作者：陳俐雯
有一个望
恬靜tī夢中
Tī hia就算風khau雨lâm
猶原花紅葉青
青春原在
有一个夢
百年青春等候千年歲月ê溫柔
愛tī春來冬去ê流擺翩翩起舞
情tī日光月夜ê浪漫交織意愛
Che iⁿ纏ê跤跡
一路向前
行過少歲ê táng-hiaⁿh
衝破罩bông ê年華
一步一步hāⁿ過歲月ê山niā
親像欠啥mi̍h ê款
青春用暝日ê khùi力tī歲月ê世界走揣siàu想ê夢
Bē輸短短短ê一世人有用bē了ê時間
Ká-ná紅紅紅ê花蕊永遠lóng bē退色
哪ē知？
一下無張持
走精ê針tī重重疊疊ê歲數
來來回回刺號、留khî
歲月ê chhoah流無聲無soeh tī青春ê面模
無停無歇妝thāⁿ風霜
Hō͘走形ê青春
Tī纏纏ba̍t-ba̍t ê jiâu痕揣無tńg--去ê路
拍茫ê驚惶點tuh變款ê未來
無thang pha碇ê心
Hē性命tī àu黃ê曆日走揣早時khēng ê色彩
綿爛tī目一nih ê瓊花等候永恆ê美麗
按窗縫射--入-來ê日鬚
弓開hit个無想beh醒--來ê夢
金金看伊無話無句一八liu-liu去
想beh借問：
Ta葉lian花kám iáu有ǹg望？
啊！原來青春是歲月ê祭品
有啥人ē-tàng kā我講
青春 到底是走佗位去？
作者：陳俐雯 （台羅會會員 ）
Hian-khui tó tī thoah-á-té ê siòng-phō͘, àu-n̂g ê siòng-phìⁿ thí-khui 1 ia̍h 1 ia̍h kì-tî ê bō͘. Thè-sek ê ōe-bīn ū gín-á-sî hàu-tai ê kó͘-chui, ū siàu-liân poān-ge̍k ê ǹg-tǹg, mā ū siōng chhiⁿ ê nî-hôa. Che 1 tiuⁿ koh 1 tiuⁿ hoán-n̂g ê kū siòng-phìⁿ, chhōa góa chǹg kòe siàu-liām chheng-chhun ê pōng-khang.
Siòng-phìⁿ lāi-té hit ê thǹg-chhiah-kha koh suh leng-chhùi-á sì-kè chông ê gín-á-phí, chi̍t-ba̍k-nih í-keng tōa-hàn--ah, kì-ek tiong hit ê ài khàu koh ài tòe-lō͘ ê cha̋-gín-á, í-keng sī seⁿ-chò jī-pat chheng-chhun ê siàu-lú, náu-hái tiong ê kì-tî koh ū chiok chē eng-ia ê kì-ek iáu bē-hù chhéng-thûn, tō tîm lo̍h sòe-goa̍t ê le̍k-sú.
Tiàu leh piah-téng ê ji̍t-chì iáu thêng tī chheng-chhun hit ia̍h, bô-tâ-ôa, sòe-goa̍t ê chhiú piàⁿ-sè tī chheng-chhun ê bīn tiám hûn boah hong-song, bô-siaⁿ-bô-soeh tī hia̍h-thâu ê jiâu-hûn siá ìn-kì, hō͘ chió-hòe ê tan-sûn phah-bô--khì, phiau-tì ê seⁿ-tiuⁿ cháu-cheng--khì. Siūⁿ lóng bô? Sī án-chóaⁿ sim to iáu-bōe chún-pī beh kap chheng-chhun hun-chhiú, ná ē ba̍k-chi̍t-nih i tō “it pat liu-liu-khì”; iáu teh hoaⁿ-hí chheng-chhun chhiâng-chāi, soah tō ài bīn-tùi bû-siông sòe-goa̍t chiong bí-hó ê iáⁿ-jiah, bí-lē ê bīn-bô͘ khau kah hi-le̍h-le̍h, goân-lâi chheng-chhun chá tō bô-tiuⁿ-bô-tî hō͘ bô-siaⁿ ê sòe-goa̍t lia̍h-kau-thè.
Lian--khì ê chheng-chhun tī sî-kan ê tē-tô͘ chi̍t-tih-chi̍t-tih lâu-lo̍h ko͘-ta ê sí-hái, hō͘ bô ǹg-bāng tī ai-siong ê sim ta̍uh-ta̍uh-á hoat-kàⁿ, che tiau-siā ê chheng-chhun kan-na ē-tàng tī ná àm, an-chēng ê mê chheh-thàn, té ji̍p siòng-kheng, ko͘-ko͘-toaⁿ-toaⁿ theⁿ tī tû-thang-lāi. Ū siáⁿ lâng ē-tàng kā góa kóng, chheng-chhun, tàu-té sī cháu tó-ūi--khì?
作者：陳俐雯
Hit年 愛kah山盟海誓
現時 只賰心酸纏tòe
Hiàng時
絲絲誓言 ù心頭
Chit-má
手指退色 剝bē lut
情影切kah一塊仔一塊
掠bē著閃爍ê記持
無情ê反hiau sńg-tn̄g青春
苦澀ê靈魂tī鐵窗內滾絞
揣無步thang tháu放ê怨
Ng-chn̂g soan íⁿ cha̍t tī泉頭
Hō͘心沓沓仔拍kat
愛 聊聊仔死--去
無愛看顧ê花欉
驚 ná hùn ná闊
心 ná沉ná深
Tâm濕濕ê目墘揣無phàng見ê幸福
檢采是神ê疼thàng
引chhōa ǹg望鑽過pit巡ê空喙
心liòng開禁聲ê束縛
奮力吐出憂鬱 大聲向天祈禱
願光降臨 願愛kap我做伙
就算賰上尾仔一口khùi絲
Mā beh走揣藏tī手面ê春天
作者：Tân Lī-bûn 陳俐雯 （台羅會會員）
Sèⁿ-miā bô-su-iàu ki-khiáu, in-ūi chin-chē sî-chūn ki-khiáu mā bô-tek-khak ū-lō͘-iōng. Lâng m̄-bián 100 hun, in-ūi chin-chē sî-chūn koân-hun ê jîn-seng mā bô-tek-khak ū boán-hun ê hēng-hok. Put-toān tui-kiû sī hiān-tāi-lâng ê seng-oa̍h bô͘-sek, bē-tàng su tī khí-pōng, it-chhè lóng ài piàⁿ sī the̍h-tio̍h sèng-lī mn̂g-phiò ê tē-it-pō͘. Án-ne ê su-ûi hó á-sī m̄-hó, bô phiau-chún ê tap-àn. Chí-sī tàu-té ū gōa-chē-lâng su-khó kòe put-toān tui-kiû ê pōe-āu tùi ka-kī ê sèⁿ-miā ū siáⁿ ì-gī?
Tī 21 sè-kí lâng ê it-seng sī chi̍t-chióng tián-sī, iōng hiān-tāi-lâng ê kóng-hoat kiò-chò chū-ngó͘ hêng-siau. Kho-ki ūi seng-oa̍h tòa lâi siūⁿ-bē-kàu ê chìn-pō͘, bāng-lō͘ kap bûn-bêng kòe-tō͘ hoat-tián chhiong-kek sè-kài só͘-ū it-chhè. Pí-lūn-kóng bûn-hòa, keng-chè, chèng-tī, kàu-io̍k, seng-oa̍h, jîn-chè-koan-hē kap kè-ta̍t-koan... téng. In-ūi choán-piàn siuⁿ-kín, tì-sú sán-seng chē-chē siā-hōe būn-tê, siōng bêng-hián--ê tō-sī lâng kè-ta̍t-koan ê bô-kâng. Hiān-kim bāng-lō͘ sin-sî-tāi phah-khui sè-kài só͘-ū it-chhè ê khó-lêng-sèng. Chit-má ê lâng ta̍k-kang ba̍k-chiu peh-kim, hīⁿ-á thí-khui, khòaⁿ--tio̍h-ê, thiaⁿ--tio̍h-ê, lóng-sī siā-kûn mûi-thé kà lí beh án-chóaⁿ hó-gia̍h, pun-tiuⁿ beh án-chóaⁿ-iūⁿ hiáⁿ-ba̍k chiah-ē chhut-miâ. Chia siat-kè hó ê ōe-bīn kap si-a-geh kòe ê siòng-phìⁿ, sī chu-sìn po̍k-chà hō͘-lâng bê-sit ê siong-gia̍p chhiú-tōaⁿ, mā sī siàu-siūⁿ sêng-kong siōng ū-phā ê pō͘-sò͘.
M̄-koh seng-oa̍h bô-bo̍k-tek hō͘ sim khang-hi, chhōe-bē-tio̍h sèⁿ-miā ê ì-gī, hō͘-lâng óng-óng tī tui-kiû ê kòe-têng tiong lak-lo̍h sî-tāi chìn-pō͘ ê hām-chéⁿ, ta̍uh-ta̍uh-á bê-sit chū-ngó͘, phian-lî pún-sèng, put-ti-put-kak tō tîm-bê tī lī-keng ê ngó͘-hoe-cha̍p-sek, tian-tó bīn-tùi koh khah-chē tak-kha̍p , che sī chit-má siā-hōe chiâⁿ phó͘-phiàn ê hiān-siōng.
Lâng m̄-sī bē-tàng ū io̍k-bōng, in-toan io̍k-bōng mā sī sèⁿ-miā ê chi̍t-pō͘-hūn, sī lâng hiòng-chiân chìn-pō͘ chiâⁿ tiōng-iàu ê tōng-la̍t. Ì-gī tī-liâu tāi-su Frankl mā bat kóng--kòe, “Lâng ē-tàng ūi ì-gī lâi sí, mā ē-tàng ūi-tio̍h ì-gī oa̍h--lo̍h-khì.” Só͘-pái múi-chi̍t-ê tui-kiû pōe-āu ê ì-gī tō chin tiōng-iàu. Chhōe-tio̍h sèⁿ-miā ì-gī ê léng-ngō͘ ē éng-hióng seng-oa̍h hong-sek ê soán-te̍k kap thāi-tō͘, tong lán chheng-chhó chit-ê tui-kiû sī sèⁿ-miā ê bo̍k-phiau, m̄-sī khang-hi tô-pī ê chià-kháu, kian-tēng ê sim ē chhòng-chō sèⁿ-miā ê chū-iû. He ē sī chi̍t-chióng sim-lêng chhiau-thoat ê choán-hòa, chi̍t-chióng tī ì-gī lāi-té chhōe-tio̍h bêng-pe̍k ka-kī kè-ta̍t ê le̍k-liōng.
作者：陳俐雯
本專欄「台羅會交流道」ê稿由台灣羅馬字協會提供kap校對，編輯部無koh做文字編輯。
Goe̍h, àm-tām ê kng-sòaⁿ chiò tī khún-pa̍k ê ūn-miā
月，暗淡的光線照佇捆縛的運命
Chhun thiⁿ-chhiⁿ pôe-phōaⁿ tîm-tāng ê kha-pō͘
賰天星陪伴沉重的腳步
Chhiò hit-toān kóng bē chhut chhùi ê le̍k-sú
唱彼段講袂出喙的歷史
1947 nî pi-chêng-hō͘ lo̍h bōe-thêng, bông-bū póe bē-sòaⁿ
1947年悲情雨落袂停，雺霧掰袂散
Phòa-éng ê lêng-hûn chì-khì bān-tiōng, piàⁿ seⁿ-sí
破湧的靈魂志氣萬丈，拚生死
Nāi-hô káu-khì ti-lâi siâ-hong-kông
奈何狗去豬來1邪風狂
Phàu-hóe chhèng-siaⁿ lûi-kong sih-nah
砲火銃聲雷公爍爁
Loān-sè-hong khîⁿ hiâu-hēng ê lâng, hoe lo̍h-thô͘
亂世風鉗2僥倖3的人，花落塗
Thun-chia̍h ê chheⁿ-liông hûn-toān chheng-bān-lâng, hoeh-chho boán-kheⁿ
吞食的青龍4魂斷千萬人，血臊滿坑
Sam-hûn-chhit-phek bān-kiap-put-ho̍k teh kún-ká
三魂七魄萬劫不復teh滾絞
Gōng-gōng leh tán chi̍t-si-si-á chèng-gī ê hi-bāng
戇戇teh等一絲絲仔正義的希望
Pe̍h-hó͘ chhàng-chhiu háu-hoah:
白虎5聳鬚吼喝：
Góa beh phòa-khui, lín
我欲剖開，恁
Chū-iû ê sim-chōng
自由的心臟
Tô͘-sat poān-loān ê su-sióng
屠殺叛亂的思想
Beh koah bô thiaⁿ-ōe ê hīⁿ-á
欲割無聽話的耳仔
Phut-tn̄g m̄-goān khut-ho̍k ê kha-kut
刜斷毋願屈服的跤骨
Chiah-koh liô ām-kún-kin ê hoeh, kek
才閣𠞭頷頸筋的血，激
Chi̍t-àng pà-khoân sèng-lī ê chiú khèng-chiok
一甕霸權勝利的酒慶祝
A-san-á hóe-chhèng gia̍h-koân, khí-chho͘-chhân
阿山仔6火銃攑懸，起粗殘
Án jì-puh-á téng lâi-lâi hôe-hôe sàu-siā
按吉甫仔頂來來回回掃射
Chhiong-kông ê chhèng-chí chi̍t-lia̍p chi̍t-lia̍p
猖狂的銃子一粒一粒
Kǹg-thàng náu-chhóe siā-kòe phôe-bah
貫迵腦髓射過皮肉
Chia lêng-tî ê to-iáⁿ toat-miā ê chhèng-siaⁿ, kā
遮淩遲的刀影奪命的銃聲，共
Bak-hoeh ê lêng-hûn an tī le̍k-sú ê o͘-àm-tē
沐血7的靈魂安佇歷史的黑暗地
--------------
（簡稱「台羅會」）簡介：
2001年成立，宗旨：
(1)推行台灣羅馬字ê研究kap普遍化。
(2)追認台灣羅馬字kap台灣話ê法定地位。
(3)要求政府實施公平正義ê多語文政策。
(4)建設多元、開放、互相尊重ê台灣文化。
E-mail：tlhemail@gmail.com
網站http://www.tlh.org.tw
