續支持30年。

-----------------------------------------------------

#台文通訊30歲 專欄。 

台文通訊BONG報328期，2021年7月出刊。

歡迎捐款贊助　#李江却台語文教基金會　（捐款thang抵稅，匯款了後請通知02-23112199）

線上捐款(定期定額) https://ppt.cc/fF5bhx

線上捐款(單筆) https://ppt.cc/fcycox

有固定的長期捐款， 讓更多的台語文相關計畫可以穩定的推行，感謝逐家。

郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會

李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。

《台文通訊》30週年慶祝會ONLINE

2021/7/3 拜六

暗時10:00-12:46

主  持  人／張秀滿（《台文通訊》第97～118期總編輯）

                    陳豐惠（李江却台語文教基金會執行長）

重點記錄／吳宛霖

1991年7月初1《台文通訊》第1期創刊，開創一條新時代ê台語路，tsit條台語路按海外拚到國內，tī 2012年kap《台文BONG報》合刊，tsiânn做《台文通訊BONG報》，到tann 2021年7--月也已經滿30冬--looh。因為防疫緣故，透過網路，tī線頂來慶祝。2021年7月初3拜六暗，愈uànn愈ka-ia̍h，有超過260个參與者，有按30年前拍拚到tann ê開路先鋒、有各行各業一直關心台語文未來運命ê事工支持者，mā有少年輩，慶祝會先按東方白ê詩歌〈上媠ê花〉來起鼓，連結海內外台灣人共同保守lán母語上suí ê花。

林皙陽（美國Long Island教會牧師、李江却台語文教基金會創會董事長）：

30年前《台文通訊》創刊受壓制，有一陣疼台灣、疼台語ê同志tàu牽成，看見濟濟人行--出-來，有人出錢、有人出力，做伙圖謀台語文ê事工。30年後，看著濟濟台文作家，ǹg望台語進步、koh-khah有前途。

鄭良光（《台文通訊》第1～50期總編輯）：

30年前《台文通訊》tī洛杉磯創刊，想bē到薄薄八頁半ê地下式刊物，到tann tsiânn做歷史上長、發行量上大ê台文刊物；看著tsiah濟少年人參加，相信lán台語文化香火有機會傳--落-去。Lán所做--ê m̄-nā是傳承台語文化，mā是beh講一段台灣人m̄知ê故事。

林昶佐（立法委員）

——台語家庭ê酸甜苦hiam：

為啥mi̍h我beh培養台語家庭？我是阮阿媽tshuā大漢--ê，對語言有特別ê感情，語言m̄-nā是對國家ê認同，mā是對厝內人、親情ê認同，我beh kā tsit種認同感hōo我ê序細感受--著。規家伙做伙學一項代誌是tsiok心適--ê，增加翁仔某之間ê趣味，開創kap囡仔之間ê互動，是一个真珍惜ê緣份。

吳景裕（筆名陳雷，台灣文學作家）：

30年前有一寡人看台文漸漸無--去，出版台文雜誌救台語。《台文通訊》是語言ê運動，感謝濟濟少年人ê加入，lín是台語kap台灣文化ê希望。

賴咏華（【足英台三聲道磅米芳】YouTuber）

——網路自媒體時代ê語文運動：

Tī台灣，對30歲以下ê少年輩來講，台語bē輸是外國話，是一个聽無ê語言，想beh用媒體做趣味ê內容來sak台語，效果只有1%到2%。勉勵逐家ài過幸福快樂ê日子，tse kap做台語運動是平重要ê代誌。

張復聚（台灣羅馬字協會理事長）：

蔡英文總統認同lán做ê台語文母語運動，連續三冬寫三張公開批kā lán祝福。感謝周清玉縣長、姚嘉文資政tī總統府tàu-sann-kāng。

周清玉（台灣母語聯盟理事長）：

台語文ē-tàng傳--落-來，是濟濟人ê覺醒kap加入。彰化台語文化園區是台灣目前唯一ê台語文園區，tse是屬於眾人--ê，請逐家做伙管教、做伙規劃、做伙推動，希望ē-tàng發揮koh-khah大ê功效。多謝前輩一路來ê努力，拜託逐家ē-tàng連結--ê ài連結tiâu--leh，有團結，lán ê目的tsiah ē成。

陳柏惟（立法委員）

——體制外到體制內ê台語文運動：

Tī台灣電影歷史上票房前十名--ê，有七齣是使用多元ê本土語言。台語是tsiok浪漫ê聲音，我對台語文有革命、復興ê情感，夢想是創造一个流行hōo逐家來tuè。若是你有想法、對台語體制有期待，歡迎透過lán ê辦公室來集合力量，集合眾人ê智慧，一代一代湠--落-去，繼續做台語文khang-khuè。

蔣為文（成功大學台灣文學系系主任）：

1991年《台文通訊》以母語ê文化運動做起，m̄是kan-na發行紙本刊物，上重要--ê是帶動草根組織。《台文通訊》發行無偌久，全台灣開始組台文寫作會，鼓勵各地區讀友聯誼會。Tsit幾年《台文通訊BONG報》kap台灣羅馬字協會結合，有時代性ê意義。19世紀尾用白話字創造台灣文學，tse比中國五四運動早30幾冬。歷史傳統ài傳承--落-去，感謝30冬來陸續參與ê編輯kap讀者tàu-sann-kāng。

何信翰（台中教育大學台灣語文學系副教授）：

Hōo人印象上深ê兩份報紙雜誌，第一个是《Tâi-oân-hú-siâⁿ Kàu-hōe-pò》（台灣府城教會報），就是《Kàu-hōe Kong-pò》（教會公報），百外冬前就用台語leh討論醫學、科學，各種議題。第二个是《台文通訊》，伊m̄是一本純文學ê雜誌，有討論醫學、台灣地名、台語beh按怎書寫、科學、智識，議題多元，hōo台語m̄-nā講日常、講文學，台語路ē愈來愈闊。

吳宗信（陽明交通大學機械工程學系教授，2021年8--月起接任國家太空中心主任）：

感謝30冬來台語文有志辛苦維持到tsit-má，逐家繼續拍拚。

紀品志（《台文通訊30冬紀念特刊》文字編輯）：

《台文通訊》用台語文結連海內外ê台灣人，是濟濟ê文學作家、文史工作者、社會運動者、語文學習者交流ê論壇，到tann iáu是真重要ê平台。《台文通訊》tsit份雜誌累積真濟文獻，hōo lán真寶貴ê資源，mā為台灣語言運動做見證。

鄭良光（《台文通訊》創辦人、第1期～50期總編輯）

有一寡少年人提出講海外ê老一輩應該kā台灣語文運動歷史寫--落-來，所以有《台文通訊30冬紀念特刊》ê想法。舊年吳家銘（吳蝦米）自願執行，tsit段時間看in真拍拚，中間mā有開設《台文通訊》線頂讀者聯誼會。時間原訂是點半鐘，in lóng繼續留--落-來，講到台灣時間半暝1、2點。我心內真感動，感覺台灣少年人m̄肯放棄。台語文化是眾人--ê，鼓舞逐家募資贊助。

吳景裕（筆名陳雷，台灣文學作家）：

若是beh了解台語文危機ê人，tsit本30冬紀念特刊bē輸百科全書。至少有40幾位志工，大部份是少年志工，tàu做數位化編輯，來網頂贊助算是光榮。

A-koan（【落/làu台語-瑞士ê台語】社長）：

台文通訊30冬！M̄知偌濟人拍拚、堅持，tsiah ē-sái行到tsín。Ǹg望30冬後ē-tàng koh再來慶祝。到時tsūn台灣ē變啥款？將近20種本土話kám ē真正平等？多元語言文化kám有thang lóng koh活跳跳？

Sandy（法國台灣協會會長）：

講台語kap學其他語言仝款，面皮ài厚，tiānn-tiānn講，放棄就輸--ah。 

吳易蓁 （『夾腳拖』劇團團長兼導演）：

用台語講故事hōo囡仔聽，bē-tàng kā囡仔當做囡仔，ài kap伊互動，用陪伴囡仔ê方式辦活動。

陳育萱（樂暢親子共學空間負責人）：

我ê台語老師是陳豐惠老師，我踮伊ê身--上感受著推動台語ê熱情。「台文」m̄-nā是學台文，mā是學台灣ê文化，我希望kā tsit个文化、歷史教hōo囡仔，kā tsit个對台灣ê愛傳--落-去。

許雅茹（【牽囡仔ê手 行台語ê路】幹部）：

感謝《台文通訊》tī困苦ê台語環境堅持30冬，tsiânn做台灣人ê精神糧草，tse是一件無簡單ê代誌。阮是一陣kap囡仔講台語ê爸母，ǹg望台語生湠，為打造台語友善環境拍拚。第一步，透過面冊、文章、影片、經驗分享會huah醒意識。第二步，辦講古培訓、家長學堂，hōo家長增加能力，tsiah有法度堅持行--落-去。第三步，透過台語活動體驗、Podcast做文化串連。Tsit-má有台語家庭意識ê人愈來愈濟，相信未來ē愈來愈好。

楊晉淵（【台語冷智識】YouTuber）：

目前leh製作囡仔歌專輯，ē-sái tsiūnn「牽囡仔的手，來聽囡仔古」Podcast試聽，透過專輯kā台語家庭理念傳hōo koh-khah濟人知。

薛翰駿（【沃草】網路媒體總編輯）：

參加台文讀寫班了後，koh參加邱文錫老師ê讀冊會，愈學愈趣味，自án-ne來做相關tshui-sak ê khang-khuè，譬如做尪仔冊《臺灣名人傳記漫畫：湯德章》，希望thang kā台語文變做主流ê議題。

-----------------------------------------------------

#台文通訊30歲 專欄。 

台文通訊BONG報328期，2021年7月出刊。

歡迎捐款贊助　#李江却台語文教基金會　（捐款thang抵稅，匯款了後請通知02-23112199）

線上捐款(定期定額) https://ppt.cc/fF5bhx

線上捐款(單筆) https://ppt.cc/fcycox

有固定的長期捐款， 讓更多的台語文相關計畫可以穩定的推行，感謝逐家。

郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會

李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。

《台文通訊》30冬紀念獎頒獎典禮第二場簡要記錄

主持／周佳穎

記錄／吳宛霖

2021/11/6   台灣時間拜六暗22：00~24：00

主辦／陳文成博士紀念基金會 

承辦／世界台灣文化論壇 

贊助／台語文化大使命基金

台文通訊30冬紀念獎 頒獎典禮 (第一場)    https://youtu.be/d5JTY2a5-e4

台文通訊30冬紀念獎 頒獎典禮 (第二場)    https://youtu.be/hpsiG5NmBy8

主辦單位致詞 :

美國陳文成教授紀念基金會 

劉斌碩理事長

台灣連續hōo人殖民ê過去kap tsit-má快速全球化ê過程中，過去in透過強烈ê教育、媒體等手段，消滅台灣原本多元ê語言，台灣ê語言運動特別重要。恭喜tio̍h獎人，感謝lín久長為台灣語言運動所做、無私ê奉獻kap貢獻。

主題演講：

台灣基進為何用台語論政

基進黨

陳奕齊主席

Lán鼓勵少年家用台語、家己ê母語來發言、表達思想。2009年，我坐高雄捷運發覺揣無用台語交談ê高中生。台灣民主化過程中，台灣主體性明確，m̄-koh台語tsit个語言suah大量流失，文化意識型態受早期中國國民黨教育打壓kap對台語ê歧視。2013年，基進揣一寡少年世代tńg來關心台灣政治，除了挑戰政治制度，上重要--ê就是文化kap大中國意識型態ê挑戰，所以基進堅持用台語問政，未來是tī tsit个世代ê少年家身--上，希望母語ê使用ē-tàng愈來愈普遍。

贊助單位致詞:

台語文化大使命基金

鄭良光

陳文成教授紀念基金會頒tsit个獎是真好ê開始，華語霸權已經生根tī台灣社會，普遍認同華語ê正當性，lán beh建立台灣主體性國家，需要有主體性ê台灣文化，uì草根ê台語運動做起。感謝我ê牽手，長期對我推動台語事工ê支持，感謝我ê後生不時提醒我hām阮孫ài講台語，感謝我ê二哥、二嫂啟明我ê台灣意識。

主題演講：

Tuì猶太人ê文化認同、建國來思考重建台灣人文化認同到建國ê可能性

台南神學院

王崇堯前院長

猶太人ê認同是tuì每一工開始，in kap上帝立約，是守節禮ê民族，in每一工ài祈禱三擺，提醒家己是猶太人，拜五暗kā囡仔講猶太人ê故事，拜六早起去會堂kap猶太人做伙講猶太人ê故事，起造家庭kap社區對家己ê認同。In 9--月快樂過新年ê時，ài講起亡國ê痛苦，in ê成年禮俗ài知影做一个猶太人ê意義kap責任，上要緊--ê是ē-hiáu用家己ê母語讀家己ê律法，做一个猶太人，感覺是榮耀，tse是猶太人對歷史ê認同kap意識。就算是亡國，猶原是逐日、逐禮拜、過節ê時講家己ê語言，所以母語就ē-tàng保存；1984年復國ê時，語言真緊就恢復。台灣人若真正beh出頭天，建立家己ê國家，ài用家己ê語言講lán ê故事，ài有tsit款決心。所有宗教禮儀就是一種remider，提醒你ài講啥mih話、講啥mih故事、做啥mih款ê代誌，ē-tàng一代傳hōo一代。真正有價值ê代誌，無法度tī lán一生中完成，所以一定ài保持ǹg望，來得著心安。

專業人士貢獻獎 

吳宗信

Ǹg望tī lán社會有影響力ê人士盡量tī政治、文化、科技、藝術、運動等重要ê場合，用母語iah是台語傳播專業ê智識，表現台語ê完整兼水準，透過展現，影響有資源分配政治權ê政治人物kap台灣未來有前途ê少年家。感謝無私啟蒙我ê濟濟前輩kap朋友，無in ê牽領就無tsit-má我對台灣ê堅持。

台語文教育獎

蔣為文

感謝世界台灣文化論壇、陳文成教授紀念基金會，感謝進前tī美國讀冊時，德州濟濟ê同鄉對我做台語文、台越比較研究ê支持，感謝成大台灣語文測驗中心所有助理團隊長久以來做伙拍拚tshui-sak台語文，感謝阿兄一直kā我支持。

弱勢文化關懷獎

鄭雅怡

Tsiânn榮幸得著tsit个獎，kan-na建議請求以後類似ê頒獎名額ke hōo查某人一寡機會，多謝。

社區服務獎

陳豐惠

感謝主辦單位，感謝家族序大背後ê支持，感謝李江却台語文教基金會一路ê同工、捐款者、有志、志工ê鼓勵kap支持，感謝逐家做伙拍拚。

  

草根運動獎

陳明仁

感謝朋友久年來ê拍拚，感謝蔡有全傳道教我白話字hōo我行台語文ê路途，感謝教會公報社hōo我用白話字發表寫作，感謝《台文通訊》、《台文BONG報》，若無tsia-ê發表平台，我無法度出台語文作品，感謝濟濟朋友hōo我sì-kè走揣文學ê人生，鼓勵逐家用台語文書寫，創作、欣賞台語文。

資訊工程服務獎

楊允言

希望有koh-khah濟少年人ē-tàng開發出koh-khah好ê系統，hōo逐家方便使用台文，感謝主辦單位，多謝。 

科技運用獎

吳家銘

感謝主辦單位、陳文成教授紀念基金會，鼓舞koh-khah濟少年朋友參與台語文事工。

謝詞：

《台文通訊》主筆

陳雷

感謝過去所有關心台語、為台語拍拚ê每一个人，台灣台語ê生態，一方面政府有真濟資源，但是對台語ê政策無積極；另一方面，lán民間有真大ê力量leh tshui-sak、拍拚，m̄-koh欠資源也無決策ê權力。台語tsit條路變做長短跤行bē緊，過去30冬，台語tshui-sak，靠民間ê動力做火車母，政府tuè tī後面行，總--是台語面對滅絕ê危機。30冬典禮凸顯民間ê精神，tsit七位hōo人尊敬ê tio̍h獎人，in除了kap《台文通訊》有共同ê因緣以外，iáu有sio仝ê所在，in lóng是拍頭陣運動ê人，長期ê奉獻kap貢獻是台灣精神ê示範。多謝陳前總統水扁接受邀請，可惜臨時有代誌無法度參與。感謝主辦單位：美國陳文成教授紀念基金會、贊助單位：台語文化大使命基金、承辦單位：世界台灣文化論壇。多謝前文化部長鄭麗君支持台語、語言平等，多謝基進黨用行動支持台語kap母語。多謝王崇堯院長kā lán分拆猶太人ê文化認同、建國，hōo lán思考suà--落-來beh行ê路。多謝阿勇第一場ê演講，分拆台語ê危機kap救台語ê思考。

台灣行入民主艱難ê過程中，lán得著民主，但是失去文化，lán得著投票選舉，但是lán拍m̄見先民所累積--落-來寶貴ê文化遺產，甚至lán ê語言。文化雖然無法度決定lán beh做佗一國ê人，但是，文化ē-tàng決定你beh做佗一款ê人。Lán思考ê方法、內容、做人ê價值lóng受著文化ê影響，tī衝突無和平ê世界，文化是認同kap認知ê基礎，伊tsiânn做國家安全ê基本條件。所以lán一定ài計較文化，改變文化hōo人殖民、消滅ê地位。台灣話ē-sái到ê所在，台灣文化就ē-tàng活--起-來，kā lán ê語言帶入去社會內底，m̄是kan-na做表演、展覽，ài kā台語變做lán生活ê語言。

#台文通訊30歲 專欄，本文使用教育部推薦漢字kap臺灣閩南語羅馬字拼音方案。

#台文通訊BONG報 335期，2022年2月出刊。

歡迎捐款贊助　#李江却台語文教基金會　

（捐款可抵稅，匯款後請通知02-23112199）

線上捐款(定期定額) https://donate.newebpay.com/Period/akhioh/lkk

線上捐款(單筆) https://donate.newebpay.com/akhioh/lkk

郵政劃撥：19021486

戶名：財團法人李江却台語文教基金會

電匯：123-20-050514-2

華南銀行士林分行活儲

戶名：財團法人李江却台語文教基金會

#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。